Mikeia 3 - O Mikanda Ikola

Jindumu ku atumini, ni jinganga, ni misésedi ia makutu

¹ Eme anga ngi zuela dingi, ngixi: Ivenu kindala, enu mu atumini a Jakobo, ni enu mu jingana ja dibhata dia Izalaiele: Ki kia mi fuama enu, kuijiia kioso kiaiuka?

² Enu mua dizemba ni kubhanga o mbote anga mu dizola ni kubhanga kiaiibha, akua muiji uami mu a kalumuna o kikonda ku kanga ni xitu mʼoxi ku thandu dia ifuba iâ.

³ Anga o xitu iâ mu i dia, kikonda kiâ mu ki kalumuna, ifuba iâ mu i bula mu ibhasu-ibhasu, anga mu a uanauana ku jithumba-jithumba, kala kia bhanga xitu ia kulamba mu ímbia ia dikota.

⁴ Ene a kà di kola kua Jihova, maji muene-phe kʼanda kua evua; kumbi dienhódio ua kà a suekela o pholo iê, mukonda ikalakalu iâ ia bhange a i ibhisa kiavulu.

⁵ Kia bhekela Jihova ku ki tanga, mukonda dia jipolofeta jene kutondalesa akua mundu uami, jene kunumata ni mazu mâ, anga a dikola, exi: Paze! Mukonda ala ni kia kúdia, maji o ió-phe mu kanu diâ ka mu a tela-mu kima, a mu kanena kúlua-nê ita.

⁶ Uila kiki, hádia ku mʼiza usuku, phala upolofeta ubhue-ku, kuiza kuvunda phala ni kuzambula ki kua kà kala-ku dingi; jipolofeta jiji dikumbi dia kà a vundila, o muanha ua kà biluka kitombe kiedi muene buí.

⁷ Akua lumono lua kumona ima kiluua imoneka, sonhi ja kà a kuata; o akua kuzambula a kà tandanganha; xi, ene oso muene a kà jika ku makanu, mukonda kua Jihova Nzambi ki ku tundu njimbu ioso-ioso.

⁸ Maji eme-phe, ni kidi kiene, ngi kala mu kuizala ni nguzu ia Nzumbi ia Ngana; ngezala ni kutetuluka mu kubatula milonga, ngezala ni kusuína kua kutangela Jakobo o kutondala kuê, ni Izalaiele o kituxi kiê.

⁹ Ivenu-kiu-phe kindala enu atumini a dibhata dia Jakobo, ni enu mu makota ma dibhata dia Izalaiele, mua dizemba ni kubatula kua iuka, anga muila o ioso ia iuka enu mu i lunguluila muengi.

¹⁰ Ziione anga mu mu tunga ni manhinga, o Jeluzaleme ni kubatula kua mangonha.

¹¹ O atumini-â, milonga a i batula ni kutambula maujitu, o jinganga jâ mu kulonga a longa ni kukinga ku a futa, o jipolofeta jâ kiela kuzambula, azambula phala kutambula kitadi; anga a tatela Ngana, exi: O Ngana muene, mbé ki iú-ue-iú muʼaxaxi ketu? Ki bhuala kia ibha ki tu bhiẋila.

¹² Uila kiki, mukonda dienu, Ziione hádia a mu dima kala mukáu ua hatu, Jeluzaleme ua kà kituka jindunji ja matadi, o mulundu bhuala o inzu ienhiʼii, bhua kèla kala muxitu bhu thala ia milundu.