Matesu 7 - O Mikanda Ikola

O kufika mukuenu. Jimbua ni jingulu. O kubhinga Nzambi

¹ Ki mu fike, enu uenu phala ka mi fike.

² Mbata, o kubatula kuoso ku mu batuila na-ku akuenu, enu uenu kiene Nzambi kia kà mi batuila; ni nzôngo ioso i mu zongela na-iu akuenu, enu uenu a ka mi zongela-iu dingi.

³ Mukonda dia-hi u tala o kakisoso kala mu diesu dia mukuenu, maji ku xinganeké o kimuẋi kia ku kala mu diesu dié eʼ muène?

⁴ Mba mukuenu u mu ila kiebhi: Izá ngi ku katule o kakisoso ka ku kala mu diesu, manhi mu diesu dié êʼ muène mua ku kala kimuẋi?

⁵ Kamangonha! Dianga hanji kukatula o kimuẋi mu diesu dié eʼ muène, nda u mone kiua kukatula o kakisoso mu diesu dia mukuenu.

⁶ Ima ia Nzambi kana ku i tela jímbua, o jiphelula jenu kana ku ji texila jingulu, kuma jene ji ji diotela bhoxi, anga ji lunguluka ji ku ẋuua.

O kulenduka kua Nzambi

⁷ Bhinga, nda a ku bhane; sota, nda u sange; ṗhuṗha, nda a ku jikuile.

⁸ Mbata uoso u bhinga, a mu bhana; uoso u sota, u sanga; o uoso u ṗhuṗha, a mu jikuila.

⁹ Mba muthu uebhi mudienu, muène se monʼ ê ua mu bhingi mbolo, u mu bhana ditadi?

¹⁰ Mba ua mu bhingi mbiji, u mu bhana nhoka?

¹¹ Sumbala enu muaiibha, muejiia kubhana anʼ enu maujitu mambote, kuambe dingi Tata ienu uene mu Diulu, u fula kiebhi kukala kota mu kubhana ima iambote oso a mu bhinga?

¹² Kala kiki, ima ioso-phe i mua mesena kuila athu a mi bhanga-iu enu, iene ue muene i mua bhanga ene; mbata kiene kia jimbulula o Kitumu kia Mozé ni milongi ioso ia jipolofeta.

O dibhitu dia kulu ni dia tolo

¹³ Bokuenenu bhu dibhitu dia tolo, mbata o dibhitu dia kulu ni njila iazanze iia ku ʼalunga; o athu a di bokona avulu.

¹⁴ O kadibhitu-phe katolo, ni kanjila kòfele, kaia ku muenhu; athu kʼa kidi a ka sanga.

O Jipolofeta ja makutu

¹⁵ Dimukinenu o jipolofeta ja makutu, a mi kana mu izuatu ia jimbudi, maji moxi diâ-phe ala jimbinji jahame.

¹⁶ Mu ejidila ku ibundu iâ. Manhi athu a kanza ji-uva ku minha, mba jifiku ku musonge?

¹⁷ Kiene ue, muẋi uoso uambote uima ibundu iambote; o muẋi uabolo-phe, uima ibundu iaiibha.

¹⁸ Muẋi uambote ki u tena kuima ibundu iaiibha, o muẋi uabolo, ki u tena ue kuima ibundu iauabha.

¹⁹ Muẋi uoso u kamba kuima ibundu iambote, a u kokela bhoxi, hé a u texi mu túbhia.

²⁰ Uila kiki, mu a ejidila ku ibundu iâ.

Oso a bokona mu diulu

²¹ Ki ene oso a ngʼila Ngana, Ngana, a kà bokona mu mbanza ia diulu; kikale ngó ió u bhanga o vondadi ia Tata iami uene mu diulu.

²² Sai avulu a kà ngʼ ambelà mu kizuʼ okio kuila: Ngana, kífua etu ki tua tele maka mu dijina dié, o mu dijina dié, anga tu kaia madimonho, mu dijina dié anga tu bhanga madiuanu mavulu!

²³ Benhobho eme nga kà a tangela, ngixi: Eme ki nga mʼ ijidile. Tundenu bhu mbandu iami, enu mu ati a ituxi.

O kuívua ni kubhanga o Maka ma mzambi

²⁴ Uoso-phe uívua o maka mamiʼ ama, anga u ma bhanga, muène u difangana ni njimu ia tungile o inzu iê bhu ndànji.

²⁵ Mvula anga i sonoka, hé bhu di bhanga masenza, ni kitembu ki bhuka, ki di vunda ku inzuʼ oio. Iene-phe ki ia lundumuka, mbata iòtunge bhu ndànji.

²⁶ Uoso dingi uívua maka mamiʼ ama, anga u kamba ku ma bhanga, muène u difangana kiôua kia tungile inzu iê bhu kisékele.

²⁷ Mvula anga i sonoka, bhu di bhanga masenza, o kitembu ki bhuka ki di vunda ku inzuʼ oio; anga i lundumuka. O kuzangiua kuaʼ nzu ioio, kuavulu.

O kutena kua Jezu

²⁸ Bhenhobho ki bhita kuila, kia zubha Jezú kuta makʼ ama, ifuẋi ia diuana o ulongelu ué.

²⁹ Mukonda muène ua a longo ni kijingu kia Ngana, ki kiene kiene kulonga jimesene jâ, jene ku a longa o Kitumu.