Matesu 4 - O Mikanda Ikola

Jezú a mu thendala

¹ Kutunda bhobho, Jezú a mu bheka kuala Nzumbi ia Nzambi ku mikáu iakukuta, phala Diabhu ku mu funhisa.

² O kia zubha kujila mu makuinhi auana a izuua ni makuinhi auana a usuku, u kala kiua ni nzala.

³ Diabhu, anga uiza, u mu ambela, uixi: Eie se u Monʼ a Nzambi, tuma matadiʼ ama ma kituke jimbolo.

⁴ Muène-phe u vutula, uixi: Kiosoneke kuma: O muthu ki ku mbolo ngó kua muena o muenhu, maji ku maka moso ma tunda ku dikanu dia Nzambi.

⁵ Diabhu anga u mu bheka ku mbanza iangene ia Jeluzaleme, hé u mu imanesa ku ditala-èlele dia Tembulu

⁶ Anga u mu ambela, uixi: Se u Monʼ a Nzambi, laúka bhabha; mbata kiosoneke kuma: Nzambi muene u tuma o ji-anju jê ku ku inga, a kà ku zenza bhu maku, phala ku di bhukane kinama kié ku ditadi.

⁷ Kuala Jezú: Kiosoneke dingi kuma: Kana kubhumina Ngana, muene Nzambi ié.

⁸ Luamukuá dingi, Diabhu u mu bheka ku thala ia mulundu ua di leka kinéne, anga u mu idikiza maungana moso mu ngongo ni kufumana kuâ.

⁹ Anga u mu ambela, uixi: Ima ioso iii, ngi ku bhane-iu, se u ngi fukamena eme, ni ku ngi bheza.

¹⁰ Jezú u mu vutuila, uixi: Tunda bhabha Satana! Mukonda kiosoneke kuma: Mu kubheza kikale u bheza Jihova, Nzambi ié, mune ngó u mu tumaka.

¹¹ Bhenhobho Diabhu ua mu ambudisa; o ji-anju anga jiza, ji kala ku mu xibhidila.

Jezú uia ku Ngalileia

¹² Kiki Jezú kia kʼivu kuila Nzuá a mu te mu ʼaleia, u katuka, anga uia ku Ngalileia.

¹³ Anga uxa mu Nazalé, uiza u tunga mu Kafanau, bhu mbandu ia kizanga, bhu mbambe ia Nzebulone ni Nafitali;

¹⁴ Mbé ki bhite kia zuela Izaia polofeta, uixi:

¹⁵ Oxi ia Nzebulone, oxi ia Nafitali, bhu mbandu ia kizanga, ku sámbua dia Njolodá, o Ngalileia ia matumbu.

¹⁶ Athu a xikamene mu kitombe a mono mukengeji uonéne! A xikamene kididi kia kizenji kia kalunga, kuaki mukengeji uâ!

¹⁷ Tunde mu thembuʼ omo, Jezú u kuata kiá kulonga mundu, ni kuta maka uixi: Dielenu! Kuma utuminu ua diulu, ua zukama!

Jezú uixana Jixibulu, hé u saka jihaxi

¹⁸ O kia kala mu kuenda bhu mbandu ia kizanga kia Ngalileia, u mona jiphange jiiadi, Ximá, a mu ixana Phetele, ni ndenge iê Mandele, ala mu takula uanda mu menha, kuma atona a jimbiji.

¹⁹ Muène anga u ambela, uixi: Ngi kaiedienu, ngi mi bhange kukala mu atona a athu.

²⁰ Anga a xa mandamâ bhenhobho, hé a mu kaiela.

²¹ Ki ende-ku dingi ka dikanga, u sanga jiphange jiiadi jamukuá, Tiiaku dia Zebedeu, ni ndenge iê Nzuá, ala mu bote ni tatʼ â Zebedeu, ala mu banda o manda mâ; muène anga u a exana.

²² Ene kithanganʼ okio a xa bote ni tatʼâ, hé a mu kaiela.

O mambu ma kulundu

²³ Jezu anga u nhunga Ngalileia ioso ni kulonga mu malombe mâ, ni kuta Maka ma utuminu ua Nzambi, ni ku saka jihaxi ni inema muʼ axaxi ka mundu.

²⁴ Fuma iê anga i sambuka mu Sídia ioso. Hé a kala ku mu bhekela jihaxi joso, a vulu makukata, ni iá a saluka ni madimonho, ni iá a kate kikonha, ni iá a kate kila; ene oso anga u a saka.

²⁵ Ifuẋi ia makota anga i mu nhenganana, a tundu mu Ngalileia, ni mu Dekapolo, ni mu Jeluzaleme, ni ku sámbua dia Njolodá.