Ndongixi 4 - O Mikanda Ikola

¹ Anga ngi lunguluka dingi, hé ngi tongolola o kubhondeleka ni kutatesa kuoso kuala mu kubhanga athu kulu-dia-mundu; anga ngi mona o masoxi ma ió oso a a tatesa, ni masoxi ma iá oso a kambe uoso u a konda o malamba; o kusuína kuala ku mbandu ia atatexi maji o ene-phe a a tatesa, a lémbua ngó uoso ua konda o malamba!

² Anga ki ngi bhekesa kuila, ngixi: Alunguʼâ ió afu kiá, kuindi iá ala hanji ni muenhu.

³ Maji o ua beta hanji o kulúnga bhu kaẋiʼabha, ió uoso kiluua ngó a mu vuala; mukonda o kuiibha kuoso kua mu bhanga o athu kulu-dia-mundu kunu, muene ka ku mono luua.

⁴ Inda nga mono ue kuma o kukalakala kuoso ni kusakalala o maku mu ibhangelu, kuene ku bhekela ku muthu o luimbi lua mukuá uoso a zukama-nê. Kuma kienhiki ue kingoho ni lamba dia muẋima.

⁵ O kiôua-phe u di-koteka kiá o maku mê, anga u dia o xitu ié-muène, ni kuila, uixi:

⁶ Kota o lukuaku luezala ni kutululuka ni kunhoha, kuindi o maku ene kiiadi kiâ ezala ni ndumba dia ikalakalu ni dilamba dia muenhu.

⁷ Anga ngi lunguluka lua mukuá, mu kutala nga mono ukumbu kala iú, kulu dia mundu:

⁸ Kuala muthu uala ngó ubhekèlele uê, kala dingi ni mukuá iadi, kidi muene, ka moneka mona mba ngó phange ia muhatu; maji muenhú, kia kuata o kukalakala, ka zumbuka, mba mesuʼê a mu suka mu kutala o jimbongo; mba ngó uila, uixi: Ki ngalʼiki, nga mu kalakalela nanhi, eme nga fulu o kubhana muenhu uami o jimbote joso ja u tokala? Kuma kienhiki ue kingoho ni nduezu mu kukalakala.

⁹ Kota o ku kala kiiadi, muthu umoxi ndenge; kuma o kiiadi a beta kubhanduluka mu ikalakalu iâ.

¹⁰ Mbata se bhu kala muthu u di bhala, mukuá u mu balumuna; maji ió uala ubheka uê, kokôlo diê! Kuma se ua di bhale, ki bhua-ndo kala mukuá u mu balumuna.

¹¹ Se kiiadi ue a zeka bhuamoxi, a ditemesa ni munza mudiâ; maji o muthu umoxi-phe u di temesa kiebhi?

¹² Se bhu kala muthu u sota kutolola-bhu umoxi, kiiadi kiâ à-lua-nê, kuma ene mu kiʼamba muene, exi: “O ngoji lu bhita lutatu, ki lu batuka lusolo”.

¹³ O munzangala ua ngadiama uala njimu, ua beta kota; kuindi o muadiakime ua kuka, ua kambe o kilunji, iú uala ku usobha, ua bhingi ka xikina dingi ku mu bazela kuala muthu uosouoso.

¹⁴ Mbata bhuala iú u tunda muene mu kaleia, nʼeza ku usobha mu kutumina; sumbala kiene muene, a mu vuala ngadiama mu utuminu uê.

¹⁵ Kulu-dia-mundu, o athu oso a muenhu nga a mono ku kaiejela o munzangala ió, o kabhinganu ua-nda kuhinga ungana bhu kididi kia sobha.

¹⁶ O mundu uê ua kexile mu kutumina, ki u xikina ku u tanga; o ió ue, hádia a kʼèza-ku, ka kà tena kusanguluka ni muene. Kuma ue, ni kidi kiene, iene iosuʼiii kingoho ni lamba ngó dia muẋima.