Nehemiia 3 - O Mikanda Ikola

Athu a kalakala mu kutunga kimbaka kia Jeluzaleme

¹ Anga nganga ia dikota, Eiiiasibe u balumuka, ni muene ni phange jê, o jinganga, anga a tunga o Muelu ua Jimbudi, a u lumbila, anga a u ta o mabhitu mê; a lumbila katé ni mbonge ia Meiah, ni mbonge ia kathondo, Hananele.

² Anga akua Jedikó a tunga bhu mbandu ia Eiiiasibe ni akuá; o Zakule, monʼa Imidi, u tunga ue bhu mbandu ia ió.

³ Anʼa Senaha anga a tunga uâ o Muelu ua Mbiji, a uimika miẋi, anga a u ta mabhitu mê ni makumba mê ni milangaji iê.

⁴ Anga Melemote, monʼa Udiia, dia monʼa Kóji, u iudika ue bhu mbandu iâ; anga bhu mbandu iê, Mesulame, monʼa Belekiia, dia monʼa Mesezabele u iudika-bhu ue; anga Zadoke, monʼa Bahana, uiza u iudika ue bhu mbandu iê.

⁵ Anga akua Tekoua a iudika ue bhu mbandu ia akuá enhá; kuiza-ku-phe, ku makota a jingana ja akua Tekoua ku kikalakalu kia Ngana iâ kʼa tele-ku xingu jâ mu ku ki kuatekesa.

⁶ Anga Joiada, monʼa Peseia, ni Mesulame, monʼa Besudiia, a iudika o Muelu Uokulu; a uimika miẋi, anga a u ta o mabhitu mê ni makumba mê ni milangaji iê.

⁷ Anga bhu mbandu iâ eza mu iudika-bhu kuala Melatiia, mukua Ngibeione, ni Jadone, mukua Melone, athu ió akua Ngibeione ni Mispa, a tokalele ku utuminu ua nguvulu ia sámbua dia ngiji ia Ufalate.

⁸ Bhu mbandu iâ ua iudika-bhu Uziiele, monʼa Halaia, umoxi, ku azunzi a ulu; anga Hananiia, monʼa musumbisi a milongo u iudika ue bhu mbandu iê; anga Jeluzaleme a mu tungulula katé bhu Lumbu lua Zanze.

⁹ Anga Lefaia, monʼa Hule, dikota dia kaxaxi ka akua Jeluzaleme, u iudika ue bhu mbandu ia enhó.

¹⁰ Ueza mu iudika bhu mbandu iê Jedaia, monʼa Halumafe, ku pholo ia inzo iê-muène; anga Hatu, monʼa Hasabeneia u iudika ue bhu mbandu iê.

¹¹ Ua iudika kibatu kiamukuá Malkiia, monʼa Hadime, ni Hasube, monʼa Pahate-Mouabhe, a iudika ue mbandu ia mukuá ia lumbu ni kathôndo ka Mbonge ia Majiku.

¹² Anga bhu mbandu iâ Salume, monʼa Loueje, dikota dia kaxaxi kamu kuá ka Jeluzaleme, ni muene ni anʼê a ahatu, ene a iudika-bhu.

¹³ Ueza mu iudika o Muelu ua Dikôlo, Hanune ni akua Zanoua; athu iâ a tunga o muelu, anga a u ta o mabhitu ni makumba mê ni milangaji j iê, anga a tunga ue midi ia kóvado ku kimbaka, hé a suka katé Muelu ua Dixita.

¹⁴ Anga Malkiia, monʼa Lekabe, dikota dia sengu ia Bete-Xeleme, iudika o Muelu ua Dixita; u u tunga, anga u u ta o mabhitu ni makumba mê ni milangaji iê.

¹⁵ Anga Salume, monʼa a Kole-hose, dikota dia sengu ia Mispa, u iudika o Muelu ua Ngunga; u u tunga, anga u u ta o mabhitu ni makumba mê ni milangaji iê hé u iudika ue o kimbaka kia batela ia Sela, bhua zukama ni kadíbhia ka sobha, anga u bhixila muene ku maxita ma kulumuka mu kutunda mu sanzala ia Davidi.

