Ndongixi 10 - O Mikanda Ikola

O ulaji uene mu kubheka mavuua a nzungule

¹ Mukuâ ni luhamue lua-fu, ki lu bhangesa o kutukumuka dizumba dia ibha, hé lu zanga unguendu ua mukua kuiudika ima ia mazumba ma mbote, kiene ue ki di bhanga o uôua uòfele ku muthu ua fumana ni unjimu.

² O muẋima ua njimu uene ku kadilu kê, maji o kiôua-phe muẋima uà mu kala ku kiasu.

³ O kiôua katé ni kiʼaia mu njila, kilunji ka kala na-kiu, hé u di-dikiza muene ku athu oso kuila kiôua.

⁴ O njinda ia nguvulu se ia ku lungulukila, eie-phe bhu kididi kié, ku tunde-bhu; mbata o kutululuka ni kudivisa, iene o milongo i batamesa ndumba dia ikuma.

⁵ Sai ue dingi ni kima ki nga mono o ku ibha Kulu-dia-Mundu, o kutondala ku tunda kua nguvulu,

⁶ hé o kióua a mu xikika kididi kia di leka, maji o jimvuama a a xikika kididi kia tunuka dingi bhoxi.

⁷ Nga mono ue abhika a di nenge ku jikabalu, ni ilamba ia jingana a mu kuendela bhoxi kala ene abhika mu ngongo.

⁸ Uoso u kanda dikungu, ua kinga kufua-mu muène; o uoso u bula o kimbaka, ua kinga ku mu numata ku nhoka.

⁹ O uoso u tuta o matadi, matadi a-nda ku mu tutujula; o ió u bhasa o jihuinhi, uala ku di ta bhu kiluezu.

¹⁰ O utadi kuila ua xibhi, anga a kamba o ku u zuika mu mazu, o mu kubatula na-u ki bhinga u ta-ku muene nguzu; maji o kuijiia kua uabha mu ku tuamenena o ima.

¹¹ O nhoka se i dianga ku numata, kuila kiluua a i bhuuika, mukua uanga né uedi u sota milongo, u lémbua-ku.

¹² O njimu, ku maka a tunda mu dikanu diê, kuala kubhanduluka, maji o kiôua mizumbu iê iene i mu dia.

¹³ Kuma o kiôua ni maka ma dikanu diê, kioso kiandeka ngó o ku a zuela, a di monekena kuila uôua uene, o dikanu diê ku di zubhila di zuela kujuuala muene kua ibha kinéne.

¹⁴ Né-mbe o kiôua u vudisa ndumba dia maka, muthu-phe kʼejiia kioso kia-nda ku mu bhita; nanhi ua kà mu tangela phala ku muʼijidisa o ima ioso ia-nda ku mu bhingana kuila muene ua bhiti kiá?

¹⁵ O ukalakalelu ua maiôua u a bhuidisa, mbata ene kʼejiia ngó kioso kiʼaia mu mbonge.

¹⁶ Kokolo dié! eie u ixi ua bhingi kuila o sobha ié monandenge, o ilamba ié a di menekena ngó kúdia mu kúdia.

¹⁷ Ua lungu! eie u ixi ua bhingi o sobha ié monʼa jingana, o ilamba ié a dia bhu kithangana kia tokala, phala kusunga ngoho o nguzu, ka dila uhôlua, kana,

¹⁸ Mukonda dia umonha uavulu o mukambu ua hongo ia ʼnzu u lundumuka, o maku se a bhuila kinéne, inzu i kala mu mbomba.

¹⁹ Athu o kuolela ene mu dʼixanenaku; o vinhu i sanguluisa o muenhu; maji mu ima ioso o kitadi kiene ki zuela.

²⁰ O sobha ku mu xinge, kana ku mu zuela kiaiibha né kia ngó mu ixinganeku ié; mba uia ku hotʼèlele mu xilu dié mu ku xingila-mu o kilamba; mukonda o jinjila ji bhita bhulu ji kuambata o dízui, ió uala ni mabhabha ua kà tula o njimbu ia kizuelu kié.