Ndongixi 8 - O Mikanda Ikola

¹ Nanhi u soka ni njimu? Nanhi muene u soka ni ió uejiia? Nanhi uejiia kioso kia jimbulula o ima? O muthu uejiia ni pholo iê i lelama, o ku kolokota kua kikonda kia pholo ié, ku lunguluka muene.

O Ku beleselela Sobha

² Eme ngi kuʼambela: O kijila kia sobha aluka-kiu, bhanga kienhókio mukonda dia mulôko u ua lokela Nzambi.

³ Bhu pholo iê ku lenguluke ku sondoloka-bhu, mba eie u jiza mu kima kia mu ibhila, kuma muene u bhanga kioso kiandala.

⁴ Mbata o kizuelu kia sobha kiala ni nguzu; nanhi ua-nda ku muʼila: Ihi, i u bhangʼoio?

⁵ Uoso-phe uaiuka ijila, kene mu bonga malebhu; o muẋima ua njimu uejiia kioso kia i aiuka ni kithangana kiê.

⁶ Kuma ima ioso iala ni kithangana kiê kia ku i bhanga, ni kikexilu kiê mukonda o ima i bhanga kia ibha ku muthu mu ngongʼumu, ia vulu muene ku thandu diê.

⁷ Mukonda kejiia kioso ki a-nda ku mu bhita; o kioso ue ki kia-nda ku mu bhita, nanhi muene ua kà muʼijidisa na-kiu?

⁸ Kana-ku muthu u tena ku tumina o muenhu uê kuila u kole, anga u tena muene ku u kondeka; mba bhu kala muthu u tumina o kizuua kiê kia kúfua; o mvunda ia kalunga ki iala ni mata a kubhânga na-u; o kisuéia ue u bhanga phulu, phulu iê ki i tena ku mu bhulula.

O mukua Phulu ni Muthu uaiuka

⁹ Ima ioso ienhiʼii nga i mono kioso ki nga te o muẋima uami mu ku tongolola o ima ioso iene mu kubhanga athu mu ngongo; kuma sai ni kithangana, muthu u kala mu kutumina mukuá phala ngó ku mu sengulula.

¹⁰ Nga mono ue akua phulu ku a funda mu jimbila ni kutululuka, anga bhu kala muene ni muthu uia bhu mbila jâ; maji o ió a bhanga jinga o jimbote mu mbonge, a tunda jinga bhu kididi kia kuiuka, ki bhuala ngó muthu ua a lembalala; kidi muene, imiʼii ue kingoho kiene.

¹¹ Mukonda dia kuila o ibhangelu ioso ia ibha ka mu i fundisila-bhu kiá kindala, kiene kia bhangesa kuila o muẋima ua anʼathu ua lunguʼé kiá ngoho mu kubhanga kia iibha.

¹² O mukua ituxi némbe o kuiibha u ku bhanga mu luhama, anga o izuua iê i vula muene, hanji kima kimoxi ki ngejiia mu kidi, kuila ió oso a xila Nzambi ene a zediua, oso muene kiá a kala ni uoma bhu pholo iê.

¹³ Maji o mukua phulu u lémbua ku kala kiambote, o muene ue o izuua iê ki ia-nda ku vula; uila ngó kala kizúzumbia, mukonda ua lémbua o ku kala ni uoma ua Nzambi.

¹⁴ Maji mu ngongo muala dingi ima ia mukuá ia ukumbu iene ku bhanga-mu: O kuila sai ni athu a iuka a bhita ni ima ia fuama o ibhangelu ia athu a ibha. Sai ni iá aiibha a bhita ni ima ia fuama o ibhangelu ia athu a iuka. Ngi ki amba muene kuila, o kienhiki ue ukumbu ngoho.

¹⁵ Anga o kusanguluka ngi ku tula ditala dia di leka, mukonda kulu-dia-mundu kana-ku kima kia beta o kuiuka phala o muthu, kala o kúdia ni kúnua ni kutumbujuka ni ngalasa; mukonda ima ienhiʼii i mu kaiela mu ikalakalu iê ioso, mu izuua ioso ia muenhu uê, ia mu bhana Nzambi bhoxiʼaʼkumbi.

¹⁶ O kioso ki nga te o muẋima uami mu kutongolola o kuijiia, ni ku tala kioso ki kala o ibhangelu iala mu ngongo, (mbata ku mundu ni mu muanha ni mu usuku o muthu kene dingi ni kilu mu mesu mê),

¹⁷ kiene ki nga mono o ibhangelu ioso ia Nzambi, eme nga tale kuila o ibhangelu ioso bhoxiʼabha muthu ka tena ku i tongolola; né-mbe o muthu u kalakala muene kia vulu phala o ku ijiia, né ngó, ka tena ku i tongolola; o njimu né uila uixi ngi sota ku ijiia, ki kiene ue ki mu bhekesa o ku ijiia.