Mukumbi ua Mikumbi 8 - O Mikanda Ikola

¹ Aiué! Tamanu eie ua kexile u phangʼiami ia diiala, anga uámua ku mele a manʼetu ua ngi vuala! Mukonda o ki ngeje ku ku sanga mu nzunga, anga ngi ku bhana beju, ki bhueju kala dingi muthu u tena ku ngʼâmba.

² Ngeji ku kuambata hé ngi ku bokuesa mʼonzo ia mamʼetu, eie hé uia ni ku ngi longa; ngeji ku ku bhana kúnua vinhu, vinhu ia dizumba dia mbote ni uálua ua jilomá jami.

³ O lukuaku lué lua kiasu lueje ku kala koxʼa mútue uami, o lué lua kúdia lueje ku ngi kondoloka mu ku ngi bhubhala.

⁴ Nga mi lokela, enu muʼanʼa ilumba mu Jeluzaleme, kuila kazola kami ki mu mu tonese, ki mu mu balumune, katé muene kiandala.

Kukaiela

⁵ Nanhi muenʼiú, muhatu u tunda mu kikangalakata, ua xamenena kua kazola kê? Mu kilembeketa kia muxi ua masá, muene mu nga ku tonesena, mukonda mamʼenu muene mua mu kuatelele misusu ia ku ku vuala; mu kilembeketa kia muxi ua masá muene mua mu kuatelele o misusu ió uoso ua ku tubhula kulu dia mundu.

Diiala

⁶ Ngi te ku muẋima ué kala kidimbu, ngi te ku lukuaku lué kala kimaku mukonda o henda iala ni nguzu kala kalunga; o difuba mu ku di kaka dia soko ni mbila; o makala mê makala ma túbhia; diene di di fuangana mukuâ ni milengo ia túbhia.

⁷ Menha né-mbe a vula, ka tena kujimuna o henda iii, né-mbe jingiji ja menha ji kunguluka, ka tena ku i bobesa. Né-mbe bhu kala muthu u bhana jimbongo jê joso jala na-ju monzo mu henda iii, nga fika, u lémbua muene toko-toko!

Kuitaiela

⁸ Tuala ni kaphange ketu ka muhatu kòfele, ua kambe hanji o mele; Phangʼietu muenʼiú tu mu bhanga kiebhi, kizuua kia-nda ku mu ta maka a kusakana?

⁹ Muene se u kala kimbaka, ku thandu diê tua kà tunga-ku sabhalalu ia phalata; o muene se uala dibhitu, tua kà mu kondoluesa mabaia ma muxi ua musédulu.

Muhatu

¹⁰ Xi, eme ngi kimbaka muene; o mele ami ene jisabhalalu ja matala ku kimbaka; mu kienʼiki, ku mesu ma kazola kami, ngedi kala o muthu ió ua bongo o kutululuka.

Kuitaiela

¹¹ Solomá ua kexi ni díbhia dia mivide mu Bale-Hamone; díbhia dienʼidi anga u bhana athu ku di langa; eneʼá-phe aia ni kuila, mu kibundu kimoxi a mu bhekela midi ia itadi ia phalata.

Muhatu

¹² O díbhia diami dia mivide dia ngi tokala, diala muene kumoxi ni eme; eie-phe Solomá ua tokala midi ia itadi ia phalata, o ió a mu di langa ibundu a tambula hama jiiadi ja itadi ia phalata.

Diiala

¹³ Eie, tata, ua tunga mu tu mábhia tua itulu, akuenu ia ku kinga, andala kuivua o mbimbi ié; eme uami ue ngʼivise-iu, tata!

Muhatu

¹⁴ Izá lusolo, kazola kami, u di bhange kala hoha, uila kala monʼa ngulungu ku milundu ia mixi ia mazumba ma nuha kia mbote.