Mikeia 7 - O Mikanda Ikola

O kukasana kua Izalaiele

¹ Kokolo diami! Kuma ngedi kala kiene mu kukanza o ibundu bhu thembu ia ku muna, ngedi kala ibundu bhu kixibhu iaxala mu a kanze kiá! Ni kisaka kia ji-uva ngó phala kúdia ki ki moneka dingi, mba tufiku ngó tua xalela, tuene kuinda o muenhu uami.

² Athu akua kubhanga o mbote mu ngongo a jimuka-mu, o ua iuka muʼaxaxe ka athu ka moneka dingi; enhoso aia ni kubatamena phala kubhubhisa manhinga, muthu uia ni kutomba phangʼié ni uanda.

³ Maku mâ a beta kuijiia kubhanga ni uhete o ima iaiibha; ni monʼa ngana u jiza ni ku tokuesa; o mufundixi u lengulukila kubatuila kuoso kua tena kutambula futu; o kota-dia-ngana mu kuzuela, o luimbi lua mu kala moxi diê ka lu sueka dingi; kienhiki ene oso anga a kala ngó akua kubhanga kavuanza.

⁴ O uala kota mu kuiuka mudiâ, uadifuʼê ngó ni muinha; o ua beta ku uabha o muẋima muʼaxaxe kâ, kota mu kuiibha o muxitu ua misonge ndenge; maji o kizuua kia ku ku ta diesu ni kia ku ku vutuila o phonzo kia bhiẋila; kindala hadi ia ku tula.

⁵ Kana kuẋikina ki ku tangela o dikamba, o kazola ké kana ku mu dielela; katé ni mabhitu a dikanu dié ku a jikuile o muhatu ua zeka bhu jihata jé.

⁶ Mukonda o mona ua diiala u nongena tatʼâ, o mona ua muhatu u balukila mamʼâ, o mbalakaji u zoka ni ukoue ua muhatu, anga o jinguma ja muthu a kala ene-muène a tokala mu dibhata diê.

O kudielela ubhulukilu ua Jihova

⁷ Eme-phe o Jihova muene-muène nga kà mu kinga, nga ka kinga kua Nzambi ia ubhulukilu uami; Nzambi iami ua kà ngʼivua.

⁸ Eie kana kusanguluka, nguma iami, ki u mona nga di-bhale, kuma né nga di bhale, hádia ngi balumuka dingi. O kioso ki ngiza kitombe, Ngana ua kà kala mukengeji uami.

⁹ Kia kà ngi bazela Ngana, nga kà dixibha muene, mukonda nga te kituxi kua muene. Mulonga uami kuila ua u fundisa kiá, muene nʼangi xindila kioso kia ngi tokala, ua kà ngi bheka kua zele, eme anga nga kà mona o kufundisa kuê kua kidi.

¹⁰ O kienhiki nguma iami ia muhatu anga ua kà ki mona, jisonhi anga ja kà mu kuata muene. Kuma uene mu ku ngʼibhula, uixi: O Jihova, Nzambi ié, uala kuebhi? Mesu mami-phe ma kà mu mona ia a mu diota-diota kala malôua mu nzunga.

¹¹ Dikumbi di dʼiza di nga kà tona kutunga dingi o imbaka iê, mu kizuuʼokio o ngonge ia kà kala hanji dikanga.

¹² Mu kizuuʼokio a kʼèza ko kué tunde ku Asídia katé ni ku jisanzala ja Ijitu, a kà tunda ku jimbonge ja Ijitu katé ku ngiji ia Ufalate, tunde ku musanza ua kalunga katé ku musanza ua mukuá ua kalunga, tunde ku mulundu iú katé ku mulundu iuná.

¹³ Sumbala kiene, maji oxi ienhiʼii-phe a kà i xa ngùndu, mukonda dia athuʼê a tunga-mu, ni mukonda dia kikexilu kia ibundu ia ima iâ iene mu kubhanga.

O kulenduka kua Jihova ku thandu dia Izalaiele

¹⁴ Ni dikoue dié, enda ni kuinga o muiji ué, mukonda kiene o kilunga kia undu-ndu ué, kia tunga kì kia kalé ngó ubheka uê mu ditutu, mu kaxi ka ixi ibhakula kiambote o idima; ua engila mu Basane ni mu Ngiliiade, phala a kà dile mueneʼomo kala mu izuua ia xahulu.

¹⁵ Eme nga kà edikiza madiuanu, kala u nga kuidikisile mu izuua i ua tundu mu Ijitu.

¹⁶ O miji iengi a kà ki mona, mesu, jisonhi anga ja kà a kuata, kia kà mona o kutena kué eie; ene, mu ku di uana, maku mâ a kà ma xita ku makanu mâ, anga kua kà eza uxilu mu mátui.

¹⁷ A kà lesa fufutila ia mavu kala jinhoka, hé a kâ tunda ni kuteketa mu jingenda jâ kala ibamba iaʼxi ia mu huhutila bhoxi, a kʼèza kua Jihova Nzambi ietu ni kimbuua, eie muene a kà ku kuatela uôma.

¹⁸ Nzambi, nanhi muene u soka nʼeie, eie u loloka o ituxi anga o kubhukumuka kua mbandu ia iá a subhuka ku undundu ué u ku jimba kiá? Ngana kene kuila o njinda iê u i bhaka katé ku hádia ni hádia, mukonda muene kia mu uabhela kiavulu, o ku kuatela henda.

¹⁹ Muene ua kà tona dingi o ku tu kuatela henda; milonga ietu ua kà i titidila muene bhoxi dia inama iê anga u i jimba kiá, o ituxi ietu ioso anga ua kà i texi muʼalunga mua zongo!

²⁰ Mu kienhiki, Nzambi ua kà londekeza o ufiiele uê kua Jakobo, ni henda iê ia kuatela Mbalahamu, kala kia lokelele o jitata jetu tunde mu izuua ia xahúlu.