Matesu 27 - O Mikanda Ikola

Jezú a mu ambata kua Pilatu

¹ Kukia ni kimene, jinganga ja makota joso ni adiakimi a Jijudé a bhongoloka mu tetulula kioso kia jibha Jezú.

² Anga a mu kuta, aia-nê kua nguvulu Pilatu.

Juda u di jibha

³ Juda-phe, ua mu thelekalele, kia mono kuma Jezú a mu êlesa phala ku mu jibha, u diela ioso ia bhange, anga u bheka dingi makuinhi atatu a itadi ia phalata ku jinganga ja makota ni adiakime a Jijudé, uixi:

⁴ Nga te kituxi mu thelekala o manhinga ma muthu uaiuka! Kuala ene-phe: Etu kia tu kuatelahi? Maka mé eie. Eie-muène soka na-kiu!

⁵ Juda muène bhenhobho, u zangula itadi ia phalata, hé u i takula bhoxi mu Tembulu, anga a tuda-bhu, uia u di nhenga.

⁶ Jinganga ja makota anga ji katula itadi ia phalata, exi: Mu Kitumu kietu, ku ki ta mu kofidi ki kôla, kuma kia sumbu manhinga.

⁷ Kia zubha ku di longesa mudiâ, a sumba na-kiu kididi kia Mumbiʼa Jímbia, phale kufúnda jinga-bhu athu a tunda ku makanga.

⁸ Kididi kiókio kiene kia kʼixanena, Kididi kia Manhinga, katé mu kizuua kia lelu.

⁹ Bhenhobho bhua bhiti dingi kima kia soneka Jelemiia, polofeta, uixi: A tambula makuinhi atatu a itadi ia phalata, kuma iene o suilu ia muthu a mu te uenji kuala amoxi-moxi-mu ku anʼa Izalaiele;

¹⁰ anga a i bhana mu kididi kia mumbiʼa jímbia, kala kia ngi tumu kubhanga kuala Ngana.

Jezú bhu pholo ia Pilatu

¹¹ Kiki Jezú uemana bhu pholo ia nguvulu, o nguvulu anga u mu ibhula, uixi: Eie u sobha ia Jijudé? Jezú ua mu kumbulula, uixi: Kiene muene. Eie ua kiambe.

¹² Kia mu tatela o jinganga ja makota ni adiakimi ku Jijudé-phe, muène ka zuela kima.

¹³ Pilatu anga a mu ambela, uixi: Kuala kuívua o ima iala ku ku tatela o jimbangi?

¹⁴ Muène-phe ka kumbulula, ni dízui dimoxi ngó; nguvulu anga u diuana kiavulu.

Jezú, inga Balaba?

¹⁵ Bhu Fesa ia Phasu-phe, nguvulu mukua kuila u jituna pelezu imoxi, uoso a mu bhinga-nê kuala o mundu.

¹⁶ Thembu íii anga a kala ni pelezu imoxi ia fumana, a mu ixana Jezú dia Balaba.

¹⁷ Kioso-phe mundu kia bhongolokʼiki, Pilatu ua ambela, uixi: Nanhi mua mu solo ngi mi jituina-nê? Jezú dia Balaba, inga Jezú a mu ixana Kristu?

¹⁸ Mbata Pilatu muene ua kʼijiia kuila o Jezú a mu thelekala ngoho mukonda dia dixinga dia mu kuatelele ene.

¹⁹ Kioso ue kia xikama Pilatu bhu kibhuna kia kufundisila, mukajiʼê u mu tumikisa njimbu, uixi: Muthu ió kala ni kituxi, eie kana ku di ta mu mulonga uê; kuma ku nzoji lelu nga mono phaxi iavulu mukonda diê-muène.

²⁰ Jinganga ja makota-phe, ni adiakimi a Jijudé, a kala mu bhomba o mundu, phala a bhinge Balaba, o Jezú a mu jibhe.

²¹ Nguvulu anga u kumuna, uixi: Ku kiiadʼiki, uebhi ngi mi jituinanê? Exi: Balaba.

²² Kuala Pilatu: O Jezú-phe, a mu ixana Kristu, ngi mu bhanga kiebhi? Ene oso exi: A mu phaphele ku dikulusu!

