Nehemiia 8 - O Mikanda Ikola

Ejidala u tanga mu kitumu bhu pholo ia kifuxi

¹ Kia bhixila o mbeji ia kasambuadi, kuila anʼa Izalaiele a kala kiá mu sanzala jâ, kifuxi kioso hé ki bhongolokela bhu muhenda, kala muthu umoxi ngó, bhua lulama ni Muelu ua Menha; anga ambela Ejidala, dia musoneki, exi: A bheke o divulu dia kitumu kia Mozé, Ngana kia tumine Izalaiele.

² Anga Ejidala, dia nganga, u bheka o Divulu dia kitumu bhu pholo ia kionge, kia mala ni kia ahatu, ni kia oso a tetulukila kuívua, mu kizuua kia dianga kia mbeji ia kasambuadi.

³ Muene anga u tangamu, ku pholo ia muhenda, ualela bhua lulama ni Muelu ua Menha, tunde mu kimene kia tundu o dikumbi, katé mu kaẋi ka kizuua ku mediia, bhu pholo ia mala ni ahatu, ni athu a tetuluka; anga o mátui ma kifuxi kioso ma jikukila kuívua o divulu dia kitumu.

⁴ Anga o Ejidala, dia musoneki, uimana ku thandu dia kitala kia miẋi, kia tungile-bhu; anga a mu imanena bhu mbandu iê, ku lukualu luê lua kúdia, kuala Matitiia, ni Sema, ni Anaia, ni Udiia, ni Hilikiia, ni Mahaseia; ku lukuaku luê lua kiasu, Pedaia, ni Mizaiele, ni Melekiia, ni Hasume, ni Haxibadana, Zakadiia, ni Mezulame.

⁵ Anga Ejidala u jikula o divulu bhu mesu ma kifuxi kioso, mbata muene ua kexi bhulu dia kifuxi kioso mukonda muene ua nzangamana-ku dingi; muene kuila u jikula o divulu, kifuxi kioso emana.

⁶ Anga Ejidala u ximana Ngana, o Nzambi ia munéne; anga kifuxi kioso etaia ni kuleka o maku mâ bhulu, exi: Amém! Amém! Anga a bhetama, hé a bheza Ngana, ni jipholo bhoxi.

⁷ Ni Jesuua, ni Bani, ni Selebiia, ni Jamine, Akube, Sabetai, Hodiia, Mahaseia, Kelita, Azadiia, Jozabade, Hanane. Pelaia, ni akua Levi, a kuata kulonga o kifuxi kia mundu kuijiia o kitumu; anga kifuxi kioso emana muene, kana muthu u tunda-bhu.

⁸ Anga a tanga mu divulu dia kitumu kia Nzambi, ni mbimbi ia lomboloka kiambote; a tanga-mu, hé a lombolola o njimbu iê, a ki bhangela kuila, mbé ki a tanga, ki lomboloke.

⁹ Anga Nehemiia (kuma muene ua kexile nguvulu) ni nganga Ejidala, dia musoneki, ni akua Leví, a kexi mu longa o kifuxi ni ku a lombolouela o maka, hé a tangela o kifuxi kioso, exi: Kiki kizuua kiòlumbile Ngana dia Nzambi ienu, ki mu luuale mba mu dila. Mukonda kifuxi kioso, mu kuívua maka ma kitumu, a kexe mu kudila.

¹⁰ Nehemiia u a tangela dingi, uixi: Ndenu, mua kà die ima ia nete, ni kúnua ima ia touala, anga akuenu a kambe kuiudika kima mua kà a tumikise ue kia kúdia: mbata kizuua kiki kia dikota kiolumbile kua Ngana ietu; uila kiki, ki mu disuuate, mukonda o kusanguluka kua Ngana, iene o nguzu ienu.

¹¹ Anga akua Leví ue, a di xibhisa o kifuxi kioso, exi: Dixibhienu; mbata kiki kizuua kikôla; ki kia ku di suuata, kana.

¹² Bhenhobho o kifuxi kioso hé aia mu kúdia, ni kúnua, ni ku di tumikisa mákudia, ni kubhanga jifesa jonène; mukonda maka ma a longesa mʼa tetulukila kiambote.

Fesa ia jifundu

¹³ Anga ki kuáki, kizuua kia kaiadi, o makota a jitata ja kifuxi kioso, ni jinganga, ni akua Leví, a bhongolokela musoneki, Ejidala, a ki bhangela mbé kudilonga o maka ma kitumu.

¹⁴ Anga a sanga mu kitumu muòsoneke kuma, Ngana ua tumine, mu ukunji ua Mozé, kuila anʼa Izalaiele, mu izuua iangene ia fesa, ku mbeji ia kasambuadi, a kala mu jifundu.

¹⁵ Hé a ki tanga kuene kuoso, anga a bhitisa ngonge ni kutumikisa njimbu mu jisanzala jâ joso, ni mu Jeluzaleme, exi: Ndenu ku mulundu, mu takane-ku jithangu ja midiva, ni jithangu ja midiva ia muxitu, ni isasa ia miẋi iengi, ni isálale ia maie, ni jithangu ja miẋi ia vundu, nda mu tunge jifundu, kala kia ki soneka.

¹⁶ Kifuxi kioso-phe, hé a tunda, anga a bheka o jithangu joso, anga a tunga jifundu jâ, amoxi ku thandu dia jinzo jâ, ni ku dima dia jinzo jâ, ni mu malumbu ma inzo ia Nzambi, ni bhu kitanda kia muelu ua Menha, ni bhu kitanda kia Muelu ua Efalaime.

¹⁷ Anga kibuka kioso kia athu oso a vutuka kʼubhika a tunga jifundu, anga a kala muenhomo, mukonda anʼa Izalaiele ka ki bhangele dingi, tunde mu izuua ia Josuué, monʼa Nune, katé mu kizuuʼokio; anga kukala kusanguluka kuavulu, kuavulu muene!

¹⁸ Anga Ejidala muene u kuata kutanga mu divulu dia kitumu kia Nzambi, kizuua ni kizuua, tunde mu kizuua kia dianga katé kia sukidilaku; anga a bhitisa fesa iangene mu sambuadi dia izuua, kizuua kia kanake, anga a bhitisa fesa ia kuzumbuka, kala kia ki lekelela.