Matesu 28 - O Mikanda Ikola

Jezú u fukunuka

¹ Kiki kuila kizuua kia sábhalu kia bhiti, kuma ki ku mateka kúkia, mu lumingu, o kizuua kia dianga kia semana, Madiia dia Manda, ni Madiia dia mukuá, eza bhu mbila kutalesa-bhu.

² Talesa-phe, oxi ia tungutile kiavulu. Mukonda anju ia Ngana ia tulukile ku diulu, iu ueza, ua kundumuna o ditadi, hé u xikama-ku.

³ O kídifua kiê kala nzaji, ni izuatu iê kuzela mukuâ ni neve.

⁴ Mukonda dia uôma uê, o masoladi ala ku kilangidilu a teketa, a kituka kala afu.

⁵ Anju-phe i zuelesa ahatu, uixi: Ki mu kale ni uôma! Kuma nga mʼijiia, mua-lu sota Jezú a mu phaphele ku dikulusu.

⁶ Muène bhabha kala-bhu; ua fukunuka, uila kia mi ambelele muène. Zenu, mu tale kididi bhua zekele Ngana.

⁷ Endelenu-ku, mua kà tangele jixibulu jê: Muene ua fukunuka ku ʼalunga. Talesenu, Muène ua mi tuamenena ku Ngalileia; kuene ku mua kà di mona-nê. Eme nga mi jimbuilʼó.

⁸ Ene anga a katuka lusolo bhu mbila, ni uôma ni ngalasa iavulu, anga a lenga mu tudila jixibulu jê.

⁹ Talesa-phe, Jezú muène u takananâ, uixi: Nga mi menekena! Anga eza, a mu kuata mu inama, a mu sambela.

¹⁰ Jezú anga ua ambela, uixi: Ki mu kale ni uôma. Ndenu kà tangedienu phange jami, a katuke, a kàie ku Ngalileia, kuene kua kà ngi mona.

O Makutu ma Jijudé

¹¹ Kioso-phe Ahetu kiala hanji mu kuia, amoxi kua iá a kexile ku kilangidilu eza mu mbonge, hé a tangela jinganga ja makota o ima ioso ia bhiti.

¹² Ene-phe kia di bhongolola ni adiakimi ku Jijudé, a di longesa mudiâ, anga a bhana masoladi kitadi kia ndumba, exi:

¹³ Enu muá kela, muexi: Jixibulu jé jejile, a mu nhana mu usuku, kioso etu ki tuaii ku kilu.

¹⁴ Se nguvulu u kʼivua, tu mu bhomba, enu ki mu kale ngó ni hele.

¹⁵ Ene anga a tambula kitadi, hé a bhanga kioso kia a longesa o jinganga ja makota. O hundu iíi anga i sambuka mu Jijudé joso, ni kiki hanji a jijila ku ki zuela, katé mu kizuua kia lelu.

Jezú u tukulukila Jixibulu ku Ngalileia

¹⁶ Kuinhi dia xibulu nʼimoxi-phe, hé aia ku Ngalileia, ku mulundu kua a londekesa Jezú.

¹⁷ O kia mu mono, a mu sambela; amoxi-phe a kala ni jiphata.

¹⁸ Jezú anga uiza, u a ambela, uixi: O kutena kuoso a ngi bhana-ku eme, ni mu diulu, ni mu ngongo.

¹⁹ Enu-phe ndenu, mua ka longe jixibulu ku akua jixi joso, ni ku a batizala mu dijina dia Tata, ni dia Mona, ni dia Nzumbi Ikôla;

²⁰ ni ku a longa kualuka ima ioso kiá i nga mi tumu eme. Talenu, eme-muene ngá kala ni enu izuua ioso, katé ku dizubhilu dia mundu.