Mukumbi ua Mikumbi 6 - O Mikanda Ikola

Kukaiela

¹ Kazola ké uaii kuebhi, eie kahetu ka kime, tata, ua beta kuuabha mu kaẋi ka ahatu nʼakuenu? Kazola ké ua di tela kuebhi, tua kà mu sote nʼeie?

Muhatu

² Kazola kami ua kulumuka mu kadíbhia kê, mu mabakala mê ma balsamo ia uasu ua dizumba, mu kunhunga muʼaxaxi ka itulu ni ku kanza itulu iê ia jihonga.

³ O kazola kami, uami, ua ngi tokala, eme ue ngi uê nga mu tokala; muene u dila mu kaẋi ka itulu ia jihonga.

Diiala

⁴ Eie ua uabha, tata, kamba diami, eie ua uabha! ua di bhange mukuá ni mbonge ia Tídiza, ua di muika kala o mbanza ia Jeluzaleme, eie u kôla kala kifuxi kia masoladi ambata mabandela.

⁵ Mesu mé katula-u kokuami u talele kuengi, kuma ki u ngi tala, mukutu uami u zamba ngi teketa. O jindemba jé jedi kala kilunga kia jihombo ja mu dila ku mulundu ua Ngiliiade.

⁶ O mazu mé mukua ni kilunga kia jimbudi ja mu banda mu ku tunda bhu dizoueselu diâ, ja bhingi mu kuvuala, ji vuala jindumba joso; mu kaẋi kâ ki mu moneka mbudi ia kisula, i kamba mona.

⁷ Mukuá ni ibhasu iiadi ia jilomá, kiene kia di fu o tu matama tué ki tu benha mu kaẋi ka jingindu jé.

⁸ Ahetu a sobha, makuinhi a samanu, ahetu bhu mbandu makuinhi-nake, o ilumba ia mizeletete ku tena ku a tanga.

⁹ Maji diembe diami, o phomba iami umoxi ngó; nzela diami umoxi ngó; mona umoxi a mu vuala ubhekèlele uê mu vumu dia mamʼâ, muene ngô a mu zola kiavulu kuala ió uoso ua mu vuala. Anʼa ilumba kia mu mona, a mu ila kuma ua zediua; ahetu a sobha ni ahetu bhu mbandu, kia mu mona, a mu ximana.

¹⁰ Nanhi muenʼiú ua mu tukuluka ni ku di muika kala ukielu ua kimene, ua uabha kala mbeji, ua di muika kala dikumbi, ukôla mukua ni kifuxi kia masoladi ambata mabandela phala kúlua ita?

¹¹ Nga kulumuka mu kadíbhia kami ka miẋi ia Minongela, phala kutala isasa ia indémvuna mu dikôlo, ni kumona mba o mixi ia mivide ia mu sabhuluka kiá, o miẋi ia jilomá se iala kiá ku itulu, ia mu sabhuluka.

¹² Ki kia bhiti-phe, ki nga kʼijiia, maji nga tukumuka a ngʼambata mu dikalu dia kifuxi kiami ki kôla.

Kukaiela

¹³ Vutuka, vutuka eie Sulamita! Vutuka, vutuka phala etu tu ku tale. Sulamita mu mu talelaʼhi kala kia tonginina o mikalatata ia ifuẋi iiadi ia masoladi.