Nahumu 3 - O Mikanda Ikola

Milonga ia Ninive: kibuika kiê ki ki kambe

¹ Lamba dié, eie u mbonge ia manhinga! Iezala ni iene ni makutu ni kubhûnda! Mukonda o uiii ka u eha.

² Kibulukutu kia kibetu kiala-mu, ni kutitila kua mixindu ia malola; o jikabalu jala kuia ni kutitila, o makalu aia ni kutuka-tuka.

³ O ió a mondala ku jikabalu a fuomona xibhata jâ jilekujuka kala túbhia, ni ngumba jâ ji kala mu kuila banhi-banhi; kua kà kala muene athu avulu òkuame ni mundu uavulu a fuila bhobho, o imbi ki i xikina ku i tanga o konda iâ, athu anga a kà kala mu di bhukajana ku imbi iâ.

⁴ Ima iosuʼiii mukonda dia kuvula kua ituxi ia Kidianzunga kia uabha o pholo, ua di bhanga mesene ia uloji, ua nganala jinga mundu ni undumbu uê, iu ua tobhesa jinga o miji ni uanga uê.

⁵ Jihova dia Ifuẋi, uixi: Eme ngala kuthandu dié, o mu kuzoka ni eie nga kà ku zula muene o izuatu ié katé mu pholo, hé o tuẋi ié nga kà i londekeza ku miji ioso mu ngongo, nga kà edika o sonhi ié, ku ma-utuminu moso, ki ua zulʼiki.

⁶ Nga kà lundulula ku thandu dié dixidilu ni malebhu, phala ni ngà ku kuatesa jisonhi, ua kà di bhanga u kima kia lusebu.

⁷ Anga kia kà bhita kuila oso a kà ku mona, a kà ku lenga ni ku di kola-kola, exi: Ninive a mu sengulula! Nanhi dingi ua-nda ku mu lendukila? Eie Ninive, kuebhi ku nga kà takana atululudi phala eie?

⁸ Manhi ki ualʼiki, kifua eie kota, No-Amone ndenge? Sumbala a mu tungu bhu kaxi ka jingiji jezala ni menha, o kalunga ka di zanze ku pholo; iu uedi dingi ni kalunga kene, ka di bhange kiene o kimbaka kiê?

⁹ Etiiópia ni Ijito a kexi ene o nguzu iê mukonda dia mundu uâ uavulu sé mbambe; ni Pute ni Líbia a kexi diene o dikuatekesu dié, kuma ua kuatele-nâ ukamba.

¹⁰ Sumbala kiene, maji muene ue a mu ambata aii-nê, ku ubhika; katé ni tuana tuê a tu sana-sanena mu jihota joso ja jinzunga; o ilamba iê ioso anga a i tela jisorte; ni makota mê moso a a kuika ku malubhambu.

¹¹ Eie-muène ue Ninive, mu uhólua ué, ua kà kodiua hé ua kà botomoka; anga ua kà sota ue dilengelu mukonda dia nguma iê.

¹² Jimbonge jé joso ja imbaka phala dilengelu, ja kèla kala mifiku iala ni ibundu ia jifiku ja dianga kúbhia, bhu thembu ki ia tokala jisambatende; se a ji nhikisa ji lalumukina kiá mu kanu dia ió ua-nda ku ji dia.

¹³ Talesa-ze, o mundu ua masoladi mé ma ita, edi ngó kala ahatu oso muʼaxaxi ké; o matundilu oso a ixi ié, a ma jikuila muene o jinguma jé ku mbandu ni mbandu; o jiphapha jé ja felu ja kujika na-ju mabhitu mé, ja kà bhia mu túbhia.

¹⁴ Teka menha phala u a bhake, mbé kia-nda ku ku konda o jinguma. Kolesa dingi o jimbonge ja malengelu mé; u tophele mavu, boxa utuma, u iudike o forno phala kuoha o matijolo.

¹⁵ O kuenhoko kuene o túbhia ku tua kà ku jikinisina, o xibhata ia kà ku buikisa; a kà ku jimuna muene kala ki dia o kabótua, né-mbé hanji mu kuvula mu sokoloka dingi kala mahoho, mba mu di vualulula dingi kala kihoho.

¹⁶ Eie né ua vudisa dingi akua mauenji mé, jithéthembua ja diulu ndenge, hanji-phe, o kihoho kia kà zanga muene, anga kia kà oleka o mabhabha mê hé ki tuka.

¹⁷ O ilamba ié a di fu mukuâ ni kihoho, o atuminiʼé mukuâ ni mahoho a makota a tula ku iangu mu izuua ia mbambi, ki tua o muanha-phe anga a tuka, ni bhu kididi bhua kexe kejiia-bhu dingi.

¹⁸ Kuma o tubhila tué eie sobha ia Asídia aii ku kilu, o ilamba ié ala mù koxila; o mundu ué ua di muangena mu milundu sé ngó kumona muthu utena ku a phopha ni ku a bhongolola.

¹⁹ Ki bhuala milongo i tena kusaka o fidila ié; o kítoto kié ki xixima kala fidila ia mukongo; oso kiá a kʼevua o fuma ié, a kà sanguluka ni kubeta jimbanda ku maku; mbata nanhi ua kambe kutala hadi mukonda dia kuzukutisa kua phulu ié.