Mukumbi ua Mikumbi 5 - O Mikanda Ikola

Diiala

¹ Nga bokona kiá mu kadíbhia kami, phangʼiami ia muhatu, bhànga diami! Nga munu uasu uami ua sumuna ni ima iami ia mazumba; nga katula kixila kiami, eme nga ki di ni uiki; o vinhu iami nga i nu ni lete. Dienu, nuenu, enu mu makamba mami! Enu nga mi zola kiavulu, nuenu muene kioso ki mua tena!

Muhatu

² Eme ngele ku kilu maji muẋima uami moxi ua tonoʼê. Ngividila dízui dia kazola kami ua mu ṗhuṗha, uixi: Ngi jikuile, ngi jikuile phangʼiami ia muhatu, ngi jikuile kazola kami! Phomba iami! Nzela diami! Mukonda mútue ua ngʼizala ni dimume, jindemba ja ngʼizala ni mabêbe a mbundu ia usuku.

Diiala Muhatu

³ Nga zula kiá izuatu iami; ngi i zuata dingi lua mukuá? Inama iami nga i sukula kiá; manhi ngi i xidisa dingi?

⁴ Kazola kami ua te lukuaku luê bhu dizungu dia dibhitu, mukutu uami ua zambe, o mu muẋima mua ngi lunguluka, henda ja ngi kuata.

⁵ Anga ngi balumuka mu ku jikuila kazola kami; kienhokio maku mami ma kala mu zunzumuka uasu ua sumuna, o milembu iami iezalesa uasu uambote ua sumuna ku jisabhi ja dibhitu.

⁶ Kazola kami nga mu jikuila dibhitu, maji muene kala-bhu dingi, uaié kiá mu ku mu ivua ngó mbimbi iê muẋima moxi ua ngi sengumuka, kioso muene kia kexi mu ku zuela. Nga mu soto hanji, maji ki ngi mu mono dingi, lémbua; nga muʼixana muene, maji ka ngiʼtaia dingi.

⁷ Alangidi a kexile mu kulanga o mbonge, a ngi sange, a ngi beta, a ngi kuama. O thanga iami, akua kulanga imbaka, a ngi katula-iu.

⁸ Nga mi lokela enu mu anʼa ilumba ia Jeluzaleme, kuila: Se kazola kami mua mu sange, mu tangedienu muexi: Eme nga kate ni jihenda!

Kuitaiela

⁹ Kazola ké uala nʼihi ia tundu, akuá oso nʼa kala ndenge eie kahetu ka kime, ua beta kota mu kuuabha muʼaxaxi ka ahatu ni akuenu? Kazola ké uala nʼihi ia tundu, akuá oso nʼa kala ndenge, eie kahetu ua mu tu lokela kiki?

Muhatu

¹⁰ Mukonda o kazola kami uedi ni kuzela ni kukusuka; muene ua beta ku di tungula mu makuinhi a jimidi.

¹¹ Mútue uê mukua ni ulu uôzunze kiambote; jindemba jê kala isaka ia ndende, ja xikelela loii kala kilombe-lombe.

¹² O mesu mê edi kala mesu a jiphomba jala bhu mbandu ia menha ma mu kunguluka; u fika kala a a sukula ni lete, ia a a sokeka kuala mesene ia ufunu, nʼa kale mu kunhohena bhu mbanduʼa honga.

¹³ Tu matama tuê kala kakisengu ka balasamu ia dizumba, mua mu sabhuka tu isasa tua iangu ia dizumba. O mizumbu iê ia di bhange kala itulu ia jihonga! izunzumuka uasu ua sumuna ia beta kuta kiavulu.

¹⁴ O maku mê medi kala malenge ma ulu, a a sokeka ni ditadi dia jasindu. O mala mê ni thulu iê a zele kala mazu ma nzamba ezala ni matadi a jisafídia.

¹⁵ O tuluingi tuê kala jiphiladi ja ditadi dia mamole, a tu xikika ku ibaka ia ulu ua kenzuluka kiambote. O muene uoso ki u mu tala, uila kala muxitu ua Libanu, ua tolomoka kala kiene o mixi ia sédulu mu muxitu.

¹⁶ O uzuelelu uê u touala, ni uene nzué! Amah! Kidi muene! Nanhi u kamba ku muʼinda, ua uabha kiki! Kienʼiki kiala kazola kami, kienʼiki kia kala muadi uami, tata! enu anʼa ilumba mu Jeluzaleme!