Matesu 24 - O Mikanda Ikola

Jezú ku Mulundu ua Midiva, u tanga ima hinu iiza-ku

¹ Jezú anga u tunda mu Tembulu, u kala mu kuia njila iê; jixibulu anga ji mu zukama, phala ku mu idikiza jinzu ja Tembulu.

² Muène-phe u a kumbulula, uixi: Ima ioso iíi mua i mono, kuambe? Kidi kiene ngi mi ambela, bhenhabha ni ditadi dimoxi ngó hinu ki di xala-bhu ku thandu dia mukuá, dià kamba ku di lundumuna.

O dimatekenu dia malamba

³ O kia xikama ku mulundu ua Midiva, jixibulu jiza kua muène ubheka uâ, exi: Tu tangele, ima iíi mba ia kà bhita thembu kuxi? Kijimbuete kiê kiahi, kia kutukuluka kué, ni kia dizubhilu dia mundu?

⁴ Jezú anga u a vutuila, uixi: Alukenu, kana muthu a mi jimbidise.

⁵ Kuma avulu à keza mu dijina diami ni kuila: Eme ngi Kristu! A kà jimbidisa athu avulu.

⁶ Muà kèvua ita, ni jingolokela ja ita; talenu, miẋima ki i mi titile. Mbata ima iíi ia bhingi i dianga kubhita, maji ki diene luua o dizubhilu.

⁷ Mbata akua ʼxi imoxi a kà di kuata ni akua ʼxi iamukuá; kilômbo kia kà balukila kilômbo kiamukuá; kua kà kala nzala, ni oxi kutunguta mu ididi iavulu.

⁸ Ima ioso iii-phe dimatekenu ngó dia malamba, kala misusu ia muhatu ua-nda kuvuala.

⁹ Kienhókio, a kà mi bhakula mu ku mi talesa hadi, ni ku mi èlesa, ni ku mi jibha. A kà mi zemba kuala akua jixi joso mukonda dia dijina diami.

¹⁰ Kienhókio, avulu à keha kuxikana, hé a kà di bhala. A kà di bhanga ufe, a kà di zemba mudiâ.

¹¹ Bhua kà tukuluka jipolofeta javulu ja makutu, ji kala mu jimbidisa mundu uavulu.

¹² Mukonda dia úsueia kuvula, ku kala athu avulu, oʼhenda iâ i zonda.

¹³ Maji uoso-phe u kolokota katé bhu dizubhilu, muène uà bhuluka.

¹⁴ O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.

Maka amoxi ku mulundu ua Midiva: O thembu ia kubhondalala

¹⁵ Hinu-phe ki mu mona o Kisunji ki buidisa mundu, kia tangele polofata Daniiele, kiemana bhu kididi kikôla, uoso u tanga a tongolole.

¹⁶ Kienhókio oso ala mu Judeia a kà lengele ku milundu.

¹⁷ Uoso uala ku thandu dia ʼnzo iê a lengele kuengi ni lusolo, ka tuluke hanji mu katula o imbamba iê mʼonzo.

¹⁸ Uoso uala ku mukáu kʼaluke dingi kubhata mu kutakana kizuatu kiê.

¹⁹ Lamba dia ahatu ió oso a kà kala ni mavumu, a ka kala mu kuamuisa, mu izuua ienhoio!

²⁰ Sambenu-phe kua Ngana Nzambi, phala o kulenga kuenu, ki ku bhite bhu thembu ia mbambi, mba mu kizuua kia sábhalu!

²¹ Kuma thembu ioio o phaxi iê, kiluua ngó i kala-ku, tunde ku dimatekenu diaʼxi katé ni kiki; o ku hádia ue ki ia kà kala-ku dingi.

²² Maji o Ngana Nzambi, izuua ienhoio ia phaxi, ua i tolesa. Mbata o izuua ienhoio, se a kamba ku i tolesa, kana xitu i bhuluka. Maji mukonda-phe dia akua Nzambi ósole, izuʼuoio a kà i fikisa.

²³ Kienhókio se kukala muthu u ku ambela: Talesa! Kristu iú kuku, mba iú kuku, mba iú koko, kua kà xikane.

²⁴ Mbata kua ká tukuluka Jikristu javulu ja makutu, ni jipolofeta ja makutu. Ene à kedikiza isuma ni madiuanu mavulu, katé se kuila ki xikina, ni athu a Nzambi ene ósole, eji ku a jimbidisa.

²⁵ Talenu, eme nga kalanga ku mi dimuna.

