Nehemiia 4 - O Mikanda Ikola

Jinguma a sota kukokolokesa o kutunga imbaka

¹ Anga ki bhita-phe kuila, kia kʼivu Sambalate, kuma etu o kutunga kua kuata muene, u fuluka ni njinda, anga u thathamana kiavulu muene; anga u kuata kuxinga akua Juda.

² Anga u zuela bhu pholo ia phange jê ni ia kilômbo kia masoladi a Samádia, uixi: Kima kiahi kia mu bhanga o asonde a akua Juda iâ? A-nda ku a ehela-ku muene? A-ndu tena muene kusatela? O kikalakalu a-ndu ki zubha mu kizuua kimoxi ngoho? O matadi mʼoha mu túbhia, a-nda balumuka dingi nʼeza ni muenhu ku maxita ma uthôkua?

³ Eme Tobiia, dia mukua Amone ua kexile-nê, uixi: Kiene kimoxi! Ene né edi a tunga se kuiza ngó mukenge, kimbaka kiá kia matadi ki kia-ndu mu bhonza ku ki lundumunʼê.

⁴ Ivua-ze, eie u Nzambi ietu, ki a kuata ku tu tènda, o kulebhula kuâ kua tu lebhula na-ku, ku lundumukine mu mútue uâ, hé u bhangese ene ku di bhanga mbole, mu ixi mu a-nda ku a sumbisa ku ubhika.

⁵ Kikuma kiâ ku ki vungine, o kituxi kiâ ku ki jimune bhu pholo ié, mbata ene a ku kuatesa njinda bhu pholo ia akua kutunga.

⁶ Kienhiki tu kuata kutunga o kimbaka, anga ki takana kiene kioso katé kaxaxi kê; mukonda muẋima ua kifuxi ua bhetamena o kukalakala.

⁷ Anga ki bhita-phe kuma, kia kʼivu Sambalate ni Tobiia, ni akua Alábia, ni akua Amone, ni akua Ajidode, kuila o imbaka ia Jeluzaleme ia suína ni ku i iudika, o misula a mateka ku i xita kiá, a thathamana kiavulu.

⁸ Anga a takana kumoxi mudiʼâ ene oso, phala kuiza mu kúlua ni Jeluzaleme, ni ku a vunza phala ku a jimbisa ku kikanenu kiâ.

⁹ Etu-phe tua sambela Nzambi ietu, anga tu bhaka athu mu ku a langidila, ni mʼusuku ni mu muanha.

¹⁰ Bhenhobho akua Juda, exi: Jingamba ja iokojoka kiá, ni fufutila iene iavulu, etu kimbaka ki tua-ndu tena ku ki tunga.

¹¹ Kuala-phe o jinguma jetu, exi: Ene ka kʼijiia, ka-ndu tena ue ku ki mona, a tukumuka-phe tua bokona kiá muʼaxaxi kâ, anga tu a jibha enhoso, kienhiki kimbaka a lémbua ku ki tunga.

¹² Anga ki bhita-phe kuma, kioso kʼiza akua Juda a kexile muʼaxaxi kâ, a kala jinga mu ku tu tangela-kiu katé mu lukuinhi, exi: Andu tunda mu jisanzala joso jiji ni jiji, kuiza mu kúlua nʼetu.

¹³ Eme-phe anga ngi ta alangidi a suama bhoxi ku dima dia kimbaka ni ku matala bhulu; anga o kifuxi nga a uana-uana mu mabhata-mabhata a maneka ni mikuale iâ, ni ngumba jâ, ni honji jâ.

¹⁴ Eme-he ngixi suíin, o ki nga zubha kutonginina ioso, anga ngi balumuka, hé ngi tangela o jingana, ni afundixi, ni kifuxi kiamukuá; ngixi: Enu kana ku a kuata uoma; mu xinganeka ngó Ngana, muene Langala-ngongo, u kuata uoma, anga mu bhângela phange jenu, ni anʼenu, ni akajʼenu ni jinzo jenu.

¹⁵ Anga ki bhita-phe kuila, kia kijiia o jinguma jetu, kuma etu tua kijiia kiá, ni kuila ndunge jâ Nzambi ua ji muange, etu oso tu vutuka ku kimbaka, muthu bhu kibatu kiê.

¹⁶ Anga ki bhita ue kuila, tunde kiá bhu kizuuʼokio katé ku pholo kunu, ngiia kaxaxi ka minzangala iami a kuata ku kikalakalu, kaxaxi kamukuá a kala ni jingumba bhu maku, ni jingubu, ni jihonji, ni ibhakatu; anga atumini a kala jinga ku dima dia dibhata dioso dia Juda.

¹⁷ Mu kutanga akua kutunga kimbaka, ni jingamba ambata jinga o imbamba, ni akua ku i zangula, ela jinga kala muthu lukuaku lua kuata ku kikalakalu, o luamukuá lua kuata mata a kubhânga na-u.

¹⁸ O jipedelelu akua kutunga eza jinga a maneka kala muthu ni mukuale uê mu mbunda, anga a kuata o kutunga kienhiki; o muxiki a mbungu u kala nʼeme bhu mbandu.

¹⁹ Eme anga ngʼambela jingana, ni makota a jingana, ni kifuxi kiamukuá, ngixi: Enu akuetu, o kikalakalu kiki kionéne, o kiene ue kia lebhelela, o etu-phe tua di te makanga a makota ku kimbaka, tua di songoloka kiavulu mudietu.

²⁰ Bhu kididi bhuoso bhu muivuila mbungu ia xiki, bhene bhu tu di bhongoluela; o Nzambi ietu muene ua kà tu bhângela o mvunda.

²¹ Kienhiki ki tua kuata o kukalakala ku kimbaka; kaxaxi ka athu mudietu a nanga jinga ni jingumba bhu maku tunde bhu kiela o kizuua, tulé mu ngoloxi, ki mateka kutunda o jithéthembua.

²² Mu kithanganʼomo ue ngi tangela o kifuxi, ngixi: Muila jinga o muthu ni munzangala uê, mu kala jinga mu zekela mumu mu Jeluzaleme, sembele mʼusuku uoso mu tu langidila hanji, mu muanha mu kuata ku kikalakalu.

²³ Anga tuila nʼeme, ni jiphange jami, ni minzangala iami, ni mala a kexi ku ngi kaiela ni ku ngi langidila kana muthu u zula kizuatu kiê ku mukutu; o kuia mu teka menha muthu uambata mata mê.