Nehemiia 12 - O Mikanda Ikola

O Jinganga jʼejile mù Jeluzaleme ni Zolobabele

¹ Jiji jene o jinganga ni akua Leví a bandele ni Zolobabele, monʼa Salatiiele, ni Jesuua: Selaia, Jelemiia, Ejidala,

² Amadiia, Maluke, Hatu,

³ Sekaniia, Lehune, Melemote,

⁴ Ido, Jinetoi, Abiia,

⁵ Miiamine, Mahadiia, Bileka,

⁶ Semaia, ni Joiadibe, Jedaia,

⁷ Salu, Amoke, Hilikiia, ni Jedaia; mala iá ene a kexi mu tumina jinganga ni akuá, o jiphange jâ, mu izuua ia Jesuua.

⁸ Akua Leví ue, akexile: Jesuua, Binui, Kadimiiele, Selebiia, Juda, Mataniia, enhá ene ni jiphange jâ a kexi mu tuamena o mimbu ia akua kuximana ni kuimba.

⁹ Anga o Bakibúkia ni Uni, o jiphange jâ, hé a kala ku pholo iâ, mu kulangidila ni kuditambuijila mu kuimba.

¹⁰ Anga Jesuua u vuala Joiakime, o Joiakime u vuala Eiiiasibe, Eiiiasibe u vuala Joiada,

¹¹ o Joiada u vuala Jonata, Jonata u vuala Jaduua.

¹² A kexe jinganga, mu izuua ia Jouakime o ituamenu mu mabhata ma jitata jâ, enhá: Mu bhata dia Selaia, Melaia, dia Jelemiia, Hananiia;

¹³ dia Ejidala, Mesulame, dia Amadiia, Nzuanane;

¹⁴ dia Meliku, Jonata; dia Sebaniia, Zuze;

¹⁵ dia Hadime, Adina; dia Melaiote, Hele-kai;

¹⁶ dia Ido, Zakadiia; dia Jinetone, Mesulame;

¹⁷ dia Abiia, Zikidi; dia Miiamine, ni dia Mouadiia, Pilitai;

¹⁸ dia Bileka, Samuua; dia Semaia, Jonata;

¹⁹ dia Joiadibe, Mathenai; dia Jedaia, Ezzi;

²⁰ dia Salaia, Kalai; dia Amoke, Ebele;

²¹ dia Milikiia, Hasabiia; dia Jedaia, Natanaiele.

²² Ku kua Leví mu izuua ia Eiiiasibe, a a sonekene kuma ene atumini mu mabhata ma jitata jâ, enhá: Joiada, ni Nzuanane, ni Jaduua, há a kala uâ jinganga, katé mu utuminu ua Dario, dia mukua Pélesa.

²³ Anʼa Levi a a soneka jinga mu divulu dia malunda, katé mu izuua ia Nzuanane monʼa Eiiiasibe.

²⁴ A kexi-phe atumini mu akua Leví enhá: Hasabiia, Selabiia, ni Jesuua, monʼa Kadimiiele; anga o jiphange jâ a kala ku pholo iâ mu kuimba o diximanu ni kusakidila, kala kia tumine Davidi, o muthu ua Nzambi; anga a kala mu kudibhinganesa ni kuditambuijila mu kuimba.

²⁵ Mathaniia, ni Bakibúkia, Obadiia, Mesulame, Talamone, ni Akube, ene alangidi bhu mielu, a kexi mu langidila bhu mielu ia maxilu mu a kexi mu bhakela o jimbongo ja inzo ia Jihova.

²⁶ Mu izuua ia Joiakime, monʼa Jesuua, dia monʼa Jozadake, mala iá ene a kexile-ku; ene ue a kexile-ku mu izuua ia Nehemiia, dia nguvulu, ni mu izuua ia nganga Ejidala, dia musoneki.

O Kulumbila imbaka

²⁷ O mu kulumbila imbaka anga a sota akua Levi a kexile mu ididi ioso, nda eze-nâ mu kulumbila o imbaka ni kusanguluka, ni kuximana, ni kuimba, ni kuxika tungoma, ni tukoxi, ni jimbánza.

²⁸ Anga a bhongolola anʼa jingimba oso, kixi a kexile mu dinhana dia zukama ni jimbandu joso ja Jeluzaleme, kala ió atungile mu tusanzala tua Netofati;

²⁹ A bhongolola ue akua bhata dia Jidingale, ni akua matutu ku mikáu ia Jibeia, ni akua Azemavete; mbata o jingimba a di tungidile ku jisengo jâ hé aditungidila mu jimbandu ja Jeluzaleme.

³⁰ O Jinganga ue, ni akua Leví, anga a di zelesa; anga a zelesa ue o kifuxi, ni mabhitu, ni kimbaka.