²³ Kuala muène: Phala-hi? Muène ua te kituxi kiahi? Ene-phe a di kola dingi kiavulu, exi: A mu phaphele ku dikulusu!

²⁴ Pilatu-phe kia mono kuma ka lende kima, maji bhuanda kusalumuka mvunda, u tuma kutakana menha, anga u sukula o maku bhu pholo ia mundu, uixi: Ki ki kale kituxi kiami, kia manhinga ma muthu iú uaiuka; enuʼenu sokenu-na-kiu.

²⁵ Mundu uoso anga u kumbulula, exi: Manhinga mê ma kale ku thandu dietu, ni ku thandu dia anʼetu.

²⁶ Muène anga u a jituina Balaba; o Jezú-phe u mu bhesa jixikote, anga u mu thelekala phala ku mu jibha.

Masoladi ma bhanga kasèkelu kua Jezú

²⁷ Masoladi a nguvulu Pilatu, anga ambata Jezú ku lumbu lua dizemba; anga a bhongolola o kibuka kiâ kioso.

²⁸ Anga a mu zula, a mu zuika kithanga kia kusuka.

²⁹ Anga enda kitundu kia jithangu ja minha, a mu zuika-kiu ku mútue, hé a mu kuatesa dianga bhu lúkuaku luê lua dilu. Anga a mu fukamena bhu pholo iê, a mu bhanga kasèkelu, exi: Tana-ku, u sobha ia Jijudé.

³⁰ Anga a mu ṗhamena mathe, a mu tambula dianga, a mu beta na-diu mu mútue.

³¹ Kia zubha ku mu bhanga kasèkelu, a mu zula kithanga kia kusuka, hé a mu zuika o izuatu iêmuene, anga aia-nê ku mu phaphela ku dikulusu.

Jezú a mu phaphela ku dikulusu

³² Kia kala mu tunda, a takana ni muthu, mukua Silene, dijina diê Ximá. Muenhú anga a mu bhinjika kuia-nâ, ni ambate dikulusu dia Jezú.

³³ Kia bhiẋila bhu kididi a kʼixana Ngolongota, (ku ki jimbulula: Kididi kia Kiholongonho).

³⁴ A mu bhana vinhu iòlunge ni ndululu. Muène-phe kia i lola, nguaiê ku i nua.

³⁵ Kia zubha ku mu phaphela ku dikulusu, a uana izuatu iê ni ku i tela jisorte, phala kubhitisa o maka ma soneka polofeta, uixi: A uana mudiá o izuatu iami, divunga diami a di tela jisorte.

³⁶ Anga a xikama, a kala ku mu langidila bhenhobho.

³⁷ Ku mutuelu uê anga a ta-ku ka dibaia kòsoneke, kala ku mu xitala, exi: Muenhú Jezú, Sobha ia Jijudé.

³⁸ Kienhókio ni ifumbe iiadi a i phaphela-nê kumoxi ku makulusu, iú ku mbandu ia dilu, o iú ku kiasu.

³⁹ Oso ala kubhita-bhu anga a mu xinga, ni kubhuka ku mítue, exi:

⁴⁰ Eieʼó, tata! U bula o Tembulu, anga u i tunga mu izuua itatu! Di bhulule-ze! O ki kala-phe u Monʼa Nzambi, tuluka ku dikulusu!

⁴¹ Ni jinganga ja makota ni jimesene ja kulonga o Kitumu, ni adiakimi a Jijudé, kiene ue kia mu sebulula, exi:

⁴² Ua bhulula athu engi, o ku di bhulula muène ka tena! Abha ki muene Sobha ia Izalaiele? Kiki-phe a tuluke ku dikulusu, etu ni tu mu xikane!

⁴³ Ua kexi mu kudielela Nzambi, kiki a mu kudile, se ua mu mesena; kuma uambe uixi: Ngi Monʼa Nzambi!

⁴⁴ Ni ifumbe ue, a a phaphela-nê kumoxi ku makulusu, a muʼondolola kienhʼiki.

