Matesu 9 - O Mikanda Ikola

Jezú u saka haxi ia kila

¹ Muène ua di longo mu bote, anga u zaúka ku sámbua, u tula mu mbonge iê-muène.

² Talesa-phe, a mu bhekela diiala dia kate kila, dia zeka bhu hama. Jezú, kia mono kuxikana kuâ, u ambela haxi, uixi: Mona, kuata muanu; ituxi ié iòloloke!

³ Bhenhobho asoneki amoxi, a kuata kudiodia, exi: Ialʼ ú, uala mu tanga isunji kua Nzambi!

⁴ Jezú kuma uejiia mabanzelu mâ, uixi: Phala-hi muala mu xinganeka kiaiibha mu miẋima ienu?

⁵ Kiauabha-bhu ku ki bhanga kiebhi, o kuila: Ituxi ié iòloloke, inga kuila: Balumuka, uende?

⁶ Phala enu-phe mu kʼ ijiie kuma monʼ a Muthu uala ni nguzu mu ngongo ia kuloloka ituxi, u ambela o haxi ia kila, uixi: Balumuka, zangula hama ié, uie ku bhata.

⁷ Muène anga u balumuka, uia ku bhata diê.

⁸ O mundu-phe, kia ki mono, uôma u a kuata, anga a ximana Nzambi ua bhana athu o nguzu kala kiki.

Kixanu kia Matesu. Jezú u tambulula akua ituxi

⁹ Kutunda bhobho, mu kubhita, Jezú u mona muthu a mu ixana Matesu, ua xikama bhu kididi kia kutambuila lubhaku. Anga u mu ambela, uixi: Ngi kaiele.

¹⁰ O muène anga u balumuka, u mu kaiela. O kia xikama mu kúdia mʼ onzo, talesa akua kukobhalala lubhaku avulu ni akua ituxi, eza, hé a xikama ku meza, kumoxi ni jixibulu jê, mʼ onzo ia Matesu.

¹¹ Jifalizeu kia ki mono, ambela jixibulu jê, exi: Phala-hi mesene ienu uala kudila kumoxi ni akua kutambula lubhaku ni akua ituxi?

¹² Muène-phe kia kʼ ivu, uixi: Oso a di sanze ka bhindamena kimbanda, kikale iá a kate.

¹³ Ndenu-phe mu di longe kioso ki kia jimbulula, kuila: Nginda o ku kuatela mukuenu henda, ki ngindi sata; kuma eme ki ngeza mu kuixana athu aiuka, maji akua ituxi.

Jixibulu ja Nzuá jiza mu kuibhula

¹⁴ Jixibulu ja Nzuá anga jiza kua muène, exi: Phala-hi etu ni jifalizeu tuene mu jila luavulu, o jixibulu jé-phe, kene kujila?

¹⁵ Jezú anga u ambela, uixi: Kífua anʼ a sala ia ubhanga a tena kukala ni mukondo kiosuʼ iki ki ala ni nga-iala? Izuua iiʼ iiza-phe, nga-iala a-nda ku a tambula-nê; kiene kiua ki ejiia kujila.

¹⁶ Kana muthu u banda ni kithethele kia ubhe ku kizuatu kiokulu. Mbata o kithethele kia ubhe kia tokala kubanda, ki nomona dingi ku kizuatu kiòkulu, o kutanduka hé kuvula dingi kiengi.

¹⁷ Athu ue kene kuila a ta vinhu ióbhe mu isudi iòkulu, mbebhu o ibha kubaza, o vinhu anga i texika, ni isudi iene i fua. Vinhu iòbhe-phe a i ta mu isudi iòbhe, iene ioso anga i di bhaka kiambote.

Jezú u fukununa monʼ a kilamba ku Jijudé. U saka muhatu ua kate o kibhubhe kia manhinga

¹⁸ Kia kexile hanji mu ku a zuelela imʼ iii, bhenhobho bhu tula kota dia muthu, u mu sambela, uixi: Monʼ ami ua muhatu ua-fu muene kindalʼ iki! Izá-phe u mu tule lúkuaku, a kale dingi ni muenhu.

¹⁹ Jezú anga u balumuka, hé u mu kaiela ni jixibulu jê.

²⁰ Bhu kala-phe muhatu, ua kate kibhubhe kia manhinga, ua kuata nakiu kiá kuinhi dia mivu niʼ iadi. Anga uiza ku dima diê, hé u babata ku muxiku ua kizuatu kiê.

²¹ Kuma muène ua xinganeka, uixi: Se nga babata ngó ku muxiku ua kizuatu kiê, ngʼ iluka.

²² Jezú-phe u sakuka, hé u mu mona, uixi: Mona, tululuka! Kuxikana kué kua kubhana muenhu. Muhatu anga uiluka tunde kumbi dienhódio.

²³ Kia zubha jezú kubhixila mʼonzo ia kilamba, u sanga akua kuxika jimbendu, ni mundu uoso ala mu bhaka jibuia, uixi:

²⁴ Ngenzelienu! Mona kilumba ka-fu, uaii ngó ku kilu! Ene a kuata ku muʼ olela uôua.

²⁵ Kia zubha-phe kutubhula mundu bhu kanga, muène u bokona, anga u mu kuata mu lúkuaku, mona-kilumba anga u balumuka.

²⁶ O fuma iê ienhiʼii anga i sambuka mʼ oxi iosuʼ oio.

Ifôfo iiadi i tona mesu. Dibubu dia dimonho

²⁷ Kutunda bhobho, Jezú u kala mu bhita, ifofo iiadi anga i mu kaiela ni ku di kola, exi: Tu kuatele henda, u monʼ a Davidi!

²⁸ Kia zubha kutula mʼ onzo, ifofo i bhikila. Jezú u ambela, uixi: Enu mua xikana kuma eme ngi tena ku mi saka? Kuala ene: Eué, Ngana!

²⁹ Muène anga u babata ku mesu mâ, uixi: Kuabhu-phe! Ki di bhange kala kia soko o kuxikana kuenu kuoso ku muala na-ku!

³⁰ O mesu mâ anga ma jikuka. Jezú anga u a tendelela, uixi: Alukenu, ki mu kʼijidise muthu.

³¹ Ene-phe ki a tubhuka, a kuata ku mu fumanesa mʼoxi iosuʼoio.

O usakelu ua dibubu

³² Enhá kia zubha ku tunda, a mu bhekela dibubu dia saluka ni dimonho.

³³ O kia zubha kukaia dimonho, dibubu di zuela. Mundu anga a diuana, exi: Kiki kiluua a ki mona mu Izalaiele!

³⁴ Maji o jifalizeu-phe, exi: Madimonho uala ku ma kaia, mukonda o kutena a mu bhana-ku kuala kota dia madimonho.

O mábhia mavulu, akalakadi a tolo

³⁵ Jezú anga u nhunga mu jimbonge joso ni mu jisanzala, ni kulonga mu malombe, ni kuta Maka ma Utuminu uê, ni kusaka jihaxi joso ku makukata mâ ni ku mauhaxi mâ moso.

³⁶ Kia mono ifuxi-phe, u a kuatela henda, mukonda atate, a di mauange kala jimbudi ja kambe mubidi.

³⁷ Muène anga u ambela jixibulu jé, uixi: O mábhia ma nzungule muene, akalakadi-phe a tolo.

³⁸ Ngana uavu mábhia mê mu sambedienu, a tume akalakadi mu mábhia mê.