Matesu 25 - O Mikanda Ikola

Maka amoxi ku mulundu ua Midiva: Kifika kia kuinhi dia ilumba

¹ Kienhokio Utuminu ua Diulu ua kà di fangana ni kuinhi dia ilumba, ia katula tundeia tuâ, anga i tunda mu kauidila ngà-iala.

² Kitanuʼiki kia tobho, kitanuʼiki kia dimuka.

³ Mbata ilumba ia tobho kia katula tundeia tuâ, kambata dingi ni maji.

⁴ Iá-phe a dimuka, ambata ni maji mu jithenda, kumoxi ni tundeia tuâ.

⁵ Kiosuʼiki-phe ngà-iala ua kokoloka, ene oso a koxila, aia ku kilu.

⁶ Mu kaxi ka usuku-phe evu-ku nzôngo, exi: Ngà-iala iú uizʼó! Tundenu mu mu kauidile.

⁷ Ilumba ioso anga i fundumuka, i iudika tundeia tuâ.

⁸ O ilumba ia tobho anga i ambela akuá a dimuka, exi: Ku maji menu, tu bhanienu-ku tuófele; kuma tundeia tuetu tu jima.

⁹ Kuala ilumba ia dimuka: Ki ki xikina. Imoxi ki tu soko, ni etu ni enu. Inda ndenu ku abadi, enu uenu mu sumbe.

¹⁰ Kioso-phe ki aii mu kusumba, ngá-iala u tula. Oso a di iudika, anga a bokona-nê ku fesa ia ubhanga, dibhitu, ia a di jika.

¹¹ Kathangana, ilumba iamukuá i tula, exi: Ngana, Ngana, tu jikuile!

¹² Muene-phe u a vutuila, uixi: Kidi kiene ngi mi ambela, ki nga mʼ ijiia!

¹³ Enu uenu langidilenu-phe, kuma kizuua ki mua kʼijiia, kithangana ki mua kʼijiia.

Maka amoxi ku mulundu ua Midiva: O kifika kia jitalendu

¹⁴ Mbata Utuminu ua Diulu ua di fangana ni muthu ua-nda kuia oxi iengi. U ixana jiselevende jê, anga u ji bhana kutambula konda ia jimbongo jê.

¹⁵ Iú anga u mu bhana talendu jitanu ja kitadi; o iú jiiadi, o iú imoxi; kala muthu kioso kia soko na-kiu; anga u katuka njila iê.

¹⁶ Kindalʼokio, a mu bhana talendu jitanu, uia u ji ta uenji, anga u nganhala-ku jitanu jamukuá.

¹⁷ A mu bhana jiiadi, kiene kimoxi, u nganhala-ku jiiadi jamukuá.

¹⁸ Iú-phe ua tambula imoxi, uia, u kanda bhoxi, kitadi kia ngana iê anga u ki sueka.

¹⁹ Kuila thembu ia lebha kiá, mukua jiselevendeʼojo uiza, anga u bhanga-nâ jikonda.

²⁰ Ua tambuile talendu jitanu anga uiza, u bheka jitanu jamukuá, uixi: Ngana eie ua ngi bhele talendu jitanu. Tala, nga nganhala-ku dingi jitanu jamukuá.

²¹ Kuala ngana iê: Kiauabha! Diebhe-ku selevende iambote, ia fiiele. Eie ua kexi fiiele mu imbamba iófele, ngi ku zangeleka ku imbamba iavulu. Bokona mu ngalasa ía ngana ié.

²² Mukuá, ua tambuile talendu jiiadi, anga uiza, uixi: Ngana, eie ua ngi bhele talendu jiiadi. Tala, nga nganhala-ku dingi jiiadi jamukuá.

²³ Kuala ngana iê; Kiauabha! Selevende iambote ia fiiele. Eie ua kexi fiiele mu imbamba iófele, ngi ku zangeleka ku imbamba iavulu. Bokona mu ngalasa ia ngana ié!

²⁴ Mukuá ue, ua tambuile talendu imoxi, uiza, uixi: Ngana, eme nga kuʼijiia u muthu ua bhonzo! Bhuma kua kuu-bhu, bhene bhu u muna; o bhuma kua phaphe-bhu, bhene bhu u bhongolola.

²⁵ Uôma iú ua ngi kuata, eme ngele, talendu ié nga i suekele bhoxi. Tala, o kié ki-kiêʼiki.