O ufilu ua Jezú

⁴⁵ Kiki tunde ku mediia mu ola ia kasamanu, kʼoxi ioso ku kala usuku mu ola jitatu, katé mu ola ia kàvua.

⁴⁶ Ku bhixila mu ola ia kàvua, Jezú u di kola ni dízui dia suina, uixi: Eli, Eli, lama sabachthani? Ku ki jimbulula, uedi: Nzambi iami, Nzambi iami, ua ngʼ ehelela-hiʼá?

⁴⁷ Amoxi emana-bhu, kia kʼivu, exi: Uexana Elija.

⁴⁸ Mukuá anga u lenga kindala, u zangula jiponja, u ji bonda mu vindangele, u ji suikika ku kamuẋi, u mu nuisa.

⁴⁹ Akuá-phe exi: Ambula, tu mu mone mba Elija uiza ku mu kudila!

⁵⁰ Jezú anga u di kola dingi luamukuá ni dízui dia suina, anga u zubha muenhu uê.

⁵¹ Kibatulu kia Tembulu anga ki tanduka mu ʼaxaxe, tunde ku thandu katé bhoxi. Oxi anga i tunguta, matadi ma baza;

⁵² jimbila anga ji jikuka; mikutu iamukuá ia akua Ngana aia okulu ku kilu, anga i fukunuka;

⁵³ Jezú muène ue kia zubha kufukunuka, ene a tunda mu jimbila, hé a bokona mu Mbonge Iangene, anga a tukulukila athu avulu.

⁵⁴ Bhenhobho kabhitangu ni masoladi iá oso aia-nê mu langidila Jezú, kia mono oxi ia tunguta, ni ima ioso ia bhiti, a kala kiavulu ni uôma, exi: Kia kidi kiene, muenhú monʼa Nzambi!

⁵⁵ Ni ahatu avulu iá bhobho, emana mu kanga ni ku mu tala, a kaiela Jezú tunde mu Ngalileia, ni ku mu sedivila.

⁵⁶ Mudiâ mu kala ni Madiia dia Manda, ni Madiia mamʼ a Tiiaku ni Zuze, ni mamʼ a anʼ a Zebedeu.

Jezú a mu fûnda

⁵⁷ Kutula mu ngoloxi, kuila kuma kua fulamana kiá, kuiza muthu, mukua itadi, u tunda ku Limateia, dijina diê Zuze, muène ue xibulu ia Jezú.

⁵⁸ Zuze muenhú anga uia kua Pilatu, u bhinga o mukutu ua Jezú. Pilatu anga u tuma ku mu bhana-u.

⁵⁹ Zuze anga u katula kimbi, u ki futa mu dilasola diazele dia linhu ia fina.

⁶⁰ Anga u ki tula mu mbila iê-muène ia ubhe ia jikuile mu ndànji. Anga u kundumuna kiditadi kiònene bhu muelu ua mbila, anga uiê.

⁶¹ Madiia dia Manda iú bhobho, ni Madiia dia mukuá axikama bhu mbanduʼa mbila.

O mbila a i langa ku masoladi

⁶² Mu kimene, kizuua kia kaiela ku Kiiudikilu, kuila kizuua kia Sesa kia bhiti kiá, jinganga ja makota ni jifalizeu a bhongoloka kua Pilatu, exi:

⁶³ Ngana, etu tua lembalala kuma mukua makutuʼó, kia kexile hanji ku muenhu, ua tangele, uixi: Izuua itatu ki i bhita, nga kà fukunuka.

⁶⁴ Kiki-phe tuma kulanga o mbilʼoio ni muanu uoso, katé kizuua kia katatu; phala ki ki bhite kuila jixibulu jê jiia mu usuku hé ji mu nhana, nʼa kà tangele o mundu, exi: Ua fukunuka ku ʼalunga, o makutu à keza-ku ni a kale kota, a diangele-ku ni a kale ndenge.

⁶⁵ Pilatu anga ua ambela, uixi: Masoladi a langa, enu-nâ; ndenu, kà langienu o mbila kioso ki muejiia.

⁶⁶ Ene anga aia, o mbila a i kolesa ni ditadi, ni ku di jika idimbu, anga a ta-ku masoladi ku kilangidilu.