Nahumu 1 - O Mikanda Ikola

O kufundisa kuaiuka ni henda ia Nzambi. O kibuika kia jinguma jê ni kubhanduluka kua mundu uê

¹ Kinemenu kia Ninive. Divulu dia kisúmua kia Nahumu, mukua Eleko.

² O Ngana, uene Nzambi ia difuba, mukua kuvutula phonzo; o Ngana u kaxtikala, uezala ni njinda; O Ngana u vutula phonzo ku oso a mu kuatela luma; o jinguma jê u a bhakela njinda ka a kuatela henda.

³ O Ngana ua kokoloka kutema, maji o nguzu iê iavulu; ka xikina o muêdi ku mu lungisa; O Ngana njila iê ia kuendela i bhita mu kibhungu ni kitembu kia kita-phephe; o matuta ene o fufutila ia inama iê.

⁴ Muene u bateka musanza ua kalunga, hé u u kukutisa; o jingiji joso jithothuena; Baxane ni Karmelu, a botomoka, o fololo ia Libano i xoueta.

⁵ Bhu pholo iê milundu ia makota itunguta, o milundu iofele isengumuka; oxi ia kà di nhikisa bhu pholo iê, ni ngongo, ni oso a tungu-mu.

⁶ Nanhi ua kèmana bhu pholo ia njinda iê? Nanhi ua kà kolokota mu kutema kua njinda iê? Kutema kuê kala túbhia tua muzukuta, o matadi moso muene u a lundumuna.

⁷ Ngana uaiuka, muene dilengelu dietu mu thembu ia phaxi; Jihova uejiia oso a mu dielela muene.

⁸ Muene ua kà bobesa kididi kiki ni kibuika, mukua ni dilúviu dia menha; ua kà kaiesa jinguma jê katé ua a jikinisa mu kitombe.

⁹ Enu mua bhukumukina Jihova, mua fika kiebhi? Muene-phe hinu u mi jikinisa enu oso; o phaxi iii ki ia kà tena kuiza luiadi.

¹⁰ Mukonda né hanji ene a di lunga-lunga kala minha, anga ezala ni vinhu kala jihólua, a kà jimuka ene oso muene kala iangu iakukuta.

¹¹ Momué mua tundu muthu ua banze kubhanga Nzambi usuéia. Muthu mukua Kadiaphemba ubhana kaiula kaiibha.

¹² Muene Ngana ua zuela ku jinguma jê uixi: Né hanji ela kala a kondama kinéne, né hanji a kala ifuẋi iavulu, kiene kimoxi a kà a jikinisa, a-nga a kʼàia muene nzaká! Eme né hanji nga ku tatesa, ku pholo ki nga kà ku tatesa dingi.

¹³ Maji kindala ngi bukula ophi ia kute ku thandu dié, malubhambu mê nga kà a batujula.

¹⁴ Eme Jihova nga bhana kijila kokué Asídia, kuma ki kuà kala dingi mbutu ia muthu ni dijina dié, o mʼonzo ia mahamba mé, eme-muène nga kà bula-mu o iteka iòsonge ni ia kuzunza. Eme nga kà ku kandeia o mbila ié muenhomo mukonda eie u sébhue.

¹⁵ Talesenu kiá ku milundu, o inama ia ió ua mu bheka o jingolokela ja njimbu iambote, o inama ia ió ukola o kutululuka. Eie Juda, bhanga kiá o fesa jé, kumbidilenu o jihasa jenu kua Nzambi, mukonda abhumu kà ka tona kubhita dingi moxi ienu. Ngà a bhuikisa-ku kiá.