²⁶ Kuala ngana iê-phe: Eie ua bhukumuka, u kilalu kia selevende! Eie ua ngʼijila kuila, bhuma ki nga kuu-bhu, bhene bhu ngi muna, bhuma ki nga phaphe-bhu, bhene bhu ngi bhongolola.

²⁷ Hinu-phe kitadi kiami ua ki bhana ku akua kubilula, o kingezʼiki o kiami ngeji ku ki tambula ni avasu iê.

²⁸ Talendu iê tambulenu-iu, mu i bhane ió mukua dikuinhi.

²⁹ Mbata uoso uala kiá, a mu bhana nʼa kale ni kiavulu. Uoso-phe kala, katé ni kiki kiofele kiala na-kiu, a mu tambula-kiu.

³⁰ O selevende íii kuma ki ia sedivila kima, mu texienu ku kanga kua vundu. Kuenhoko kuene kuà kala o ku dila ni ku di kokota ku mazu.

Dizubhilu dia Maka ku mulundu ua Midiva: O kufundisa kua kizuua kià suka-ku. O jimbudi ni jihombo

³¹ Mu kuzubha maka Jezú uixi: Kià keza Monʼa Muthu-phe, ni ungana uê, kumoxi ni ji-anju joso, ua kà xikama ku kialu kiê kia ungana.

³² Bhu pholo iê bhenhobho bhua kà bhongoloka akuajixi joso, muène anga u a tungula, kala mubidi u tungula jimbudi mu jihombo.

³³ Jimbudi ua kà ji bhaka ku lúkuaku luê lua dilu; o jihombo-phe ku kiasu.

³⁴ Muenexi anga uà kʼambela iá ala ku dilu diê, uixi: Zenu a mi zediuisa kuala Tata iami! Zenu mu lundule o Ungana, a mi iudikila na-u kuala Tata iami tunde ku dimatekenu dia ʼxi.

³⁵ Kuma eme nga kexile ni nzala, enu mua ngi bhana kúdia; nga kexile ni dinhota, enu mua ngi bhana kúnua; nga kexile ngi mosonhi, enu mua ngi langeka mu mabhata menu.

³⁶ Nga kexile ni tuẋi, enu mua ngi zuika; nga kexile mu kata, enu mua ngi tambula konda; nga kexile mu ʼaleia, enu mueza ku ngi hindula.

³⁷ Enhá athu aiuka, a kà kumbulula, exi: Ngana, kizuua kiebhi ki tua ku muene ni nzala, anga tu ku bhana kúdia? Mba ni dinhota, anga tu ku bhana kúnua?

³⁸ Kizuua kiebhi ki tua ku muene u musonhi, anga tu ku langeka mu jinzu jetu? Mba ni tuẋi, anga tu ku zuika?

³⁹ Kizuua kiebhi ki tua ku muene ni kukata, mba mu ʼaleia, anga tu ku kudila?

⁴⁰ Muenexi ua kà kumbulula, uixi: Kidi kiene ngi mi ambela kuila: Kioso ki mua bhange jiphange jamiʼji ja ndenge, eme-muène mua ngi bhange-kiu.

⁴¹ Muène anga ua kʼàmbela iá ala ku kiasu: Tundenu bhu mbandu iami, enu a mi bhubhidila kuala Nzambi! Ndenu mu túbhia ki tuà jima, a tu iudikila Diabhu ni ji-anju jê!

⁴² Kuma eme nga kexile ni nzala, enu ki mua ngi bhana kúdia; nga kexile ni dinhota, enu ki mua ngi bhana kúnua.

⁴³ Nga kexile ngi musonhi, enu ki mua ngi tambulula mʼonzo jenu; nga kexile ni tuẋi, enu ki mua ngi zuika. Nga kexile mu kata, ni mu ʼaleia, enu ki mua ngi kudila.

⁴⁴ Ene a kà kumbulula, exi: Ngana, kizuua kiebhi ki tua ku muene ni nzala, mba dinhota, mba u musonhi, mba ni tuẋi, mba mu kukata, mba mu ʼaleia, anga tu kamba ku ku bhindumuna?

⁴⁵ Muène ua kà kumbulula: Kidi kiene ngi mi ambela: kioso ki mua kamba kubhanga ku jiphange jamiʼ ji ja ndenge, Eme-muème mua kamba ku ngi bhanga-kiu.

⁴⁶ Iá-phe a kàia ku phaxi ki iabhua, o iá aiuka, ku kuenhu ki uàbhua.