Ndongixi 6 - O Mikanda Ikola

¹ Sai kima kia ibha ki ngene mu kumona Kulu-dia—Mundu, kiene kia vudila mu kaẋi ka anʼathu:

² o muthu a mu bhana o itadi ni jimbongo ni ujitu kuala Ngana Nzambi, kana-ku kima kia mu kambe ku ioso iendi o muenhu uê, maji o Nzambi anga u fula o ku mu bhana o kutena kua kudia-ku, inda kuizʼê muthu uengi muene ngó u mu diê-ju jene joso; auá, kienhiki ue ukumbu ngó u katesa kinéne ku muẋima.

³ Kuma se bhu kala muthu u vuala hama ia mona, anga u laia muene ndumba ia mivu, o izuua ia muenhu uê hé i vula muene, maji o mbote ku muenhu uê ua lémbua ku i dia, o ku thandu dia kiki kafunduʼê muthu; ngi mi tangela kidi kuila o kisèlu kiala kota, o muenhó ndenge.

⁴ Mukonda ua didi ngó kuiza, hádia u vutukila mua vundu, o kitombe kia-nda kuvungina muene o dijina diê.

⁵ O ió-phe uoso kiluua a mona dikumbi mba u dʼijiia, ua betʼé kota mu kunhoha, o muenhú ndenge.

⁶ Kuma né Kulu-dia-Mundu ua bhange-ku midi ia mivu mu luiadi lua muvimba, maji ua lémbua o kukemba ni mbote iê mba kudia-ku, manhi ene oso, kanda kuia kididi kimoxi?

⁷ Muthu o kikalakalu kiê kioso kia kalakala, u kalakalela o dikanu diê, maji o luimbi lua muthu-phe ki luene mbambe.

⁸ Mukonda-phe, kima kiahi kia beta kota kiala na-kiu o njimu kiôua nʼa kale ndenge? Mba o ngadiama u kala ni kima kiahi se kejiia kuenda kiambote mu kaẋi ka athu a muenhu?

⁹ Kota o kutala ngó mesu, kuindi o kuenda ni muẋima ua di zangeleka ni luímbi, kuma kienʼiki ue ukumbu ngó ni kukaiela kitembu.

¹⁰ Ima ioso-ioso, kioso ki i kalé, iala kiá ni dijina diê, a kʼijiia ue kuila muene, muthu, ka tena-phe kuzoka ni íó uoso ua mu tundu mu nguzu.

¹¹ Kia kidi kiene, kuma o ima ue ia vulu i vudisa o ukumbu ku muthu, maji-phe o muthu ku ima iii u katula-ku ihi kia beta o kuuabha?

¹² Mbata nanhi uejiia o kima kiambote ku muenhu iú, phala o muthu, mu izuua iê ioso ia ukumbu uê, ia bhingi kuila u i zubha mukuâ ni kilembeketa? Mbata o muthu kiela ua bhiti kiá, nanhi dingi ua kà mu tangela ima ianda kua kèza-ku Kulu-dia-Mundu?