Matesu 8 - O Mikanda Ikola

Jezú u saka haxi ia dibhute

¹ Kiki muène kia zubha kukulumuka mu mulundu, ifuẋi iavulu i mu nhenganana.

² Anga bhu kala ni haxi ia dibhute, u iza u mu sambela, uixi: Ngana, eie se ua mesena, ua ki soko o ku ngi bhana kudisanza.

³ Muène anga u sunununa lúkuaku luê, u mu babata, uixi: Nga mesena muene; disanze. Muène anga u disanza muʼ anzanza muenhomo.

⁴ Jezú anga u mu ambela, uixi: Aiuka, kana ku ki tangela muthu. Ndeie-phe, ua kà di tukuluile kua nganga, mbé ua kà bhane ujitu ua tumu Mozé, phala a ki tambule umbangi kuila eie ua disanze.

O kuxikana kua Kabhitangu

⁵ O kia zubha kutula mu Kafanau, kabhitangu u mu sanga ni ku mu dionda, uixi:

⁶ Ngana, selevende iami iú ua zeka monzo, ua kate uhaxi ua kila, ua tate kiavulu.

⁷ Muène ua mu ambela, uixi: Eme ngizʼó, ngi mu sake.

⁸ Kuala kabhitangu: Kana Ngana! Eme ki ngi tokala eie ni u bokone mʼ onzo iami. Kabasa eie u bhana kizuelu kimoxi, selevende iami u iluka.

⁹ Mbata eme uami ngi muthu a ngi tumina; o masoladi ami u ngala-nâ nga a tumina. Muthu nga mu katula ngixi: Ndeie, uia. Mukua nga mu ixana, ngixi: Zá, uiza. Selevende iami nga mu ambela: Bhanga kiki, u ki bhanga.

¹⁰ Jezú kia zubha ku kʼ ivua, ua diuana, anga u ambela iá oso a mu kaiela, uixi: Kidi kiene, kuxikana kala kiki, ki nga ku sange luua, né mu Izalaiele!

¹¹ Ngi mi tangela-kiu kuma, ku thunda ni ku luiji, kua kà tunda athu avulu a kà xikama mu mbanza ia diulu kumoxi ni Mbalahamu ni Izake ni Jakobo.

¹² Maji ana ene avu o ungana uâ-phe, a kà a kaiela ku usuku ua kanga, kuenhoko kuene kuà kala o kudila ni ku di kokota ku mazu.

¹³ Jezú anga u umbela kabhitangu, uixi: Ndeie kiá! Ki ua xikana kiókio, ki di bhange kioso ki ua bhingi. Selevende iê anga uiluka kumbi dienhódio.

Jezú u saka ukouʼ a Phetele ni nzungule ia jihaxi

¹⁴ Kia bokona Jezú mʼ onzo ia Phetele, u mona ukouʼ ê ua zeka, ua-lu kata febele.

¹⁵ Muène anga u mu kuata mu lúkuaku, febele anga i mu eha. Anga u balumuka, u kuata ku mu sedivila.

¹⁶ Kutula mu ngoloxi, a mu bhekela athu avulu a saluka ni madimonho, muène anga uia ni kukaia o madimonho ni kizuelu kimoxi ngó; o jihaxi joso u ji saka.

¹⁷ Jezú ua bhange kiki, phala ki bhite kia tangele Izaia, polofeta, kuila: Muène ua tambula kukata kuetu, uambata mahaxi metu.

Jezú ka moneka dibhata

¹⁸ Kiki Jezú kia mono ifuẋi ia mu kondoloka, u tuma jixibulu jé kuzáuka ku sámbua.

¹⁹ Anga kuiza musoneki umoxi, uixi: Mesene, eme ngi ku kaiela kuoso-kuoso ku uia.

²⁰ Kuala Jezú: O makombe mene ni jingenda jâ, o jinjila ue ji bhita bhulu, sai ikalanga iâ; maji o Monʼ a Muthu-phe kala ni kididi bhua zekesa o mútue uê.

²¹ Xibulu iê ia mukuá anga u mu ambela, uixi: Ngana, ngʼ ehele hanji, ngi diange kuia mu kufúnda tatʼ etu.

²² Kuala Jezú: Ngi kaiele eme; eie ehela afi mu afi a fûnde akuâ.

Jezú u bateka o mabhuku

²³ Kia zubha muène ku di longa mu bote, jixibulu jê ji mu kaiela.

²⁴ Talesa-phe, ku balumuka kitembu kiavulu mu kizanga, katé mabhuku eza ku thanduʼ a bote. Muène-phe uaiê ku kilu.

²⁵ Maxibulu anga eza kua muène, a mu tonesa, exi: Ngana, tu bhulule, tu fua!

²⁶ Muène-phe ua ambela, uixi: Mualela-hi ni uôma, enu mua tolo o kuxikana? Anga u fundumuka, u bazela o kitembu ni menha ma kizanga; kuma anga ku tululuka, ku di xibha kiambote.

²⁷ Mala enhá anga a diuana, exi: Muenhú muthu ua kídifua kiahi, ua bhingi kuila ni kitembu kiá ni menha ma kizanga ma mu belesela?

Malaji ma akua Ngandala

²⁸ Kia zubha kukuaka ku sámbua, kʼ oxi ia akua Ngandala, u takanesa ni mala kiiadi, ala ni madimonho. A mu tunda mu jimbila mua balukila. A saluka kinéne, kua bhingi kana muthu ua tena kubhita-bhu, bhua batukila ene.

²⁹ Talesa-phe, ene a di kola, exi: Eie tua kukala nʼ ihi, u Monʼ a Nzambi? Kífua ueza kunu mu ku tu talesa hadi, o thembu kiluua ngó i bhiẋila?

³⁰ Tunde bhobho, ka dikanga, anga bhu kala kilunga kia jingulu javulu jala mu kúdia.

³¹ Madimonho anga ma mu dionda, exi: Se uambe ku tu kaia, tu tume ni tu bokone mu kilunga kia jingulu.

³² Kuala muène: Ndenu! Ene anga a tunda, a bokona mu jingulu. Talesa-phe, kilunga kioso ki lundumukina mu dikenhe hé ki di vubula mu kizanga, anga ki fuila mu menha.

³³ Athu a kexile ku jinga, anga a lenga, aia mu mbonge, hé iene ioso a i jimbula, ni kioso kia bhiti na-kiu athu a salukile ni madimonho.

³⁴ Bhenhobho mbonge ioso i tunda ku takanesa ni Jezú; o ki a mu mono, a mu dionda kutunda mu jixi jâ.