Ndongixi 12 - O Mikanda Ikola

¹ Mu izuua ia unzangala ué, lembalala Ió uoso ua ku bhanga, kiosuʼiki o izuua iaiibha kiluua i bhixila, anga kuiza o mivu ia ku bhingi kuila, uixi: Mu mivu iii ki ngala-mu dingi ni kusanguluka.

² Kioso o dikumbi, ni muanha, ni mbeji ni jithéthembua, ki ji vundu luua, anga kuiza dingi matuta kuila mvula iabhu kiá.

³ Mu kizuua ki mateka ku teketa o alangi a dibhata dié, o mala a mazonda anga a kotama kiá, o akua kuzuka anga a zumbuka, mukonda a tolo kiá, o akua kuiaiela bhu jinjanena mua eza kiá kavunda,

⁴ anga o mabhitu aiadi a mbandu ia nzunga a di jika kiá, mukonda dia muxindu ua kuzuka ua sosoloka kiá, hé o mbimbi ia jinjila i zangumuka, o mázui oso a kuimbila anga a xalela bhoxi.

⁵ Kala ue ki u kuata kiá uoma kiókio ki ala bhulu, o mu njila anga mu kala kiá isunji, O (mu mútue hé mu zela mukua ni) muxi ua mumendouela ua temuna itulu, o dihoho di kituka kimbamba, o hânji ia kúdia ki iala-ku dingi; mukonda o muthu ua-nda kuia kiá mʼonzo iê inangenena, o akua kudila ni kuta jingololo anga a kuata kuimajana mu nzunga.

⁶ Kioso o lubhambu lua phalata ki lu batuka luua, kopho ia ulu kiluua i budijika, o disanga anga di sasukila bhu mbanduʼa fixi, o dilola hé di bukujukila bhu mbanduʼa kixima.

⁷ O fufuta ni i vutukila ku mavu kala ki ia kexile, o nzumbi anga i vutukila kua Nzambi ua i bhele.

⁸ Ukumbu mu ukumbu, ioso muene ukumbu ngó!—Kiene kia tange Mulongixi.

Muthu ua tokala o kuxila Nzambi, ni kualuka o ijila iê

⁹ O ndongixi iú, mu kuijiia kinéne, ua longesa ue kuijiia kua vulu dingi ku athu; ua talesa iú ua tongolola, iú ua soneka jisabhu ja vulu.

¹⁰ O Ndongixi iú ua sota jinga maka ambote, iú ua soneka ni kuiuka o maka a kidi.

¹¹ O maka ma jinjimu ela kala jisongo, mukua ni jiphèleku jʼòbatele kiambote kuala o jimesene ja tu bhana kuala Ió uene o Kabhila ketu kamoxièlele.

¹² Kala kiki, eie monʼami, tongolola: O kubhanga madivulu ki kuala ni mbambe iê; o ku di longa ue kinène, ku bhuidisa ngoho o mukutu.

¹³ Ku ioso i uene mu kuívua, zubhilu diê dienhidi: Xila Nzambi, u aluke o ijila iê, mukonda kiene kia fuama athu oso ku ki bhanga.

¹⁴ Mbata Nzambi hádia o ikalakalu ioso ua kà i bheka bhu kibhuna kia kufundisa, katé ni ioio iòsueke, kixi ia uabha mba ia iibha.