Mukumbi ua Mikumbi 7 - O Mikanda Ikola

Diiala

¹ O inama ié ku uabha kuahi, ki uenda mu jisabhatu jé, eie monʼa kilumba, tata! Kioso ki uenda o kubunguta kua mbunda ié, mukuá ni makoladi a iudika kuala makuʼa mesene ia ufunu.

² O thumbu ié mukuá ni kopho ia kikondoluesa, ki i kamba dingi kia kúnua; o mala mé kala mvumbu ia tiliku iòkondoloke kuala itulu ia jihonga.

³ O tumele tué tuiadi, mukua ni tuana tuiadi tua ngulungu, a tu vuala jindumba.

⁴ O xingu ié kudiengeta kala inzu ia matala iòtunge ni mazu a nzamba. O mesu mé kala jindombe mu honga ia Hezebone, bhua zukama ni dibhitu dia Bate-Labini. O dizulu dié kuila tononô kala inzu ia matala mu Libanu ia talela ku mbandu ja Damasku.

⁵ O mútue ué ua di leka kala mulundu ua Kalamelu; o jindemba ja mútue ué mukuá ni thanga ia pulúpula ia kusuka kiambote; sobha ua di kutu mu jingindu jé.

⁶ Eie ua uabha, tata, eie ua uabha! Eie u sèndula kinéne, eiʼ na Jihenda ja makembu!

⁷ O ku tolomoka kué kua di fuangana kala diaie; o mele mé iene o isaka iê ia jindende.

⁸ Eme ngambele, ngixi: Ngi banda ngi sambela ku diaie ni nga kà kuata ikèlekele iê; bhenʼiobho o mele mé ma kèla kala isakixi ia ji-úva ku muvide; o dizumba dia kubhuima kué, mukuá ni dia ibundu ia jimasá jabhi kiambote.

⁹ O kutouala kua jibeju mukuá ni vinhu ia uabha kiambote. Xi, mukua ni vinhu ia di kenze kiambote phala kazola kami, a inua ni kulembakata kuoso, vinhu i bhangesa kuila o mizumbu ia athu aii ku kilu ienda ni ku zuela.

Muhatu

¹⁰ Eme ngi uangene ua kazola kami; o muene ue ua mu dʼivua kala ngala ku mu sunga.

¹¹ Izá, kazola kami, izá tu tunde, tuietu mu mikáu, tua kà zekela mausuku mu tusanzala ku matutu.

¹² Tua kà di meneka jinga mu kimenemene ngó, tu balumuka phala kuia ku mábhia a mivide; tu talesa se mivide iandeka kiá kusabhuluka, anga tu kengelela se itulu iê ia temuka kiá, tu sota kumona mba o miẋi ia jilomá ia sabhuluka iii ia te kiá itulu muenʼiomo muene mu nga kà ku bhela o henda jami ja vulu kinéne.

¹³ Miẋi ia mandalákula i bhana dizumba diê diambote; o bhu muelu ua dibhitu dietu, ibundu ioso iambote bhene bhu iala, ni ia ubhe ni iòkulu, iene ioso nga ku bhakela-iu muene phala eie u kazola kami!