Ndongixi 9 - O Mikanda Ikola

Mungongo ima iene imoxi i bhita ku athu oso ni ua iuka ni mukua mangonha. Tua fuama kudila o muenhu ni jimbote joso ja tu bhana Nzambi. Kuma o jimbote joso ja tu bhana Nzambi, tua fuama ku ji dia muene

¹ Ima ioso ienhiʼii nga i lungujula kiavulu ni muẋima uami, phala i ngi tongolokele muene kiambote: Kuila o athu a iuka ni jinjimu, o ikalakalu iâ iala bhu maku a Nzambi; ni kuila ue o muthu kejiia ioso iala ku mu kinga, mba ukamba mba unguma, manhí. Ima iene ioso ia hádia a mu suekela-iu ku mesu mê.

² Mu ngongo ima ioso iene imoxi i bhita ku athuʼoso: O ki bhita ku muthu ua iuka, kiene ue ki bhitʼé ku muthu ua ibha; o ki bhita ku muthu uambote ni kua iú ua zele o muẋima, kiene ue ki bhitʼé kua iú ua xidi o muẋima; ki kala iú u bhana o jisata, uixi iú ka bhakula sata; ku tale iú ka xikina ku ta ituxi, uixi iú u ta ituxi; ku tale iú ka xikina kuloka uixi iú mukua kuloka.

³ Kienhiki kiene o kima kia iibha ku ima ioso iene mu ku bhanga Kulu-dia-Mundu; kuila athu oso ima i a bhita kumoxi; kuila ue o muẋima ua anʼathu uezala ufusa; o ku muẋima uâ ni ku muenhu uâ kuala ngó kutulumba ni kubhanga kiaiibha, hádia hé aia kiua muʼalunga.

⁴ Tala-phe, kuila o muthu kioso kia kala hanji muʼaxaxe ka athu a muenhu, sai-ku kia kudielela. Kuma, kota o ímbua iala ni muenhu, kuindi o hoji ia fu kiá.

⁵ Kuma ió oso ala ni muenhu ejiia kuila a-nda kúfua, maji o ió afu kiá kʼejiia dingi kima kioso-kioso; né ue kisakidilu kia kima, ene kala nakiu dingi; kuma o dixinganekenu diâ, athu a di bhakuila ue kiá o kijimba.

⁶ Katé ue ni henda iâ, ni kizembu kiâ, ni luimbi luâ, ima ioso ienhiʼii ia kexe na-iu ia jimbila ue kiá; o ku mivu iii ene kala-ku dingi ni mbandu iâ ku ima ioso i bhanga athu Kulu-dia-Mundu.

⁷ Kala kiki-phe, ndé kà die o kúdia kué ni kusanguluka, o vinhu ié nuá-iu muene ni muẋima ua mbote, kuma ikalakalu ié Nzambi ia mu uabhela.

⁸ O izuatu ié izele jinge mu thembu joso, o mu mútue ué nuka mu kamba maji ma dizumba di nuha kiambote.

⁹ Kemba jinga ni muhatu ua kazola ké, mu izuua ioso ia muenhu ué, o izuua ia ku bhana Nzambi Kulu-dia-Mundu, o izuua ioso ia maukumbu mé; mukonda ienhiʼii iene o mbandu ié ia ku tokala ku muenhu iú, ni mu ikalakalu ié ioso i ua bhange Kulu-dia-Mundu.

¹⁰ Kioso kia kuiza bhu maku phala ku ki bhanga, bhanga-kiu muene katé bhuoso bhua suku o nguzu ié, mukonda o mu mbila mu ua-nda kuia, kana-mu dingi kikalakalu, mba ufunu, mba uhete, mba kuijiia kuoso-kuoso.

¹¹ O ki nga lunguluka, nga mono ku mundu kuila o lusolo ki lua ió ngó a bhebhuluka, mba o mazonda ene ngoho a tolola o ita, né ue o kúdia ki phala ngoho oso ejiia, mba o jinjimu ene ngoho a mona o umvuama, mba oso a xitunuka mu thulu ene ngó a bonga o ujitu, maji o ibatu ni jithembu ja tokala ene oso mu uzediuilu ua muthu ni muthu.

¹² Ni kuila ue o muthu kʼejiia o thembu iê; mukua ni jimbiji kia ji tamba ni uanda ua usuéia, kala o jinjila ki ji fua bhu mubhetu, kiene ue ki fua o anʼathu mu jithembu ja bhônzo, kioso muʼanzanzʼumu ki ji a tukumuisa ku thandu diâ.

Sai ni bhabha o kuijiia ku beta o kubhandulula athu engi, eie-muene uala na-ku ndenge

¹³ Nga mono ue ku mundu kiuila, o kuijiia kima kia dikota.

¹⁴ Kuma, kua kexile sanzala iòfele, mua kexile ue athu òfele ngó; anga kuiza sobha ia dikota mu kúlua na-iu, u i konda, u i xitila ni imbaka ia makota;

¹⁵ O muenhomo-phe mua tungule o ngijiue ia ngadiama, ua bhulula o sanzala ni kuijiia kuê. Sumbala o mukuetu muenhó kana-bhu ngó muthu ua kexi mu ku mu xinganeka.

¹⁶ Bhenhobho nga kiambe muene, ngixi: O unjimu kota o nguzu ndenge; sumbala o unjimu ua ngadiama ka u suuile, o maka mê ka mʼevua jinga.

¹⁷ O maka ma jinjimu-ze a fuama kua evua ni kilunji kia batama, kana o mikolekole ia muthu uala mu kutumina o maiôua.

¹⁸ Kuma o unjimu kota, o mata a ita ndenge; maji o mukua ituxi umoxi ngó u zanga ndumba dia jimbote.