Ndongixi 3 - O Mikanda Ikola

Ima ioso ku Mundu iala ni thembu iê ia i xindi Nzambi

¹ Ima ioso iala ni kithangana kiê kia i xindila Nzambi; iene ioso i bhita kulu dia mundʼuku iala ni thembu iê.

² Sai thembu ia kuvuala, ni thembu ia kúfua; sai thembu ia ku kuna, ni thembu ia kuvuza (ioso iòkune).

³ Sai thembu ia kujibha, ni thembu ia kusaka (kutumba); thembu ia kubula, ni thembu ia kutunga.

⁴ Sai thembu ia kudila ni thembu ia kuolela; thembu ia mukondo, ni thembu ia kutuka-tuka.

⁵ Sai thembu ia kumuanga matadi, ni thembu ia kubhongolola matadi; thembu ia ku di-bhubhala, ni thembu ia kusongoloka ku di-bhubhala.

⁶ Sai thembu ia kusota, ni thembu ia kujimbidisa; thembu ia kubhaka ni thembu ia kutexi bhu kanga.

⁷ Sai thembu ia kutandula, ni thembu ia kutunga; sai kithangana kia kuzuela ni kithangana kia ku di xibha.

⁸ Sai ithangana ia kuzola ni ithangana ia kuzemba; ithangana ia ita, ni ithangana ia uembu.

⁹ O mukalakadi-phe u katula-ku ihi ku kiókio kiene mu kukalakala?

¹⁰ Nga mono kuma, o Ngana, anʼathu ua a bhana ikalakalu iosuʼiii phala ngó dilamba diâ, mukonda o mu ikalakalu ienʼiii muene mua a talesela o hadi.

¹¹ Ima ioso Nzambi ua i bhange ni kuuabha bhu thembu iê; iú ua zangula o mundu uene, iú ua u te mu muẋima uâ, maji o muthu ua lémbua kuijiia o kikalakalu kioso kia bhange Nzambi, tundé ku dimatekenu katé ku dizubhilu.

¹² Kí kia ngi tetulukila muene, kuila, kana-ku dingi kima kiengi kia fuama o muthu kubhanga kala o kusanguluka ni kubhanga mbote ku muenhu uê.

¹³ Ni kuila ue, o muthu uoso, se u dia, nʼa nu, nʼa kembe ku mbote ioso ia kikalakalu kiê, ʼió-phe ujitu ua Nzambi kiá.

¹⁴ Mbate nga kʼijiia kuila, ima ioso i bhanga Nzambi, i xalelà-ku kiá; ka tena dingi kubandekeza-ku kima, ka tena dingi ue ku katula-ku kima. O Nzambi ima ioso u i bhanga kienhiki phala a mu kuate jinge uoma.

¹⁵ O ima i tu mona lelu, ia kexi-ku kiá, o ima ia kèza-ku ue ia kexi-ku ue kiá. O Ngana Nzambi-phe uà kʼèbhula katé ni ima ioso ia bhiti kiá.

Athu ni iama, mu kufua, ene oso a fua kiòmuene

¹⁶ Nga mono ue dingi kulu dia mundu kunu, kuila bhu kididi kia kufundisa bhene bhu kididi kia kuhâma dingi; o bhu kididi kia kubatuila milonga, kuhâma dingi kiavulu.

¹⁷ Anga ngʼila ku muẋima uami, ngixi: Nzambi hinu ua kà fundisa ua iuka ni ua ibha; mukonda sai thembu ia ima ioso, kixi ixinganeku mba ikalakalu.

¹⁸ Anga ngʼamba ue dingi ku muẋima uami, ngixi: Mukonda dia anʼathu, phala Ngana Nzambi a tene ku a lola, o ene ue a tene ku dʼijiia kuila, athu mu kikexilu kiâ, a sokuʼâ ngó muene ni iama.

¹⁹ Mukonda kioso ki bhita ku anʼathu, kiene ue ki bhitʼé ku iama; ima ioso i bhita kiòmuene kua ene oso; o ki fua iú, kiene ue ki fué ió; ene oso o muenhu uene umoxi. Ukota ua muthu-phe ku iama ki u moneka; kuma ene oso muene kingoho.

²⁰ Ene oso muene aia kididi kimoxi; ene oso-phe, fufuta ngó; kienhiki ene oso muene a kà biluka fufutila.

²¹ Nanhi muene u ki tanga kuila o jinzumbi ja anʼathu jiia bhulu, o ja iama jiia muʼalunga bhoxi mu mavu?

²² Eme nga ki mono muene, kuila kanaku kima kia beta o kuiuka, kala o muthu kusanguluka mu ikalakalu iê ioso, mukonda diene o dikânda diê, kulu dia mundu kunu, kuma hádia, nanhi dingi u mu vutula nʼa mone o ima ioso ia-nda ku mu bhingana kuema diê, kuila muene ua jimuka kiá?