Matesu 3 - O Mikanda Ikola

Nzuá dia Batizu, ni Njimbu iê

¹ Mu izuuʼ omo Nzuá dia Batizu uiza mu ditutu dia Judeia ni kukolela mundu, uixi:

² Dielenu! muehe o ituxi ienu, kuma utuminu ua diulu ua zukama.

³ Muenhú muthu a mu tanga kuala Izaia, o polofeta, uixi: Dízui dia ió u dikola mu ditutu, iudikenu njila ia Ngana, iukisenu o ikoka iê.

⁴ Nzuá muenhú u kala mu zuata thanga ia ndemba ja kamelu, u di kuta phonda ia kibha mu mbunda; o kúdia kuê mahoho, ni uiki ua ditutu.

⁵ Bhenhobho akua Jeluzaleme, ni akua Judeia ioso, ni ku másambua moso ma Njolodá, a mu kana mu ditutu.

⁶ Muène anga u kala mu ku a batizala mu honga ia Njolodá, ni kufisala o ituxi iâ.

⁷ Nzuá muène-phe kia mono ku jifalizeu ni ku jisaduseu kueza athu ku batizu iê, uixi: Enu mu ana a madiuta, nanhi ua mi dimuna kulenga o njinda ia-nda kuiza-ku, itunda kua Nzambi?

⁸ Imenu-phe ibundu ia fuama o kudiela.

⁹ Kana kukala mu kuila moxi dienu, muixi: Etu tuavu tatʼ etu Mbalahamu. Kuma ngi mi tangela-kiu kuila Nzambi ua soko-bhu kubhanga matadiʼ ama ni ma kituka ana Mbalahamu.

¹⁰ Kumbʼ idi dikuua a di tula kiá bhu kixina kia miẋi. Muẋi uoso u kamba kuima ibundu iambote, a u koka, hé a u ta mu túbhia.

¹¹ Eme ni kidi, nga mi batizala ni menha mu kudiela; uoso-phe ua ngi kaiela ku dima ua ngi tundu, eme ki nga tokala ngó ku mu ambatela o jihaii jê. Muène ua kà mi batizala ni Nzumbi Ikôla ni túbhia.

¹² O mbangu iê ia kubhiatela uiza na-iu bhu maku, o kididi kiê kia kuvundila ua-nda ku ki zelesa katé kia zubha. O jimbutu jê u ji bhongolola hé u ji bheka mu kitula; o ibhiate-phe u ioha mu túbhia ki tuene dingi kujima.

Jezú a mu batizala

¹³ Kiki Jezú u tunda mu Ngalileia, anga uiza ku Njolodá kua Nzuá, phala Nzuá a mu batizale.

¹⁴ Nzuá-phe u sota ku mu fudisa, uixi: Eme-muène nga tokala ku ngi batizala kualʼ eie, kífua eie uiza dingi ko kuami?

¹⁵ Jezú-phe u mu vutuila, uixi: Ngehele hanji kiosuʼiki; kuma kiene kia tu fuama kubhanga, mu ku kumbidila ioso iaiuka. Bhenhobho Nzuá ua mu ehela.

¹⁶ Jezú-phe kia zubha ku mu batizala, u kala mu zaúka kindala ku menha; talesa-phe, maúlu ma jikuka ku thandu diê, anga u mona Nzumbi ia Nzambi uala mu tuluka kala diêmbe, ni ku mu tula muène ku thandu.

¹⁷ Tala, bhenhobho ni dízui di tunda mu diulu, dixi: Muenhú Monʼ ami a kazola, ua ngi uabhela kiambote.