Ndongixi 11 - O Mikanda Ikola

O ia uabha tu i bhangienu bhu kithangana kia tokala

¹ Takuila o kúdia kué ku menha, kuma hádia ki bhita o izuua u ku bongʼê dingi.

² Ioso i uala na-iu uana ni sambuadi, né hanji mu dinake dia muthu, uanenu, mukonda eie kuijiia se mu ngongo hádia ku pholo kua-nda kuiza hadi iahi.

³ Kioso o matuta kiezala ni menha, a lundulula o mvula mu ngongo; kienhókio o muxi kuoso ku ua takukila, kixi ku Sulu mba ku Suku, bhu kididi bhuoso o muxi bhu ua di-bhalela bhene bhu ua kà xala.

⁴ Uoso u landukila ku tala o kitembu ka tena ku kuna; o mukua kukengelela o matuta ka tena ku muna.

⁵ Kala eie ki ua kambe kuijiia o njila ia kitembu, mba kioso ki di bhanga o ifuba mu vumu dia muhatu uala mu mikutu iiadi, kiene ue ki ua kambe eie kuijiia o ikalakalu ia Nzambi, Mubhangi a ima ioso.

⁶ Kuna mbutu ié mu kimene, o ku kiemba ue, ʼkuaku lué kí lu nhohe, mukonda eie kuijiia se mbutu iebhi ku ua-nda kuzediuila; hé iii, mba ioio, mba mbutu joso hádia ji iukila bhua moxi.

⁷ Kidi kiene, o mukengeji ua uabha, ni ue, kia di uabhela muene ku mesu o kutala dikumbi.

⁸ Maji se o muthu u kola muenhu, anga u laia mu ndumba dia mivu, o mu mivu ioso anga u kala ni kusanguluka, ua fuama ue kulembalala o izuua ia uíndua, kuma ia-nda ku kala ia nzungule. Mbata o ima ioso ku munduʼuku, i bhita, kuma ima ioso mu ngongo kingoho.

O unzangala

⁹ Eie, munzangala, di kenhe! Sanguluka mu unzangala ué, o muẋima ué u tulumbe mu izuua ia unzangala ué! O njila ja solo o muẋima ué, enda-ju muene, ni jojo ja ku uabhela ku mesu mé; maji ijiia-kiu-phe, kuila mu ima ioso ienhiʼii, muene hinu Nzambi muanda kua kà ku fundisila.

¹⁰ Kala kiki-phe, o njinda sondololaiu ku mu muẋima ué, o xitu ié ku iehele mu kubhanga kiaiibha, mukonda o undenge ni unzangala ue, kingoho kiene.