Mikeia 1 - O Mikanda Ikola

Jindumu kua Izalaiele ni Juda

¹ Kizuelu kia Ngana kiejile kua Mikeia, mukua Mola, mu izuua ia Jotamu, ni Akaji ni Ezekiia jisobha ja Juda; mu kisunji kia muene ku thandu dia Samádia ni Jeluzaleme.

² Ivuenu enu oso mu ifuẋi, bhana mátui eie u ixi ni ima iê ioso iala-mu mu kuzanza kuê kuoso, o Jihova Nzambi a mi kalele mbangi ia ku mi bhanga kiaiibha tunde bhu kididi kiê kia ku mu bhezela ki kôla.

³ Talesa kuma o Jihova u tunda bhu kididi kiê, ua kà tuluka anga ua kèndela ku ididi ia dileka iaʼxi mu ngongo.

⁴ O milundu bhoxi dia inama iê ia kà sengumuka, ni jihonga ja kà dibula misula mukuâ ni kixila kia uiki kia zukama ku túbhia, mukuâ ni menha ki ma lundumukina mu dikenhe.

⁵ Ioso iii ia kà bhita mukonda dia kubaluka kua Jakobo, ni ituxi ia dibhata dia Izalaiele. Jakobo-phe kutondala kuê kuahi? Ki muene Samádia? O Juda ididi iê ia dileka iebhi? Ki muene Jeluzaleme?

⁶ Kienhiki-phe hádia Samádia nga kà mu bhanga ndunji ia matadi ma mukau, o mu ixi phala ku phapha-mu mivide, matadi mê nga kà ma mbolomuena mu honga, ididi iê ia di sueka anga nga kà i vulumuna.

⁷ Iteka iê ioso iobhange ni maku a ka i bukujula, ni itadi ioso i a mu futu ku maufusa mê a kà ioha mu túbhia, mahamba mê moso nga kà ma bhuisa-ku mukonda ua a sumbu ni kitadi kia undumbu ué, mʼa kà biluka mukuâ ni futu ia muhetu ua kidianzunga.

⁸ Mukonda dia kiki nga kà di ta mutendu, nga kà buza, nga kʼenda kala muthu a mu bhûndu, ua xala tuẋi; nga kà di ta mutendu kala ki bhanga o jimbulu, nga kà dikola kala kihendembumba.

⁹ Mukonda o kitalakanha kiê, né a ki tumbu ki iluka dingi, kuma kia bhiẋila ni mu Juda. Kia di zale katé bhu muelu ua akua muiji uami, katé mu Jeluzaleme.

¹⁰ Kana ku ki tangela mu Ngate, ki mu dile ue kiavulu; bokona monzo ia Bete-Afa, u mbolomoke mu fufuta.

¹¹ Bhita ni tuẋi i kuatesa jisonhi, eie u monʼa muhatu ua tunga bhu Safídia; muhatu ua mukua Zanane iú-ué ku bhata mukonda ka tena ku tunda; o jingololo ji tunda bhu Betesele, bhobhuenu bhene bhu ji suka.

¹² Mukonda monʼa muhatu ua tunga bhu Malote, uene mu kuinda o mbote; mbata o divuua dia tundu kua Jihova, dia bhiẋila katé bhu muelu ua Jeluzaleme.

¹³ Eie muhatu ua tunga bhu Lakiji, ku dikalu kutila-ku mikete i lenga kiambote; mbata bhobhué eie, bhene bhua tundu o kulueza kua monʼa Ziione ua muhatu; mukonda o kutondala kua Izalaiele kuene kumoxi ni kua sange momué.

¹⁴ Mukonda dia kiki, o Mosekate ua ka mu bhana maujitu mu ku di ambula-nê, o jisobha ja Izalaiele ja kà bhindamena o kumona o jinzu ja Kezibe, maji kia kà kala kingoho kuma a kà tokoka-phe ku ji sanga.

¹⁵ Eie u kahetu ua tunga bhu Malesa, hanji nga-nda ku kubhekela ngana imoxi, ua kà ku tambula mu ubhinganu. O fuma ia Izalaiele ia kà bhiẋila katé mu Adulame.

¹⁶ Kolola o kindemba kié, bhuta o mútue ué u xale ngó ni dibhala, mukonda dia anʼé u uazola kinéne; dibhala diê u di zanzesa muene mukuâ ni dia holokoko, mukonda anʼé oso a kuambata-nâ ku ubhika.