¹⁶ Ua mu kaiela mu kutunga Nehemiia, monʼa Azebuke, dikota dia kaxaxi ka akua Bete-Zule, u bhixila katé ku pholo ia jimbila ja Davidi, uiza bhu Mumba uòkalakale kiambote ku maku, anga u suka ku inzo ia Mazonda.

¹⁷ Muene kia zubha kutunga, akua Levi a mu kaiela enhá: Lehume, monʼa Baní; ua iudika bhu mbándu iê Hasabiia, dikota dia kaxaxi ka akua Keila, mu sengu iê.

¹⁸ A mu kaiela mu kuiudika, o jiphange jê, a a tuamenena kuala Bavai, monʼa Henadade, dikota dia kaxaxi ka mukuá ka akua Keila.

¹⁹ Bhu mbandu iê bhene bhua kalakala Ezele, monʼa Jesuua, dikota dia akua Mixpa, ua iudika kibatu kia mukuá, ku lumbu, bhua lulama ma kubanda bhu inzo ia kubhakela mata ma ita, bhu thungi iê.

²⁰ Mbaluke, monʼa Zabai, anga mu kaiela mu kuiudika ni huii ioso, bhabha dikaẋi diê diengi, kutunda bhu thungi katé ki uia bhu muelu ua inzo ia nganga ia dikota, Eiiiasibe.

²¹ Melemote, monʼa Udiia, dia monʼa Koji, u mu kaiela kuiudika kibatu kiamukuá, kia tundu bhu muelu ua inzo ia Eiiiasibe, hé u suka kua suku o inzo ia Eiiiasibe.

²² A mu kaiela muene mu kuiudika o jinganga ja tungile dinhana dia Njolodá.

²³ A kaiela-ku mu kuiudika Bejamí ni Hasube, ku pholo ia inzo iâ; u a kaiela Azadiia, monʼa Mahaséia, dia monʼa Ananiia, ua iudika ue bhu mbanduʼa inzo iê.

²⁴ Ua mu kaiela mu kuiudika o kibatu kiamukuá, Binui, monʼa Henadade ua tungu tunde ku inzo ia Azadiia katé bhu thungi bhua takanena o kimbaka.

²⁵ Phalale, monʼa Uzai, hé u iudika ku pholo ia thungi, ni mbonge ia matala ia fuomoka ku inzo ia thala ia jisobha, ia xamenena ku lumbu lua kaleia; ua mu kaiela mu kuiudika Pedaia, monʼa Phaloji.

²⁶ Ateki a menha-phe ni aẋangi a jihuinhi ja Tembulu, a kexile mu Ofèle, a kalakala uâ hé a sukila ku pholo ia Muelu ua Menha ni kutunga, ku mbandu ia mutundila-kumbi, anga a zumbukila mbonge ia matala ia di leka.

²⁷ Kua ene, a kaiela-ku mu kuiudika kibatu kiamukuá akua Tekoua, mu kutunda ku pholo ia mbonge ia matala ia di lekʼoio, anga a suka ku kimbaka kia Ofèle.

²⁸ O Jinganga hé a tunda bhu Muelu ua jikabalu ni kuiudika, muthu ni muthu ua tungu ku pholo ia inzo iê.

²⁹ Ua kaiela kua ene mu kuiudika Zadoke, monʼa Imele, ku pholo ia inzo iê; ua mu kaiela Semaia, monʼa Sekaniia, mukua kulanga bhu Muelu ua Thunda ua Tembulu, ua talela ku mutundila-kumbi.

³⁰ A mu kaiela mu kuiudika Hananiia, monʼa Selemiia, ni Hanune, mona ua kasamanu ua Zalafe, ene a iudika kibatu kiamukuá; kua muene Mesulame monʼa Belekiia, ua a kaiela ue mu kuiudika ku pholo bhua lulamena xilu dia ʼnzo iê.

³¹ O Malkiia, monʼa muzunzi a ulu ni phalata, u mu kaiela mu kuiudika ku pholo ia ʼnzo anga u bhixila ku inzo ia ateki a menha ni aẋangi a jihuinhi ni akua kutadika mauenji, bhu kanga dia Muelu ua Mifekade, anga u suka ku xilu bhu thungi.

³² Anga akua kuzunza o ulu ni phalata ni akua kutadika mauenji, a iudika uâ o dikaẋi dia kutunga ku xilu bhu thungi katé bhu Muelu ua Jimbudi.