Nehemiia 5 - O Mikanda Ikola

Jingadiama a longolola ji mvuama, Nehemiia anga u bazela o jimvuama

¹ Kudikola-phe anga kuvula kua mala ni akajʼâ, mukonda dia jiphange jâ, akua Juda.

² Mbata kua kexi ni iá ela jinga, exi: Nʼetu ni anʼetu a mala, ni anʼetu a ahatu, tua vuluʼetu muene; kala kiki tuienu tu tambule tiliku, sembele tu die nda tu laie.

³ Eme iá ue, exi: Tua ximbika o jixi jetu, ni mivide ietu, ni jinzo jetu, mu tiliku ia kúdila mu nzala mumu.

⁴ Bhu kala ue ni iá amba jinga, exi: Etu ni kufuta ngó o lubhaku lua sobha, tua sobho kitadi kia ngene, bhu kididi kiê etu tua ximbika o jixi jetu ni mivide ietu.

⁵ Suke-phe, atuenhoso tu akua xitu imoxi, kuma etu ni akua muiji ua Juda, tu jiphange; o anʼetu úe a sokuʼâ ngó ni anʼâ ene; talesa, o kiki anʼ etu a mala ni anʼetu a ahatu tu a bhakula mu ku kala abhika; tua suku mu kuila amoxi mu anʼetu a ahatu ejidila kiá ni ubhika, o kia ku akula na-kiu, bhu makuʼetu, tua ki lémbua; mukonda athu amukuá a tambula kiá o jixi jetu ni mivide ietu, iii iala kiá bhu maku ma athu engi.

⁶ Eme-phe, mu kuívua o kudikola kuâ, ni ki a kuata kuzuela kiki, ngʼivua kia ngi kuama kiavulu!

⁷ Anga ngi kala mu banza imʼiii ku muẋima uami! Hé ngi bazela o jingana ni atumini, anga ngʼa tangela, ngixi: Mu kuvualesa o makongo enu, muala kubhûnda, muthu u bhûnda mukuá muthu u bhûnda mukuá, o ene phange jenu. Anga ngʼa bhongoluela kionge kia dikota kia athu.

⁸ Anga ngʼa tangela, ngixi: Abha etu tua kula kiá o phange jetu, akua Juda, a a sumbisile ku matumbu, muthu ua bhana bhuoso bhua kuatela; o kiki enu phange jenu mu a sumbisa dingi lua kaiadi, mbé etu ni tua a kula dingi lua mukuá? Ene exi ni ene húdi, kia kuvutula a ki lémbua.

⁹ Ngixi dingi: Ki mua mu bhanga kima kiambote! Kífua ki mua fuamene kuenda mu uoma ua Nzambi, mbé kuiengesa ku tu lebhula kuala jinguma jetu, o matumbu?

¹⁰ Eme uami, uixi o jiphange jami ni minzangala iami, mu kubhana makongo a kuvualesa kitadi tua bhana kitadi ni tiliku. Maji tuehienu kiá o uenji iú.

¹¹ Nga mi diondo a vutuidienu kiá, lelu muene, o jixi jâ, ni mivide iâ, ni midivua ia, ni jinzo jâ; mu a vutuila ue ni milambongo ia kitadi kia kuvualesa ki mua tambula ku tiliku, ni kia vinho, ni kia maji, ki muala ku a bhinjika ku mi futa, mu ki vutula.

¹² Kuala ene-phe, exi: Tu a vutuilakiu muene! Ki tu soto dingi ku a tambula kima; ioso i ua zuela, iene i tu bhanga. Bhenhobho ngʼixana o jinganga, anga ngʼa lokesa ni kuila a-nda kubhanga muene kioso ki a zuela.

Nehemiia u bhana phangu iambote

¹³ Eme uami ngi kukumuna homba iami, ngixi: Kienhiki Nzambi kia kukumuna muthu uoso mʼonzo iê ni ku kikalakalu kiê u fula kutumaka kizuelu kiki, u mu kukumuna kienhiki anga u xala hatu! Kuala kionge kioso: AMÉM! Anga a ximana Ngana; kifuxi kioso ka zuela dingi kima, anga a bhanga kala kiambe o kizuelu kiki.

¹⁴ Eme ue tunde kiá bhu kizuua sobha kia ngi xindi kukala nguvulu mu ixi ia Juda, ku muvu ua makuinhʼaiadi, katé ku muvu ua makuinhʼatatu nʼiiadi ua sobha Artaxexe, kuinhi dia mivu nʼiiadi iosuʼiii, né eme, né o phange jami, ki tua dile kúdia kua unguvulu.

¹⁵ Nguvulu ja dianga-phe, ja ngi diangelele eme, a kexi mu tatesa kifuxi, ni ku a tambula kúdia ni vinhu, anga ku thandu diê, a ta-ku ku futa makuinhiʼauana a xikulu ia itadi ia phalata; o minzangala iâ hanji ue a kuata kubhikisa o kifuxi; maji eme-phe ki kiene ki nga bhange, mukonda dia kuxila Nzambi.

¹⁶ Inda mu kukalakala o kimbaka nga iudika-ku uami; nʼeme ni minzangala iami ioso, kana ixi ioso-ioso, i tua sumbu; o minzangala iami iene ioso muene a kalakala ku lumbu.

¹⁷ Akua Juda ue, hama ni makuinhʼatanu a muthu kumoxi ni atumini, ni oso a kexi mu kuiza ko kuetu, ku akua matumbu a tu kondoloka, a kala jinga mu xikama ku mezʼami mu kúdia.

¹⁸ Anga kietu kia kúdia ku kizuua ni kizuua a kala mu kujibha ngombe imoxi ni mbudi jisamanu jòsole; a teleka ue ni jinjila jami eme kúdia; ni vinhu ianzungule ia idifua idifua ioso mu kuinhi ni kuinhi dia izuua; né kiki, ki nga bhinjika ni kubhinga kúdia kua unguvulu, mukonda ngixi athu iá o ubhika ua a vudila kiá kiavulu, a a bokuesa ue mu uadiama ua tundu kinéne.

¹⁹ Ngi te-phe muẋima, eie u Nzambi iami, tata, u ngi bhange o mbote, ku ima ioso i nga bhange athu iá.