³¹ Bhenhobho nga sambelesa o ilamba ia Juda ku thandu dia kimbaka, anga ngi bhanga ibuka iiadi ia makota ia jingimba, o ibuka iendela ku munôno, kimoxi ku lukuaku lua kúdia ku thandu dia kimbaka, ku mbandu ia muelu ua Dixita.

³² Anga Hosaia muene ua kexi mu-ia ni ku a kaiela kuema diâ, ni kaxaxi ka ilamba ia Juda kumoxi,

³³ ni Azadiia, ni Ejidala, ni Mesulame,

³⁴ ni Juda, ni Bejamí, ni Semaia, ni Jelemiia;

³⁵ o ku anʼa jinganga, ni jikoloneta jala na-ju: Zakadiia, monʼa Jonata, dia monʼa Semaia, monʼa Mathaniia, monʼa Mikaia, monʼa Zakule, monʼa Asafo,

³⁶ ni jiphange jâ, à Semaia, ni Azalaiele, Milalaia, Jilalai, Mahai, Netanaiele, ni Juda, ni Hanani, ni ima ia kuxikila o mimbu ia Davidi, o muthu ua Nzambi; anga o musoneki Ejidala u tuamenena ku pholo iâ.

³⁷ Muene kia tuamenena kienhiki, mu kubhiẋila bhu Muelu ua Ndunga, a banda ku maxikata ma sanzala ia Davidi mu kubanda ku mulundu, bhua kanduka o lumbu, mbé kutulukila ku inzo ia Davidi, katé bhu Muelu ua Menha, ku mbandu ia thunda.

³⁸ Anga o kibuka kia jingimba ja kaiadi kia di tela ku lukuaku lua kiasu, atuamenena ku pholo, nʼeme nga mu a kaiela ku dima diâ; anga kaxaxi ka kifuxi a kala mu kuendela ku thandu dia kimbaka, kutunda bhu Kathôndo ka Majiku katé ku Kimbaka kia Zanze;

³⁹ anga a bhita bhu Muelu ua Ifalaiéme, a bhita bhu Muelu Uôkulu, a bhita bhu Muelu ua Mbiji ni bhu kathôndo ka Menha, hé a bhixila bhu Muelu ua Ibhaku; anga eza emana bhu Muelu ua Kaleia.

⁴⁰ Bhenhobho o ibuka iene kiiadi kiâ ia jingimba eza anga emana mʼonzo ia Nzambi; eme uami, ni kaxaxi ka makota a jitata tuimana.

⁴¹ Ni jinganga Eliiakime, ni Mahaseia, ni Miniamine, ni Mikaia, ni Eliohuenai, ni Zakadiia, ni Hananiia, a mu-ia ni jikoloneta.

⁴² Kumoxi ni Mahaseia ue, ni Semaia, ni Eleiazale, ni Uzi, ni Nzuanane, ni Malkiia, ni Elame, ni Ezele. O jingimba anga evisa o dízui diâ a kala mu kuimba, kumoxi ni Jezelahia, kituamenu kiâ.

⁴³ Mu kizuuʼokio anga a bhakula jisata ja makota, hé a kala ni kusanguluka; mukonda Nzambi ua a sangulukisile ni kusanguluka kua ndumba; katé ni ahatu ni anandenge a sanguluka, kia bhangesa kuila o kusanguluka kua Jeluzaleme a kuívua katé ni ku makanga.

O Ukunji ua Tembulu, Ni Kubhana O Lubhaku lua Ngana

⁴⁴ Mu kizuua kiene kimoxi anga a xinda ue athu a tumina mu maxilu a kutambuila o itadi, ni maujitu ma kubhuka, ni ibundu ia kutomona, ni mbandu ja kakuinhi, nda a i bongoluele mu maxilu muenhomo i tunda ku mikáu ku mábhia, ni jisanzala ku bhata, mbé o mákudia ma jinganga ni ma akua Levi, mu jimbambe jê, kala kia ma xindi kitumu; mukonda Juda ua sangulukile mu kumona dingi bhu ididi iê o jinganga ni akua Levi a kexi mu kalakalamu.

⁴⁵ Anga a kala mu bhanga o kikalakalu kia Nzambi iâ, ni kia ku di zelesa; kiene ue kimoxi ku jingimba ni alangidi bhu mielu, akala mu bhanga o kikalakalu kiâ kala kia tumine Davidi ni monê Salomá.

⁴⁶ Mukonda tunde kiá mu xahulu, mu izuua ia Davidi, ni ia Asafo, kua kexile jinge atumini a jingimba, ni mimbu ia kuximana, ni kusakidila Nzambi.

⁴⁷ Kia bhekela kuma Izalaiele ioso, kumatekena kiá mu izuua ia Zolobabele, ni mu izuua ia Nehemiia, a kala mu kubhana o kúdia kua jingimba ni kua alangidi bhu mielu kizuua ni kizuua o muthu bhu kithangana kiê; anga a kala mu lumbila o mákudia ma akua Leví, o akua Leví a lumbila o kudia kua anʼa Alá.