Matesu 5 - O Mikanda Ikola

Mambu ma Ngana Jezú ku Mulundu. Oso azediua

¹ Kia mono o ifuẋi, u banda ku mulundu. O kia zubha kuxikama, jixibulu jê ji mu sanga.

² Muène anga u jikula mu kanu diê, u kuata ku a longa, uixi:

³ A zediua jingadiama ja muẋima, mukonda o Utuminu ua Diulu uâ ene.

⁴ A zediua adila, mbata Nzambi ua kà a tululula.

⁵ A zediua alenduka, ene a lundula ixi.

⁶ A zediua ió, o kubhanga ima ia iuka a ku kuatela nzala ni dinhota, mbata hádia ekuta.

⁷ A zediua akua henda, ene ue Nzambi u a kuatela henda.

⁸ Azediua a zela o muẋima, ene à mona Nzambi.

⁹ A zediua akua ku luulula, a buisa jimvunda, ene a exana anʼ a Nzambi.

¹⁰ A zediua oso a a talesa hadi mukonda dia kubhanga ima ia kuiuka, o Utuminu ua Diulu uâ ene.

¹¹ Mua zediua enu, kia mi xinga, kia mi zukutisa, kia mi âmba ima iaibha iavulu ia makutu, mukonda diami eme.

¹² Tanenu-ku mu sanguluke! Kuma kisakidilu kienu hádia ki kala kia dikota mu diulu; mbata ni jipolofeta ja mi diangelele-ku kiene ue kia ji bhangele.

Môngua ua ʼxi. Mukengeji ua mundu

¹³ Enu muala mu môngua uaʼ xi. O môngua-phe ki u-bhua o kutouala kuê, uene au toua-hi? Ki u tena dingi kubhandulula kima, kikale a u texi, hé a u diota-diota kualʼ athu.

¹⁴ Enu mu mukengeji ua mundu. Mbonge iòtunge ku thala ia mulundu, ki i xikina ku i sueka.

¹⁵ Athu ue kene kuila a uika kandeia, nʼ a ka fute kitutu. Kikale a ka bhaka ku thandu a meza, ni ka muikine oso ala mʼonzo.

¹⁶ Kiene ue, o mukengeji uenu u muikine bhu pholo ia athu, ene a mone ima iambote i mu bhanga, ni a ximane Tata ienu uene mu diulu.

O kitumu ki kibhu-ku

¹⁷ Ki mu fike kuma eme ngeza mu bhuisa-ku o Kitumu kia Mozé mba o ulongelu ua misèsedi. Eme ki ngeza mu i bhuisa, maji ngeza mu ku i tenesa.

¹⁸ Mbata ngi mi tangela o kidi, katé bhua ka jimukina o diulu ni ixi, kana ngó kujimuka kapondo mba kama kosokoso kòfele ku Kitumu, katé bhua ka tenena o ima ioso.

¹⁹ Kienhiki, uoso ku Kitumu u tondala-ku kijila kimoxi kia ndenge, anga u longa athu ku ki tondala, muène a mu ixana ndenge mu Utuminu ua Diulu. Uoso-phe u tumaka o Kitumu ni ku ki bhanga, hé u longa ue akuá o ku ki bhanga, muène a mu ixana dikota mu Utuminu ua Diulu.

²⁰ Mbata eme ngi mi ambela na-kiu, se kuiuka kuenu ku kamba kutunda o kuiuka kua jimesene ja kulonga o Kitumu ni jifalizeu, muà lémbua kubokona mu Utuminu ua Diulu.

O kizembu ni kujibha

²¹ Enu muevu kuma akua xiahulu a ambelele, exi: Kana kujibha mukuenu. Uoso-phe u jibha mukuá u kala muêdi ua ku mu fundisa ku afundixi.

²² Eme-phe ngi mi ambela kuma, uoso u kuatela ngó mukuá njinda, u kala muêdi ua ku mu fundisa kuala afundixi. O uoso uâmba mukuá, uixi: U semenhi, u kala muêdi ku kionge kia jitata. Uoso-phe uila: U kiôua kia ngoho, u kala muêdi ua túbhia tua ifernu.

²³ Kienhiki, se u kala mu bhana ujitu ué bhu kalatódio kua Nzambi, anga u tukumuka bhenhobho kuma mukuenu ua ku luualela,

²⁴ Ujitu ué xe-u bhu kalatódio, uie hanji u di luulule ni mukuenu, uize kiua u bhane o ujitu ué kua Nzambi.

