Nehemiia 6 - O Mikanda Ikola

Jinguma a ta kikutu kia ku tu tutuuila ni kuta uoma kua Nehemiia.

¹ Anga ki bhita-phe dingi kuila, kia kʼivu Sambalate, ni Tobiia, ni Jeseme, dia mukua Alábia, ni jinguma jetu jamukuá joso, kuma kimbaka kioso nga ki tungu, o kuene kana-ku dingi musula ua xalela-ku, sumbala katé kithanganʼokio, o mielu ki tua i tele luua mabhitu.

² Sambalate ni Jeseme a tuma ku ngi tangela, exi: Izá, tu takane kumoxi mu tusanzala, mu honga ia Ono phala tu di kunde hanji. Ene-phe a kanene ku ngi bhanga kiaiibha.

³ Eme-phe anga ngʼa tumikisa jiphunga, ngixi: Nga mu bhanga kikalakalu kia dikota, ki ngi tena ku kulumuka; ngi xia kiebhi o kikalakalu kiemana, eme hé ngʼiami mu kutakana ni enu?

⁴ Luuana lua muvimba lua tuma jinga kiómuene ku ngʼixana; eme ue anga ngʼa vutuila luuana kiene kimoxi.

⁵ Lua katanu Sambalate u ngi tumikisa kiá mubhikʼê ni mukanda ua jikuka ueza na-u bhu lukuaku luê.

⁶ Mu mukanda muòsoneke, exi: Kia fumana muʼaxaxi ka athu a kʼivu, ni Jeseme ue ua ki zuela, kuma nʼeie ni akua Juda mua mu kana kubaluka, kiene ki mua mu tungila o kimbaka; exi ue dingi kuma eie uandala u di bhanga sobha iâ.

⁷ Eie ua tumikisa ni jipolofeta, nda a ku boke eie mu Jeluzaleme, exi: Iú muene sobha ia Juda. Hundu iii-phe, sobha ua-nda ku ivua; kala kiki, eie-phe izá kindala tu di kunde kumoxi.

⁸ Eme-phe ngi tuma o ku mu tangela, ngixi: Iene ioso i ua zuela, kana kima kia bhiti-bhu; inda eie-muène ua i funha ku muẋima ué.

⁹ Mbata ene oso a kexi mu kusota ku tu kuatesa uoma, exi: Andu katulaku o maku mâ, anga kikalakalu a lémbua ku ki bhanga. Kiki-phe, eie u Nzambi, suinisa o maku mami.

¹⁰ Kioso ki nga bokona monzo ia Semaia, monʼa Delaia, dia monʼa Mehetabele, muene u ngʼambela, uixi: Tuietu mʼonzo ia Nzambi, mu Tembulu, tua kà jike mabhitu ma Tembulu; mukonda lelu a-nda kuiza ku ku jibha; nga tange kidi, a-nda kuiza muene ku ku jibha mʼusuku uenhú.

¹¹ Eme-phe, ngixi: Ki bhita kiebhi? Diiala kalʼeme, u lenga? Nanhi muene uala-ku, kala eme, u bokona mu Tembulu nʼa laie? Kana! Momo ki ngi xikina kubokona-mu.

¹² Anga ngi tetuluka kuma ki Nzambi ua mu tumu; muzambu uê ua ku ngi bhanga phulu, mbata ni Tobiia ni Sambalate ene a mu futile.

¹³ A mu bhana dikumba dia ku mu futila nʼa ngi kuatese uoma, ngiia ngi zubha ku ki bhanga, kia kubokona mu tembulu, ngala mu kituxi, ene nda a kala ni kia ku ngi fumanesa kiaiibha, kienhiki anga ene a mona kia ku ngi tatela na-kiu o milonga.

¹⁴ Eie Nzambi iami, ni Tobiia ni Sambalate, a te muẋima ku ima iii i a bhange, ni Nouadia ue, o polofeta ia muhatu, ni jiplofeta nʼakuá oso a sotele ku ngi kuatesa uoma.

¹⁵ Kimbaka anga kibhua o ku ki tunga mu makuinhi atanu a izuua ni izuua iiadi ku mbeji ia elulu, kuila o mbeji ia kuata makuinhi aiadi a kizuua nʼitanu.

¹⁶ Anga ki bhita kuma, o jinguma jetu joso, ki a kʼivu, uoma u a kuata, matumbu oso muene a tu kondolokele mu jimbandu, anga a bhuila ku mixima iâ-ene muene; mbata a tetuluka kuma Nzambi ietu muene ua bhange o kikalakalu kiki.

¹⁷ Mu izuuʼomo-phe ue, jingana jimoxi-mu ja Juda, a soneka jinga mikanda iavulu, i a kexi mu tumikisa kua Tobiia; ni mikanda ue iavulu ia Tobiia ia kexi mu kuiza kó kuâ-ene.

¹⁸ Mukonda akua Juda avulu muene a lokelele ku di bhaka-nê kumoxi, nda dia kukala holomʼia Sekaniia, monʼa Aiahe; anga monʼê ua diiala Johanane u sakana ue ni monʼa Mezulame monʼa Belekiia.

¹⁹ Mbote jê ja kexi mu kubhanga eza jinga ue ku ngi tangela-ju, anga aia a mu tudila ue o ima i nga kexi mu kuzuela; uila kiki, Tobiia hé u suína ni kusoneka o mikanda ié ia ku ngi kuatesa o uoma.