Mukumbi ua Mikumbi 4 - O Mikanda Ikola

Diiala

¹ Eie tata, ku uabha kuahi, kazola kami, kuuabha kuahi, ku uala na-ku! O mesu mé medi kala mesu a jiphomba bhu kaẋi ka jingindu jé. O kindemba kié mukuá ni kilunga kia jihombo ja mu tuluka ni kúdia ku mulundu ua Ngiliiade.

² O mazu mé, mukuá ni kilunga kia jimbudi jʼobhute kindala, ji ja mu banda mu kutunda bhu disukuilu diâ; ja bhingi kuila jene joso ji vuala jindumba, o momuʼâ ku sange-mu imoxi ngó i kamba o kuvuala.

³ O mizumbu ié iedi kala mukuâ ni kangoji ka kusuka ka pulupula; o uzuelelu ué u touala ni uene nzué! o tu matama tué mukuâ ni kibhasu kia lomá, bhu kaẋi ka jingindu jé.

⁴ O xingu ié kudiengeta, mukuâ ni inzu ia Davidi, ia matala, ia tungu phala kubhaka-mu ibhakatu iê; kʼonzo kuònhenge midi ia jingubu, ngubu joso ja indanda.

⁵ O tumele tué tuiadi bhu thulu, tuedi kala tuana tu-iadi tua ngulungu tuòvuale jindumba, tua mu dila mu itulu ia jihonga.

⁶ Kioso utalalu ua kumbi dia ngoloxi ki uiza luua, o ilembeketa ioso ni i jimbidila kiá, nga-nda kuia ku mulundu ua uasu ua dizumba ua sumuna ni ku ka mulundu kòfele ka uasu ua zumba ua Libanu.

⁷ Tata! Eie muene uoso ua uabha, kazola kami! O ku mukutu ué ki ku moneka dithonha.

⁸ Zá ni eme ku muxitu ua Libanu, dibhànga diami, zá ni eme ku muxitu ua Libanu. Tonginina tundé bhu zoko-zoko dia mulundu ua Hamane ni bhu thala ia mulundu ua Ximidi ni ua Helemone ni ku mabànda ma jihoji ni ku milundu ia jingu.

⁹ Ua ngi katula o muẋima moxi, phangʼiami ia muhatu, tata! bhànga diami! Miẋima moxi ia ngi bhu-mu, kiene ki ua ngi iale ngó lumoxi, miẋima moxi ia ngi halumuka-mu, ni dikoladi dimoxi ngó dia xingu ié!

¹⁰ Jihenda jé kuuabha kuahi, phangʼiami ia muhatu, tâta! Jihenda jé kuuabha kuabhi, muhatuʼami, tata! Lukuẋi luosuʼulu o henda ié ia beta kota mu kuuabha o vinhu ndenge! O maji mé ma nuha kiengi, ima ioso ia dizumba ndenge!

¹¹ Ku mizumbu ié ku tunda ixila izunzumuka uiki, muhetuʼami! Koxiʼa dimi dié, kuezala uiki ni lete; o dizumba dia izuatu ié mukuá ni dizumba dia uasu ua muxitu ua Libanu!

¹² Ua di bhanga kala kadíbhia ka itulu kʼoxitile, phangʼiami, tâta, bhànga diami! Ua di bhanga kala otho ia menha iòjike, uedi kala fiẋi iote kidimbu ia kambe ku i jikula.

¹³ Tu thangu tué, tua di bhange díbhia dia mixi ia jilomá iala ni ibundu ia iuka kiambote; ni hena, ni nardu.

¹⁴ Ni nardu, ni hasafalangu, ni kálamu ni kanela ni mixi ioso kiá ia Libana ni ia sumuna ni aloué ni ima ioso ia dizumba ia beta ku ta kiavulu.

¹⁵ Eie, eie-muène ua di bhange kala u fiẋi ia kafuku-fuku mu tu mábhia, u ndùnga ia menha ma kunguluka, ma kunguluka mu muxitu ua Libanu!

Muhatu

¹⁶ Kithembue kia thunda, balumuka; zá eie u kithembue kia luiji; bhuselelenu mu kadíbhia kami phala dizumba diê, di-ie ni ku tukumuka, dile muene tungatatá!

¹⁷ Ai ué! Izá, kazola kami, bokona mu kadíbhia ké, u die ibundu ié ia iuka kimabote!