²⁵ Lenguluka ku di tambulula ni nguma ié, kiosuʼ iki uala-nê mu njila. Mukonda ki uila kana, imoxi u ku bheka kua mufundixi, o mufundixi u ku bhana ku disoladi, eie nʼa ku te mu ʼaleia.

²⁶ Ngi ku ambela kidi kuila, o muenhomo kua kà tena kutunda-mu katé bhu ua kà zubhila kufuta o kakitadi koso ka sukidila-ku ku konda.

O jiphànda

²⁷ Enu muevu kuma a ki zuela, exi: Kana kuta phànda.

²⁸ Eme-phe ngi mi ambela kuma: Uoso ngó u tonginina muhatu ni ku mu kuatela luimbi, uatenê kiá phànda ku muẋima uê.

²⁹ Kienhiki, o diesu dié dia kúdia, se diene diala ku ku bhalesa, lokola-diu u di texi dikanga. Mbata ujitu uê kota kutexi kidiandu kimoxi, ki ki soko ni kutexika mukutu uoso mu ifernu.

³⁰ Mba o lúkuaku lué lua kúdia, se luene luala ku ku bhalesa, batula-lu u lu texi dikanga. Mukonda ujitu uê kota kutexi kidiandu kimoxi, ki ki soko ni kuia mukutu uoso mu ifernu.

O ku di senga

³¹ A ki zuela, exi: Uoso uandala u senga mukajiʼê, a mu bhane mukanda ua kusenga.

³² Eme-phe ngi mi ambela kuma: Uoso u senga mukajiʼê, mukonda dia kikuma kiengi, o kia undumbu ki kiene, ua mu bhangesa kukala mukua phànda. Ni diiala u mu sakana, kia zubha ku mu senga, mukua phànda.

O kulôka

³³ Luamukuá dingi, muevu kuma akua xiahulu a ambelele, exi: Kana kulôka, kioso-phe ki ua loka kikale u ki kumbidila kua Ngana.

³⁴ Eme-phe ngi mi ambela: Kana kulôka; kana kulokela diulu, mbata kialu kia Nzambi kia ungana.

³⁵ Kana kulokela oxi, mbata bangu iê ia inama; kana kulokela Jeluzaleme, mbata mbanza ia muenexi ua dikota.

³⁶ Kana kulokêla mútue ué eʼ muène, mbata kutené kubhangesa lundemba lumoxi luzela mba luxikelela.

³⁷ O kudikunda kuenu-phe ku kale kua kuila: Kiene, kiene; kana, kana; kioso ki di bandekeza kuku, kima kia tundu ku Dimonho.

O kuvutula phonzo

³⁸ Enu muevu kuma a ki zuela, exi: Diesu mu diesu; dizu mu dizu.

³⁹ Eme-phe ngi mi ambela kuila: O dilebhu kana kubhânga na-diu. Uoso-phe u ku bhana huxi ku ditama dia kúdia, mu lunguluile ni diamukuá.

⁴⁰ Se muthu u ku xitala ni a ku-bue kazaku ké, mu ehele ue ni kapote ké.

⁴¹ Uoso ue u ku bhinjika kuenda-nê lékua, eie enda-nê lékua jiiadi.

⁴² Ua ku bhingi, mu bhane; ua-lu sota kusobha, ku mu bhane dikunda.

O kuzola o jinguma

⁴³ Enu muevu kuma a ki zuela, exi: Mukuenu u mu zola, o nguma ié u mu zemba.

⁴⁴ Eme-phe ngi mi ambela: Zolenu nguma jenu; a sambedienu kua Nzambi, oso a mi tatesa; benzelenu a mi bhubhidila, bhangenu mbote oso a mi zembe.

⁴⁵ Nda mu kale mu anʼa Tata ienu uene mu diulu. Kuma muène mukua kubhangesa dikumbi diê di bandela athu abhukumuka ni athu ambote, u tumikisa mvula ni kua ia aiuka ni ku ísueia.

⁴⁶ Abha se mu zola ngó a mi zolo enu, mu kala ni kisakidilu kiahi? Manhi ni akua kutambula lubhaku ki kiene kia bhanga?

⁴⁷ Se mu menekena ngó o jindandu jenu, muila muexi tua bhange-hi? Manhi ni akua matumbu, kejiia Nzambi, kene ue ku ki bhanga?

⁴⁸ Kikale-phe mu zubha kutenena kala kia tenena Tata ienu uenu mu diulu.