Mukumbi ua Mikumbi 2 - O Mikanda Ikola

¹ Eme ngi diloza dia Salone, ngi kitulu kia jihonga.

² Mukuâ ni kitulu kia jihonga mu kaẋi ka minha, Kiene ue kazola kami mu kaẋi ka ilumba.

Muhatu

³ Mukuá ni muxi ua masá mu kaẋi ka mixi ia ditutu, kiene ue kazola kami mu kaẋi ka minzangala ia mala; kizúzumbia kié ngi kinda kiavulu, mu kilembeketa kié muene mu ngi xikama; o kibundu kié mu kanu diami ku ngi toualela kuahi!

⁴ Muene ua ngi bheka mʼonzo ia kizokola, o jihenda jé ja di bhange diene o dibandola ku thandu diami.

⁵ Ngi bhanienu kúdia jipasa, ngi kuatekesienu ni jimasá, mukonda jihenda jê ja ngi kodiuisa, nga benguka na-ju.

⁶ Lukuaku lué, lua kiasu, lu nhohene kuthandu dia mútue uami; o lué, lua dilu, lu ngi kondoloke.

⁷ Nga mi lokela muene, enu mu anʼa ilumba mu Jeluzaleme, ni ku jingulungu ni ku jimbambi ja kitumba, kuila jihenda jami kana ku mu tonesa, mba mu mu fundumuna, katé muene kioso kiandala.

⁸ Dízui didi, diene o dízui dia kazola kami; muenʼió ua mu kuiza kiá ni kubanda ku milundu ni kutuka-tuka tu milundu tuofele.

⁹ Kazola kami ua di bhanga hoha, mukuá ni monʼa ngulungu; tala-ze iú kuema diaʼnzu, ua mu tala bhu njanena; u zongojuela mu mazungu.

¹⁰ Kazola kami u zuela nʼa ngambela, kuila: Balumuka, kazola kami, kiuabhe kiami, izá!

Diiala

¹¹ Mukonda, tala-phe kuma thembu ia mbàmbi ia bhiti kiá, o mvula ia batuka, iaii.

¹² Mʼoxi ietu muezala kiá itulu; o jinjila mungongo thembu ia bhixila ia kuimba; Diembe a dʼivua kiá kudila moxi ietu.

¹³ O mufiku u mateka kiá kusabhuluka phala kuima ibundu iê; o mivide ia temuna, itulu iê ila ni iene dizumba tunhá! Kazola kami, kiuabhe kiami, balumuka, iźa kunu!

¹⁴ Izá, phomba iami, tata, eie ua tunga mu jingenda ku jindanji ni mu ididi ia di sueka ku matadi a di leka, ngidikize pholo ié, bhangesa kuila dízui dié ngi dʼivua, kuma o mbimbi ié ia touala, o pholo ié i bhekela kizola!

Muhatu

¹⁵ Ngi kuatedienu mikenge ni tu mikenge tua mu zubha mábhia a ji-uva, kuma mábhia metu ma ji-uva mala kiá ku itulu.

¹⁶ O kazola kami, uami; eme ue, ngi uê (nga mu tokala muene). O kilunga kiê u ki disila mu kaẋi ka itulu ia jihonga.

¹⁷ Kioso utalalu ua ngoloxi ki uiza luua, anga ilembeketa ioso i jimuka, vutuka kazola kami; di bhange kala hoha, uila kala monʼa ngulungu ku thanduʼa milundu ia Betele, iezala matadi.