Mikeia 4 - O Mikanda Ikola

G ukunji ua akua matumbu

¹ Mu izuua-phe ia kà sukidila-ku, kia kà bhita kuma, o mulundu ua inzu ia Jihova a kà u tula bhu zoko-zoko bhua suku o milundu ioso, o tumilundu tuoso ua kà tu somboka, tu xala muene bhoxi, o ifuẋi ioso anga ia kà bhongolokela kueneʼoko.

² Kua kʼàia muene miji iavulu, exi: Izenu, tu bandienu ku mulundu ua Jihova, ku dibhata dia Nzambi ia Jakobo. Muene nda a kà tu longe o jinjila jê, etu phala tuendele mu jihoka jê. Mukonda o kitumu hádia ki tunda mu Ziione, o maka ma Ngana ma kà tunda mu Jeluzaleme.

³ Muene anga ua kà fundisa ni mabatuilu mê muʼaxaxe ka ifuẋi iavulu; ua kà bhana kaxtiku ku miji iala ni kutena, katé ni iii iala ku makanga, enhó anga jixibhata jâ a kà ji sula kiá matemu phala kudima, o mifula iâ a kà i bhanga jimvo; muiji umoxi ki ua kà leka dingi xibhata mu kubhânga jimvunda ni muiji ua mukuá, ka kà di longa dingi kúlua ita.

⁴ Maji a kʼèla kiá, muthu uxikama bhoxi dia muvide uê, muthu uxikama bhoxi dia mufiku uê, o u a kuatesa uôma ka moneka, mukonda dikanu dia Jihova dia Ifuẋi diene dia ki tange.

⁵ Mukonda o kiki ifuẋi ioso a mu kuendela, muthu mu dijina dia nzambi iê, muthu mu dijina dia nzambi iê; etu-phe tua kʼèndela mu dijina dia Jihova Nzambi ietu, ku izuua ni izuua ki iene ni dizubhilu.

Izalaiele ua ka vutuka mu Kutunda kua mu balakalele

⁶ Ngana uixi: Mu kizuuʼokio, o ió oso a kexile jinge mu ku tenguna, nga ka a bhongolola kididi kimoxi; o iá u nga kaiele ni iá u nga di tunine, nga kà a bheka dingi mu kibhanga.

⁷ Anga, o kia tenguine nga kà ki bhanga kiengi, kuma iene o mbandu ia xala-bhu; o ki nga texile dikanga nga kà ki bhanga muiji ua nguzu ni kutena, o Jihova anga ua kà kala jinga mu ku a tumina ku mulundu ua Ziione, tunde kindala, katé ku hádia ni hádia.

⁸ Eie-phe, eie u ditala dia dileka dia kilunga, eie u mulundu ua monʼa Ziione ua muhatu, ko-kué eie muene, kuene kuà kʼeza o kutumina kua xahulu, o utuminu ió ua monʼa kilumba, Jeluzaleme.

⁹ O ki ualʼiki-phe, u telaʼhi ngó ngololo ioso iii ia kudila? Mo-mué mua kambe Sobha? Ndongixi ié, i ku bhana kaiula, ki i moneka dingi? Misusu ia ku kuata, kala ió uala ni mika ia kuvuala?

¹⁰ Eie tala hanji hadi ni misusu ni ikalakalu, eie u monʼa Ziione ua muhatu, ni phaxi ni lamba kala ià ió uala ni mika ia kuvuala; mukonda kindala mu sanzala ua-nda kutunda-mu, ua kà tunga ku mukáu anga ua kʼèza katé ku Babilonha. Kueneʼoko-phe kuene ku ua kà bhandulukila; kueneʼoko kuene kua kà ku kudila Ngana, bhu maku ma jinguma jé.

¹¹ Kindala, miji iavulu a ku bhongolokela, a di te mu kuzoka nʼeie, iá ala kuila, exi: A mu sebulule muene, mesu etu a ki mone, nda a tane kala kia kiandalele mu kumona bhu suka Ziione.

¹² Maji enhó, o mabanzelu ma Ngana-phe, ene kʼa mʼejila, o ikanenu iê ue ki ia a lombolokela; mukonda muene ua ongeka kala jihuinhi bhu kienda kia kuvundila jimbutu.

¹³ Balumuka, u vunde, eie monʼa kilumba mu Ziione! Mukonda mbinga ié nga kà i bhanga ia felu, o iala ié ia ngòndo; ua kà sanujuna ndumba dia ifuẋi ia miji, futu iâ anga ua kà i bhakuila Jihova, ni umoni uâ kua Ngana, uavu o ixi ioso.