Mikeia 6 - O Mikanda Ikola

Nzambi u funda ni mundu uê

¹ Kindala kiki-phe ivenu kia zuela Jihova; Balumuka u zoke ni milundu, tu milundu tuòfele tuivue o dízui dié.

² Enu mu milundu ivuenu, ni enu madisesa ma ixi ma kuata kiambote, kuma Ngana ua kuata mvunda ni Kifuẋu kiê, iu ua-nda kufunda ni Izalaiele.

³ Eie u Kifuẋi kiami! mulonga uahi u nga ku tela? nga ku lokalala ni kima kiahi? ndoko ngi tangele hanji, nda u ki bhele umbangi.

⁴ Eme, ni kidi kiene, nga ku tombola mu ixi ia Ijitu; mu inzu ia ubhika mu ua kexile, nga ku kulamu; Eme nga katula Mozé, ni Alá, ni Midiiana, ià u nga tumine ku ku tuamenena o njila.

⁵ Banza-kiu hanji, muiji uami, tata! kia ku kanena Balaki sobha ia Mouabhe, ni kioso kia mu vutuila Balamu monʼa Beola; banza hanji o ima ioso i ua bhiti na-iu tunde bhu Sitimi katé bhu Jidingale, nda uijiie o kuiuka kua Jihova ni mabatuilu mê.

Jehova uandala kima kiahi

⁶ Kima kiahi ki ngiia na-kiu bhu pholo ia Jihova ni nga kà fukame na-kiu bhu pholo ia Nzambi ua suka ku ukota? Ngiza bhu pholo iê ni maujitu ma kuoha? Ngi mu bhekela tungombe tua muvu umoxi?

⁷ Nzambi u xikina ku mu bhomba ni jimidi ja jimbudi? Inga ngi mu bhomba ni kuinhi dià midi ia tungiji tua maji? Ngi mu bhana monʼami ua diiala ua phande-kumbi, mu mulonga uami? Mba o mbutu ia tundu mu mala diami, mu kituxi kia muenhu uami?

⁸ Muene ka kuambela kiá, eie u muthu ua-kimi, kioso kia uabha, kia fuama, kia solo Ngana kuma kiene ki u bhanga, kuila ubhanga jinga kuiuka ni kubatula mu kidi, uzola kubhanga o mbote, ukala jinga mu kuenda bhu pholo ia Nzambi ié ni ku di tululula?

⁹ Dízui dia Jihova dì diʼixana o sanzala, o uoso njimu, u kala ni uôma ua dijina diê. Ivenu enu mu akua sanzala, ni ió uoso ua mu i tumina.

¹⁰ Kifua mu inzu ia mukua ituxi, muala hanji ni jimbongo ja mangonha? Ni efa ienu ki ia fuama, i mua tolesa phala kuia ni kuzonga na-iu o uenji?

¹¹ Mu tena ku di zelesa ku athu, ni izongelu ia jipezu jenu ki ja kidi? mba mu iuka kiebhi ni nzeke ia ufumbe iezala jipezu ja mangonha?

¹² Kuma o jimvuama jenu jezala kusuína, o akua diʼembu diê a zuela makutu, o dimi mu kanu diâ diejidila o kulunguluka ni kunganala athu.

¹³ Kienhiki-phe ni eme uami nguzu nga-nda ku ku bua-iu ni ngi ku kuame, ni ngi ku sengulule mukonda dia ituxi ié.

¹⁴ Ua kà dia, maji ua kà lémbua kuikuta, o nzala ia kà ta kibuta mʼonzo ié, (moxi dié mua ká kuizala ni sonhi); ku jimbote ji u mona, ua kà kala ngó u muzangi, kubhake kana; o ioso i ua kà bhaka, eme nga kà i bhakula ku xibhata.

¹⁵ Ku mábhia ua kà kuna muene, maji kua kà muna-ku kima; ua kà vuka maji, maji o a kudiuaia-phe kua kà a mona; ua kà kâma vinhu, maji ua kà lémbua-phe o vinhu ia kúnua.

¹⁶ Kuma kia mi beta kota o ku dituma ni itumu ia Omedi, ni kubhanga o ima kala ia bhanga jinga akua bhata dia Akabe, enu muala mu kuendela mu jingonge jala ku mi longa ene, phala eme ni ngi ku jime o mbutu, o ió a tungu mu diembu dié, ni ua a tumbula dingi ka moneka; endelela muene kala muphióphio; o kusekala kua mundu uami anga mu ku bheka ku thandu dienu.