Nehemiia 1 - O Mikanda Ikola

Nehemiia mu kuijiia o kikexilu kia kutata kua Jeluzaleme, u sambela Nzambi

¹ Maka ma Nehemiia, monʼa Hakaliia. Anga ki bhita bhu mbeji ia kijileu, ku muvu ua makuinhiʼa iadi, eme kioso ki ngala mu mbonge ia Suzane,

² kuma phangʼiami umoxi, Hanani uiza, ni muene ni akuá a tundunâ mu Juda; anga eme nga ebhula o jijudé ja subhukile, a xalele kuiza ku ubhika, ni kikexilu kia Jeluzaleme.

³ Anga ene a ngi tangela, exi; A xala koko, ku sengu, a kambele kuiza ku ubhika, ala mu hadi iavulu ni dilebhu; o kimbaka kia Jeluzaleme a ki bulu, o mabhitu mê a mʼoha mu túbhia.

⁴ Anga ki bhita kuma, eme mu kuívua o maka iá, nga xikama hanji anga ngi dila, anga ngi bhita izuua muene ni dilamba; anga ngi kuata kujila ni kusamba bhu pholo ia Nzambi ia diulu.

⁵ Ngixi; Ngana tata, u Nzambi ia diulu, Nzambi ia dikota, u kuatesa uoma! Uene mu bhaka o kikutu ni kulendukila ió oso a kuzola anga a bhaka o ijila ié;

⁶ jikula-phe, Ngana, o mátui mé, ni mesu mé ma jikuke, mu kuívua o musambu ua mubhikʼé, u nga mu samba lelu bhu pholo ié, mʼusuku ni mu muanha, mu diondela abhikê, o anʼa Izalaiele; ni ku diẋikina kutukulula kokué o ituxi ia anʼa Izalaiele, i tua ku tela eie; mukonda eme uami ni dibhata dia tatʼetu ituxi tua i te.

⁷ Tua ku bhangela ima ia bolo muene kinéne, ni ijila ié ki tua i kuata; ni itumu ié, ni jiphangu ja mabatuilu mé, ji ua tumine kua ngunza ié Mozé, ki tu ji aiuka.

⁸ Xinganeka-phe o kizuelu ki ua tumine kua ngunza ié Mozé, uixi; Enu se mua kà xibhaka, eme ue nga kà mi muangena mu madiembu.

⁹ Maji se enu mua kà diela anga mua kà biluka ko kuami, anga mu bhaka o ijila iami, ni ku i bhanga, eme bhenhobho, né hanji jihutile jenu ja kà kala kua suku o diulu, kueneʼoko nga kà a bhongolola anga ngiza-nâ bhu kididi ki nga solo phala kubhanga-bhu nangu dia dijina diami.

¹⁰ Athu iá-phe ene hanji abhikʼé, ni kifuxi kié ki ua kula mu kutena kué ni lukuaku lué lua nguzu.

¹¹ Ngana, tata, mátui mé-phe, ma jikukile o musambu ua mubhikʼé, kumoxi ni musambu ua abhikʼé ala kuinda kuxila o dijina dié; mubhikʼé, lelu, anga u mu zediuisa, nʼu mu bhana o kiadi bhu pholo ia muthu iú. Bhenhobho-phe eme ngala ngi mukuati a nganza ia sobha.