Nehemiia 13 - O Mikanda Ikola

Nehemiia u buisa-ku oiẋanju. Miji iengi a i tungula mua Izalaiele

¹ Kizuuʼokio hé a tanga mu divulu dia Mozé, ku mátui ma kifuxi kia mundu uoso; anga a sanga kididi muòsoneke kuma akua Amone ni akua Mouabhe ka fuama kubokona dingi mu kionge kia Nzambi.

² Mbata ene ka tundile mu kauidila anʼa Izalaiele ni kúdia ni menha; inda a kasele Balamu kuiza mu ku a bhubhidila; sumbala o kubhubhidila kuê Nzambi ietu ua ku kituile madibesá.

³ Kia bhiti-phe kuma, mu kuívua o kituimu kiki, a tungula athu oso a di fungile mua Izalaiele.

Tobiia a mu kaia mu tembulu ia Ngana

⁴ Katungu kaka kuila kiluua ka bhita, nganga, Eiiiasibe, ua kexi mu tumina mu xilu dia inzo ia Nzambi ietu, ua tele undandu ni Tobiia;

⁵ anga a mu bhangela xilu dionéne, mʼukulu mu a kexi mu bhaka o mibhaku ia mákudia, ni uasu ua dizumba, ni itutu, ni díjimu dia mbandu ja kakuinhi ja jimbundu, ni ia vinhu, ni maji, ima ioso ioio ia tumine kubhana akua Leví, ni jingimba, ni alangidi bhu mielu, kumoxi ue ni ujitu ua kubhuka ua jinganga.

⁶ Kia bhiti-phe ima ioso iii, eme mu Jeluzaleme ki ngʼala-mu; mukonda ku muvu ua makuinhʼatatu nʼiiadi ua Artaxerxe, sobha ia Babilonia, eme ngendele kua sobha muene mu di kunda-nê; o kia bhiti-phe tuizuua, sobha ua ngeha-ke, eme nga vutuka dingi mu Jeluzaleme.

⁷ O ki ngeza mu Jeluzaleme, a ngi tangela o kuiibha kuoso kua bhangele Eiiiasibe mu kubhanga mbote kua Tobiia, kia mu bhangela inzo mu malumbu ma inzo ia Nzambi ietu.

⁸ Ngívua kia ngi ibhila kiavulu, njinda anga i ngi kuata muene; kia ngi bhangesa kuila imbamba ioso ia kexile mʼonzo ia Tobiia nga i texi bhu kanga.

⁹ Anga eme ngi tumina, hé a zelesa o maxilu moso; anga ngi bheka-mu dingi o itatu iangene ia inzo ia Nzambi, ni mibhaku ia mákudia, ni uasu ua dizumba.

Jilevita a a bhana dingi o mbandu iâ ia a fuama

¹⁰ Nga tongolola ue kuma akua Levi ka kexi mu ku a bhana o dikanda dia mbandu iâ ia a tokala ku maujitu; akua Levi ni jingimba akua kuimba, a kexi mu bhanga o kikalakalu, a lengela kala muthu ku ixi iê.

¹¹ Bhenhobho nga zoko ni adikime, ngixi: O inzo ia Nzambi, mua iehelelaʼhi? Eme-phe, eme nga a bhongolola dingi, eme ngʼa vutuila dingi bhu kididi kiâ.

¹² Bhenhobho Juda ioso a bheka o díjimu dia mbandu ia kakuinhi ka jimbundu, ja mavu, ni ka vinhu, ni ka maji, mu itula ia mabhakelu ma tembulu.

¹³ Anga ngi zangula nganga Selemiia, ni musoneki Zadoke, ni Pedaia, uatokala mu akua Leví, hé ngʼa a baka mu kutambula konda ia inganja ni kubhaka o itadi ni mákudia; o kua ene ngi ta-ku Hanane, monʼa Zakule, dia monʼa Mathaniia phala kukala kibese kiâ, mukonda a kexile athu a kidi, akua kitongola; anga a tuika uâ ene o ku uanena o jiphange jâ.

¹⁴ Mukonda dia kiki eie u Nzambi iami, ku ngi jimbe; o mbote jami joso ji nga bhange ku inzo ia Nzambi iami, ni ku kikalakalu kiê, kana ku ji jimuna.

O kuxila kizuua kia Sabhalu

¹⁵ Mu izuuʼomo-phe anga ngi mona athu mu Juda a mu kama vinhu kia sabhalu, ni kubheka ita ia idima ku makundʼa jibulu; a bheka ue vinhu, ni ji-uva ni ji fiku, ni imbamba ia idifua ioso, i a kexi mu kuiza na-iu mu Jeluzaleme mu kizuua kia sabhalu; anga nga a bazela ngixi kiki ki kizuua kia kusumbisa mákudia.

