Mukumbi ua Mikumbi 1 - O Mikanda Ikola

Muhatu uinda diiala diê

¹ Mukumbi ua mimbu ia Solomá.

Muhatu

² Ngi bhane nzóbole ku ditama ni jibeju ja dikanu dié; mukonda o henda ié kota o vinhu ndenge.

³ Mu ku nuha kiambote, o maji mé ala kota mu ku uabha; o dijina dié, mukuá ni maji ma dizumba mala ku lunduluka; anʼa ilumba kiene kia ku zolela.

⁴ Ngʼambate, tuie lusolo, kokué. Sobha ua ngi bokuesa mu xilu diê. Tua kà sanguluka, tua kènda ni kutanena momué; O henda ié tua kà beta ku i xinganeka o vinhu ndenge; kiene kia ku zolela oso a iuka o miẋima.

Kuitaiela Muhatu

⁵ Eme ngi muzedi, maji nga uabha, enu akuetu mu anʼa ilumba mu Jeluzaleme, tata, nga di fu mukuá ni jibalaka ja Kedale, ngedi kala o jikolotina ja Solomá.

⁶ Ki mu ngi tonginine o ku kusuka ku ngala na-ku, kuma ku kusuka kuami kua ngi tundu ku muanha ua ngi tuila iu ua ngʼaúla. Anʼa mamʼetu a ngi thathamena, ia a ngi te mú kuinga mábhia ma mivide; maji o díbhia diami-phe dia ngi tokala ki nga dʼingi.

⁷ Ngi tangele-phe hanji, eie kaiala a kuzola kuala o muenhu uami: Kuebhi kua mu dila o kilunga kié? O mu kaẋi ka muanha uatu, o kilunga kié ki nhohena kuebhi? Phala ki ngi kale mu kunhunganena ngó bhu mbandu, a ilunga ia akuenu.

Diiala

⁸ Se ua kambe kuijiia-ku, eie ua beta kota mu kuuabha mu ahatuoso, kaiela-phe mu manhanhu ma jimbudi katé ki u bhixila, nda uinge tuhombo tué ku maxilu ma jifundu ja abidi.

⁹ Eie ua soko ni ji ékua ja makalu ma Falaó, kazola kami.

¹⁰ Tu matama tué kuúabha kuahi, mu makembu mé. O xingu ié u sanga iaiuka ki i kala mu makoladi.

¹¹ Makembu ma ulu u tuanda ku ku iudikila, tu phaphela-ku muene jifuma ja phalata.

Muhatu

¹² Kioso sobha kia xikama ku meza mê, o dizumba dia maji mami diia ni ku mu tukumukina.

¹³ Kazola kami, phala eme, uêla kala ka kisasa ka uasu ua dizumba; muene ua kà tunga bhu kaii ka Jithulu jami.

¹⁴ Mukuá ni kisakixi kiezala itulu, mu mivide ia Njedi, kiene kia di fu kazola kami, phalʼeme.

Diiala

¹⁵ Eie ua uabha, tata! Kamba diami! Eie ua uabha, tata! Mesu mé medi kala ma jiphomba.

Muhatu

¹⁶ Eie ue u ditoko, tata! Kazola kami, u bheka ngalasa, kazola kami, tata! Hama ietu iezala muenhu;

¹⁷ o mikambu iaʼnzu ietu ia muxi ua sédulu, o maleka mê ma mbalanda muxi ua sipreste.