Nehemiia 2 - O Mikanda Ikola

Artaxexe uehela Nehemiia kuia mu Jeluzaleme mu kutunga o imbaka

¹ Anga ki bhita kuila, ku mbeji ia nisane, ku muvu ua makuinhiʼa iadi, ua sobha Artaxexe, kuma eme ngi bheka vinhu bhu pholo iê, eme anga ngi katula vinhu, anga ngʼi bhana sobha; hanji-phe kienhokio eme kiluua ngi kala ni ku di suuata bhu pholo iê.

² Anga sobha u ngʼambela, uixi: Pholo ié ia di suuatelaʼhi kiki, eie-muène kua mu kata? Kiki ki kima kiengi, dilamba dia muẋima dia ku kuata. Bhenhobho eme anga ngi kala ni uoma uavulu.

³ Anga ngʼambela sobha ngixi: Sobha lola muenhu ué ni ku hádia ni hádia! Abha eme ki ngi di suuata kiebhi o pholo, se o sanzala iala o kidindu kia jimbila ja jitata jami ia senguluka, ni mabhitu mê a mʼoha mu túbhia?

⁴ Anga sobha u ngʼambela, uixi: Kiki phe kima kiahi ki u ngi bhinga; eme bhenhobho ngi sambela Nzambi ia diulu,

⁵ anga ngi tangela sobha, ngixi: Sobha se kiene kia ku uabhela, se o kiandala mubhikʼé ki uabha bhu pholo ié, nga ku bhingi kuila u ngi tumikisa ku Juda, mu sanzala ia jimbila ja jitata jami, nga ka i tunge dingi luamukuá.

⁶ Bhenhobho sobha u ngʼambela, ni Na Mvuale hanji kia xikama bhu mbandu iê, uixi: Njila ié i nanga izuua ikuẋi, kumbi kuii di u vutuka? Anga sobha ki mu uabhela ku ngi tumikisa, kioso ki nga mu tangela o kithangana kia kuvutuka.

⁷ Ngi tangela dingi sobha, ngixi: Sobha, se kia ku uabhela, a ngi bhane mikanda ia jinguvulu ku sámbua dia ngiji, sembele a ngʼehele kuzáuka, katé ki ngi bhixila mu Juda.

⁸ A ngi bhane ne mukanda ua Asafe, o kimbadi ua mu langa o míkáu ia sobha, phala a ngi bhane miẋi ia kuiudika na-iu o mabhitu ma dizemba dia sobha, ni kimbaka kia sanzala, ni ma inzo mu nga kà bokona. Sobha anga u ngi bhana-iu, kala kia ngi xindi o lukuaku lua mbote lua Nzambi lua ngi tudile ku thandu.

⁹ Bhenhobho ngʼeza ku jinguvulu ja sámbua dia ngiji ia Ufalate, anga ngʼa bhana mikanda ia sobha; sobha muene ua tumukisine ue atumini a kifuxi ni makuenze ku jikabalu ejiie kumoxi ni eme phala ku ngi xinjikila.

¹⁰ Sambalate, mukua Holone ni Tobiia, mukua mbele ku Amone, ki a ibhila muene kiavulu kuívua kuila kueza muthu mu kusota mbote ia anʼa Izalaiele.

Nehemiia u suinisa o mundu kutungulula dingi o kimbaka kia budikile

¹¹ Eme anga ngi bhixila mu Jeluzaleme, hé ngi bhanga-mu izuua itatu ni kunhoha.

¹² Anga ngi balumuka mʼusuku, eme ni athu ofele nga kexi-nâ, kana muthu nga mu tetuila kia ngi bhake Nzambi iami ku muẋima ku ki bhanga mu Jeluzaleme; ki nga kexile ue ni kiama kioso-kioso, kiama kikale o kiama ngó, ku nga sambelele, kuabhu!

¹³ Anga ngi tubhuka mʼusuku bhu Muelu ua Dikôlo, ku mbandu kualela o Fixi ia Mudikixi, ni ku Muelu ua Dixita, anga ngi tala imbaka ioso ia Jeluzaleme, ngi mona ia budijika, ni mabhitu mê, ma jikata, a mʼoha mu túbhia.

¹⁴ Anga ngi bhita o Muelu ua Fixi, ni bhu Mumba ua sobha; anga ngi lémbua o kididi bhu bhitila o kabalu ku nga xikama.

¹⁵ Bhenhobho ngi banda ni kuvuua kangiji mʼusuku, ni kutala o kimbaka; anga ngʼaluluka, ngi bokuena dingi bhu Muelu ua dikôlo, anga ngi tunda-ku.

¹⁶ Anga makota ma jingana a kamba kuijiia kuoso nga ile ni kioso ki ngendele mu bhanga-ku; mbata katé kithangʼokio akua Juda, ni jingana, ni makota, ni akua dingi a kexi mu bhanga o kikalakalu, ki ngʼa tangelele luua kima kioso-kioso.

¹⁷ Bhenhobho-phe anga ngʼa tangela kiua, ngixi: Enu mua mono kiambote o uíndua mu tuala, kuma Jeluzaleme ua budijika, ni mabhitu mê ma jikata kuma a mʼoha mu túbhia; ndokuenu-phe tu tunge dingi imbaka ia Jeluzaleme, ki tu xikame kiki mu dilebhu.

¹⁸ Hé nga a jimbuila kiua kia ngi kuatekesele o lukuaku lua henda ia Nzambi iami, nga a tudila ue o maka moso ma sobha, ma ngi tangelele. Kuala ene: Ndokuenu, tu balumuke, phala tu tunge! Anga abhua uoma, hé a kolokotesa maku mâ mu kubhanga kiambote o kikalakalu.

¹⁹ Kia kivu Sambalate, mukua Holone, ni Tobiia, mukua mbele ku Amone, ni Ngeseme, mukua Alábia, a tu mona ulalu anga a tu bhanga kasekelelu, exi: Enu mua mu bhanga kima kiahi? Muandala mu kitukila sobha, kuambe?

²⁰ Bhenhobho nga a kumbulula, ngixi: Nzambi ia diulu muene ua-nda ku tu kuatekesa; etu tu abhikʼê tu balumuka ngoho ni tu tungu; maji enu-phe mu Jeluzaleme kana-mu mbandu ienu, mba undundu, mba kima kiengi kia xa o Makulu.