Nahumu 2 - O Mikanda Ikola

Ninive a i konda a i tambula

¹ O Mubuikixi ua ku kala kiá ku pholo ié; eie-phe langa o mbonge, ta alangidi mu njila, suína u di kute bhu kinhonga, handamana muene kioso ki ua tena.

² Mukonda Jihova ua kʼeza dingi ni unéne ua Jakobo, kala o unéne ua Izalaiele, sumbale abhûndi a bhûnda muene, o mivide ioso anga a i buidisa

³ O jingubu ja makuenze mê ja kà kusuka, o mala a mazonda ima ia zuata ia kà kusuka muene nguiin! o makalu ma kèla kala túbhia tua muzukuta, mu kizuua kia ku di iudika kuâ; o jingumba jâ ja kà lekujuka ni kikexilu ki kukuatesa uoma.

⁴ O makalu mu nzunga a kà thathamana, mu uendelu uâ a kʼàia ni ku di ṗhuṗha-ṗhuṗha mu jiluua, a difua ni makongolo, a kà lenga lusolo kala kiene mu telajaka o jinzaji.

⁵ O iú-phe ua kà xinganeka o makuenze mê ma ita, maji ene-phe a kà di bhukajana mu kuenda kuâ. A kà lengela ku kimbaka, kioso kia kà mona disuamu dióiudike kiá.

⁶ O mabhitu a ngiji a ma jikula; o palaxu ia botomoka ii i di bhala.

⁷ Na mvuale a mu zula, a mu ambata ku ubhika, o tuhatu tuê, a mu nhenganana ni kukema kala kiene mu dila o membe, ia aia ni ku di bunda bhu jithulu jâ.

⁸ Ninive tunde okulu uela kala kizanga kia menha; maji ene-phe menha enhá muanzanzʼumu ià lenga. A kà a kingisa ni ku a handekela, exi: Imanenu! Imanenu! maji kana-ku ua kà sakuka mu tala ku dima.

⁹ Bhundenu o phalata, bhundenu o ulu mukonda o jimbongoʼiji ki ji moneka mbambe, o mbonge iezala ni ima iavulu ia Seme o muẋima.

¹⁰ Ninive ia xala ngó, loló! A i bhûndu, a i nhana, a i muanga-muanga, la di bhange ngundu muene! Muẋima ua botomoka, o jiphuna ji ji di beta-beta, mu miongo ioso muezala misusu, o jipholo jene joso ja kakuka, ja lombo.

¹¹ O ngenda ia jihoji kindala ii kuebhi? O madilu ma tuana tua jihoji iá kuebhi? Kuebhi kua kexi mu nhungina hoji ia ndumbe ni ia mukaji ni anʼâ sé kumona muthu ua a sasumukisa?

¹² Hoji i kuata jinga mbole ioso ia soko tuana tuê, ia jibha jinga ue xitu phala jihoji ja akaji kúdia, jingenda jê u ji izalesa jixitu, o mu mabànda mê muizala isasu.

¹³ Jihova dia Ifuẋi, uixi: Talesa, Eme ngala ku thandu dié; o makalu mé nga kà oha, a kituka dixi; o minzangala ié ia jihoji ia kà buika ku xibhata; o mu ixi mbole ié nga kà i katula-mu kiá muene, loló! o dízui dia akunjiʼé mu ngongo ka kà dʼívua dingi.