¹⁶ Akua Tilo ue a kexile mu Jeluzaleme, a kala mu bheka jimbiji, ni mauenji moso ma vulu matelu, phala ku a sumbisa anʼa Juda, ni mu Jeluzaleme, mu kizuua kia sabhalu.

¹⁷ Anga ngi zoka ni makotʼa jinganga mu Juda, nga a tangela, ngixi; Muala kubhangelaʼhi o ilulu iii, hé mu kuata kutumbulula o kizuua kia sabhalu?

¹⁸ Abha, manhi ki kiene ue kia bhangele kiá o jitata jenu, anga o Nzambi ietu u bheka uíndua uoso iú ku thandu dietu ni ku thandu dia sanzala iii? Enu anga mu bandekeza-ku dingi mu kualala kua njinda iê ia kuatela Izalaiele, mukonda dia kutumbulula o sabhalu?

¹⁹ Anga ki bhita-phe kuma, o mabhitu ma Jeluzaleme kia bhana kiá o kilembeketa, kuila o sabhalu kiluua i bhixila, ngi tuma o kujika mabhitu; anga ngi tumina kuila ka ma jikule katé sabhalu ia bhiti; anga ngi ta o minzangala iami imoxi-mu bhu mielu, mbé kuila kana kimbamba kioso-kioso ki bokona mu kizuua kia sabhalu.

²⁰ Bhenhobho-phe akua kuta uenji ni abadi a ima ioso-ioso a zekela kiá usuku ku kanga dia Jeluzaleme, lumoxi mba luuadi kiá muene.

²¹ Nga a bazela-phe, eme ngʼa tangela, ngixi: Muala kubhitilaʼhi o usuku ku kanga dia kimbaka? Se mu ki bhanga dingi luamukuá, nga-ndu tuma ku mi kuika. Tunde kithanganʼokio ni ku pholo kunu, a batuka kuiza mu sabhalu.

²² Akua Leví ue nga a tangela ngixi mu di zelesa, anga muiza, mu langidile bhu mielu, nda mu kôlese o sabhalu. (Mu kiki ue eie, u Nzambi, iami, ngi te muẋima; anga u ngi loloka kala kiavulu o henda ié.)

O kusakana kua kudibunda ngó ni athu engi, kana!

²³ Anga ngi mona ue mu izuuʼomo, kuma akua Juda a sakanene ni ahatu a akua Asdode, ni akua Amone, ni akua Mouabhe.

²⁴ O anʼâ anga a kala mu zuela mbandu ia Asdode, mukonda ka tenene kuzuela dimi dia Juda, a zuela ngó o dimi dia kifuxi kiâ.

²⁵ Anga ngi zoka-nâ, hé ngʼa bhubhidila, ni ku a ta mázui, amoxi mudiʼâ ngʼa beta muene, ni ku a vuza o jindemba, anga ngʼa lokesa mu dijina dia Nzambi ngixi: Kana kubhana dingi anʼenu ahatu ku anʼâ a mala, ni enu ue ki mu sakane dingi o anʼâ ahatu, né ku abhenga phala anʼenu mba phala enu muene.

²⁶ Manhi o Solomá, o sobha ia Izalaiele, mu kusakana kuenhuku ki muene mua tele kituxi, suke muʼaxaxe ka ifuẋi ia athu avulu kana-mu sobha ia di fuile-nê, ni mu ku mu zola kuala Nzambi iê, ni mu ku mu bhanga kukala sobha ia Izalaiele ioso kuala Nzambi? Ku thandu diê-phe anga ahatu a akua matumbu a mu tesa kituxi.

²⁷ Etu anga tu mi bhana mátui mu ku mívua enu, phala kubhanga o kilulu kia kuiibha kuoso kuavulu kiki, anga Nzambi ietu ni tu mu bhukumukina, mu kusakana ni ahatu a akua matumbu atokala jixi jengi?

²⁸ Monʼumoxi ue ua Joiada, monʼa Eiiiasibe, o nganga ia dikota, ua kexile holomʼia Sambalate, dia mukua Hole, kia ngi bhingi ue nga mu kaiesa bhu mbandu iami.

²⁹ Enhá ku a jimbe, Nzambi iami, mbata o unganga a u xidisa, ni kikutu ue kia unganga a ki zange, o kikutu kiangene kia akua Leví.

Nehemiia u ta dingi o ima mu ididi iê

³⁰ Kienhiki kiene ki nga zelesa o mundu ku akua matumbu oso, anga ngi uana o jinganga mu ibuka, ngi londekeza o ima ia fuama o jinganga kubhanga ni ia akua Leví, kala muthu ku kikalakalu kiê;

³¹ kiene ue kimoxi ki nga bhange ni akua maujitu ma jihuinhi mu ithangana ia tokala, ni maujitu ma ima ioso ia kutomona. Eie-phe, Nzambi iami, ngi te jinge o muẋima, mbé ku ngi kale ue o mbote iami.