Ndongixi 7 - O Mikanda Ikola

O kutala hadi, o muanu, o kuximbakata

¹ Kota o kufumana kiambote ni uthu, kuindi unguendu ua uabha o dizumba; o kizuua ue kia kúfua kota, o kia kuvuala muthu ndenge.

² O kuia mʼonzo ia thambi kota, kuindi mʼonzo muala o fesa; mukonda o momo athu muene mua muena o dizubhilu diâ; athuʼoso a muenhu a ki ta muene ku miẋima iâ.

³ O dilamba kota jingolela ndenge, mukonda o pholo kioso ki i luuala, o muẋima u kala dingi kiengi.

⁴ Kienhiki o muẋima ua njimu uala mʼonzo ia thambi, o kiôua-phe muẋima uê u kala mʼonzo muala kusanguluka.

⁵ O kuívua ue kioso o njimu ki ia mu bazela, kota; kuindi o mimbu ia maióua.

⁶ Mukonda o kuolela kua kiôua, kua soko ni minha ki iia ni kubaza bhu jiku bhuala ímbia. Ienʼiii ue ukumbu ngoho!

⁷ Ni kidi kiene, o muthu ku mu bhikisa, ki bhekesa malaji katé ni ku jinjimu, maji o kutambula nduta kuzanga o muẋima moxi.

⁸ O ku mona disukilu dia ima kota, kuindi dimatekenu diê; kota ue o muthu uambote, kana ió ua di zangeleka o muẋima.

⁹ Kana kulenguluka ku kala ni njinda mu muenhu ué, kuma o njinda ia tunga bhu homba ia maióua.

¹⁰ Nuka u tanga, uixi: O izuua ia ukulu, ia beteleleʼhi o kuuabha, o iii ndenge? Mukonda o muthu uala ni kuijiia, nuka ebhula kiókio.

¹¹ O kuijiia kua soko ni undundu mu kuuabha; oso ala ni muenhu, a-lu mona o dikumbi, a katula-ku muene kima.

¹² Mukonda o kuijiia ku vungina o muthu kala kilembeketa, mukuâ ni kitadi ue, ki vungina kala kilembeketa; maji o kuijiia kua tundu dingi, kuma ku bhana muenhu kua uoso uala na-ku.

¹³ Tongolola kiambote o kikalakalu kia Nzambi, u mone; nanhi u tena kuiukisa kiókio kia bhange muene ni kubhengalala?

¹⁴ Mu izuua ia diláu, enda ni kúdia ku mbote i uala na-iu, o mu izuua ia uíndua-phe, ximbakata; kuma Nzambi muene ua bhange o mbote ni kuiibha, phala o muthu a lémbue kumona ioso ia-nda ku mu bhingana ku pholo.

¹⁵ Ima iosuʼiii nga i mono mu kithangana kia izuua ia muenhu uami: kuila sai-ku muthu ua iuka, o kuiuka kuê ku mu dia anga u fuila mu kuiuka kué, ni muthu ua ibha u laia muene izuua ia vulu mu ku ibha kuê, sumbala muene uaiibha kidi.

¹⁶ Eie-phe ku kale u muthu uambote kinéne, mba o unjimu u u vudisa ue kinéne; kuma u di buikixilaʼhi é muene?

¹⁷ Ku kale ue u mukua phulu kinéne, mba u dianguka; kuma u filaʼhi ngoho, o thembu ié kiluua i bhixila?

¹⁸ Kota o kubhaka kiki, o kiene ue ku katule-ku o muẋima ué, kuila: Uoso u kala ni uoma ua Nzambi kala kia fuama, muene muthu u bhuluka ku ima ioso iii.

¹⁹ O unjimu u beta kubhana o kusuína ku njimu, kuinhi dia nguvulu jʼejidila kúlua ita ji kala mu mbonge imoxi, ndenge.

²⁰ Kidi bá! Mu ngongo kana-mu muthu ua iuka, u bhanga ngó mbote mu mbote anga u kamba ku ta kituxi.

²¹ Muẋima ué kana ku u ta mu kuividila ngó ioso i zuela athu, phala ki ki ku bhite o kuividila mubhikʼé ua mu kuâmba.

²² Mukonda eie-muène ue, ua kʼijiia ku muẋima ué, kuila luavulu kiá lu uâmbe ue akuenu.

²³ Ima iosuʼiii nga i tongolola ni unjimu ni kuijiia; eme ngʼedi ngixi: Hádia ngiza kuijiia; manhi-phe o kuijiia kuene hanji kua ngi kala dikanga.

²⁴ O kima kia kexile-ku kiá, kiai muene dikanga, nanhi dingi u tena o ku ki sanga? O kia zongo ue, kia zongo muene, nanhi u tena ku ki tongolola?

²⁵ Anga ngi lunguluka dingi, hé ngi sola ni muẋima uami o kuijiia, ni kutongolola, ni kusota o unjimu, ni kilunji, ni kuijiia o kudianguka kua kubhanga ia iibha, ni ulaji ua kutulumba, eme nga mono kuila o kubhanga kiaiibha ulaji uene, o kubela uôua.

²⁶ Eme nga bongo-mo kima kia beta o kulula kúfua ndenge; kienhiki: O muhatu uedi, o muẋima uê ua di bhange kala uanda ni mabhebhe, o maku mê edi kala mikolo ia kabhila. Uoso ngó ua iuka bhu pholo ia Nzambi, muene ngó ua kà bhulaka kokuê, maji o ió uejidila kiá o ituxi, a kà mu kuta kuala muhatu muenhó,

²⁷ Mutudi-a-makaphe, uixi: Talenu kunu, nga sange kiki: Mu kusokesa o kima ni kia mukuá, phala kumona o diba dia kulúnga.

²⁸ Talenu o diba dia mu sota hanji o muenhu uami, maji nga lémbua o ku di sanga: kuila mu midi ia mala, nga sange-mu iala dimoxi ngó, maji o muhetu umoxi ngó mu akuá oso, nga lémbua ku mu sangamu.

²⁹ Talenu-phe, kuma o ki nga bongo ngoho mu kusota kuami, kiki: Kuila o Nzambi, muthu ua mu bhange ni kuiuka, maji o muene-phe ua di funhina ndumba dia ima iaiibha.