Mikeia 5 - O Mikanda Ikola

¹ Kindala bhongolola o masoladi mé ku ibuka-ibuka, eie monʼa kilumba, a ku vuala kuala ilolo ia ita! Kuma a-nda ku tu kondela bhu kaxi; o mufundixi ua Izalaiele a-nda ku mu kuama ni mbangala ku jinganzuánzua.

O Uvuadiue ua Mexiia ni utuminu uê

² Eie Beleme dia Efrata, sumbala uala u kambonga muʼaxaxi ka jimidi ja Juda, maji mo-mué muene mua kà tunda u ngi kalela Ngana mu Izalaiele, uavu o matundilu mê ma kalelà-ku tunde mu xahulu, mu izuua ia kalelàku.

³ Kala kiki, Nzambi ua-nda kuehelela o mundu uê, katé bhu thembu ia kuila, o ió ua mu sènda ni mika ia kuvuala ua vuala kiá, o muene ue kiene kiua kia kà a bhana. Kieneʼokio o mbandu ia jiphange jê iaxala-ku ia kà vutuka kumoxi ni ana a Izalaiele.

⁴ Muene anga ua kà nangenena, ifuẋi anga ua kà inga mu nguzu ia Jihova ni mu ungana ua dijina dia Jihova Nzambi iê! Ene uâ a kà kala bhua kondama, mukonda kindala muene ue a kà mu zangeleka katé ku aẋokololo kua suku oxi.

⁵ Muenhú anga uà kà kala muene paze ietu. Kioso o Asídia kia kʼèza mu ixi ietu mu ku i lua, nʼa bhite ni kudiota ku thandu dia jinzu jetu ja matala, etu tua kà mu ixanena sambuadi dia abidi, ni dinake dia mona-ngana muaxaxi ka athu, ni a tu kudila.

⁶ Ene anga a kà buidisa oxi ia Asídia ni xibhata, kumoxi ni ixi ia Nimilode katé ni bhu mabokuenu mê. Bheneʼobho anga muene ua kà tu kudila bhu maku ma Asídia, kioso kia kʼèza mu ixi ietu mu ku i lua, ni ku diota mu jimbambe jetu.

⁷ O mbandu ia subhuka-bhu ia Jakobo anga ia kà di funga mu akua miji iandumba, a kà di bhanga kala o dimume dia tundu kua Jihova, a kʼèla kala mvula ia kizeke ki i sukila ku thandu dia sabhelela, ia bhingi ki i kinga kima ku muthu, mba idielela kima kioso-kioso ku anʼathu mu kunoka kuê.

⁸ O mbandu-phe ia subhuka-bhu, ia Jakobo, anga ia kà kala mu kaxi ka miji ioso, muʼaxaxe ka ifuẋi ia ndumba, mukuâ ni hoji muʼaxaxi ka iama ia mukáu mu muxitu, kala kamunzangala ka hoji muʼaxaxi ka ilunga ia jimbudi; kuma iene ki i bhita, ua kàia ni kujikuata ni ku ji jibha, anga ji di bhanga mbole iê, o u ji kudila ka moneka.

⁹ Eie Jakobo lukuaku lué lua kà zangalala ku thandu dia ió oso a ku zembe; o jinguma jé joso, a kà jikinina.

¹⁰ Anga kia kà bhita mu kizuuʼokio, kuma eme ngi Jihova, o jikabalu jé joso ji uala na-ju, nga kà ji buidisa, ni makalu moso nga kà a bukujula.

¹¹ Anga o jisanzala joso mu ixi ié nga kà ji muanga-muanga, ni jimbonge jê joso ja masuamenu nga kà ji lundumuna.

¹² Hé nga kà ku katula o mauanga mu uala na-u bhu maku mé; kua kà kala dingi ni akua kuzambula.

¹³ O iteka ié iòbhange ni maku iala muʼaxaxi ké, nga kà i katula-mu kumoxi ni jipholela jê! O eie-muène, kua kà fukama dingi bhu pholo ia ikalakalu ia maku mé.

¹⁴ O mixitu ikôla iala muʼaxaxi ké, nga kà i vuza; o jisanzala jé nga kâ ji muangamuanga.

¹⁵ O miji ioso iaditunu o kuívua, eme nga kà i vutuila phonzo, kuma nga kà i beta ni njinda ni kutema.