²⁶ Uila kiki, kia kuila: Muene iú ku ditutu! kalé, kuie-ku. Iú mu xilu mumu, kà ditune, ku xikine.

²⁷ Mbata mukuâ ni kioso ki teleka nzaji hé i di monekena tunde ku thunda katé ku luiji, kiene ue kia kà kala o kutukuluka kua Monʼa Muthu.

²⁸ Bhuoso bhu kala o kisasu bhene bhu bhongoloka o jiholokoko.

Maka amoxi ku mulundu ua midiva: O kuiza kua Monʼa Muthu

²⁹ Jezú uixi dingi: Kutunda ku phaxi ia izuuʼ oio, dikumbi di vunda, o mbeji i kamba kumuika, o jithethembua ji laúka ku diulu, jinguzu ja maúlu ji tunguta.

³⁰ Kiene kiua kia kà tukuluka o kijimbuete kia Monʼa Muthu ku diulu. Miji ioso mu ngongo anga i kala mu dila, kia kà mona Monʼa Muthu iú uiza ku matuta ma diulu, ni nguzu ni fuma iavulu.

³¹ Muène ua kà tuma o ji-anju jê ni dízui dia koloneta, anga ji bhongolola athuʼê ósole ku itembu iuana, tunde kua tundu o diulu katé ku dia suku.

O disá dia mufiku

³² Ku mufiku-phe di longienu-ku kifika kiê. Luthangu luê ki u lu mona luauisu kiá, luandeka kubuingita, mu kʼijiia kuma mvula ia zukama.

³³ Kienhiki enu uenu, ki mua kà mona ima ioso iíi, ijiienu-kiu kuma muène ua zukama, uala kiá bhu muelu.

³⁴ Kidi kiene ngi mi ambela, kuma muiji iú ki ua kà buila, katé ki bhua kà bhita ima ioso iíi.

³⁵ Oxi ia kà jimuka, ni diulu, o Maka mami-phe, ki mà jimuka.

Maka amoxi ku mulundu ua Midiva: O kulangidila

³⁶ Kizuuʼ okio-phe ni kithangana kiê, kana kuthu ua kʼijiia, né ji-anju mu diulu, né o Mona, kikale Tata muène ngó.

³⁷ Uila kia kexile mu izuua ia Noué, ni kia kà tukuluka Monʼa Muthu ue kiene.

³⁸ Mbata kia kexile mu izuuʼomo, kioso dilúviu kiluua diza, a kala mu kúdia, a kala mu kúnua, ahatu ni mala a kala mu sakana, a bhana mu sakana, katé kizuua kia bokona Noué mu álaka.

³⁹ Kejidile kima katé dilúviu dia menha ki dia tula dí dia a kungulula ene oso. Ni kia kà tukuluka Monʼa Muthu ue kiene.

⁴⁰ Kienhókio mala kiiadi a kà kala mù bhanga kikalakalu ku mukáu, iú a mu ambata, mukuá a mu xa.

⁴¹ Ahatu kiiadi a kà kala mu huha bhu ditadi, iú a mu ambata, mukuá a muxa.

⁴² Langidilenu-phe! Mbata kizuua kià keza Ngana ienu ki mua kʼijiia.

⁴³ Ijiienu-kiu, se mukua ʼnzo uejidile kithangana kioso kia-nda kuiza muíi, ueji kulangidila, keji kuehela inzo iê ku i kanda.

⁴⁴ Kienhiki, enu uenu kalenu polondo. Mbata kithangana ki mua ki fikile, kiene kia kà tukuluka o Monʼa Muthu.

O selevende ia fiiele ni iaiibha

⁴⁵ Nanhi-phe selevendeʼoio ia fiiele, ia dimuka, ngana iê ua mu lekela kutambula konda ia dibhata diê, ku a uanena kúdia kuâ mu ola joso ja tokala?

⁴⁶ Selevendeʼoio i zediua, kʼiza ngana iê ni a mu sange kiene kiala mu bhanga!

⁴⁷ Kidi kiene ngi mi ambela, kuma u mu bhana kutambula konda ia ima ioso iala na-iu.

⁴⁸ Selevendeʼoio iaiibha-phe, kià kela ku muẋima uê, uixi: Ngana iami, ki lelu eza!

⁴⁹ Anga u kuata kubeta jiselevende ni akuá, ni kúdia ni kúnua kumoxi ni jihôlua;

⁵⁰ mukua selende iê ienhoio ua kà tukuluka kizuua muène ka ki fikile, ni kithangana muène ka kʼijidile.

⁵¹ Anga u mu bhana kibetu kiavulu, u mu bhana kididi ni akua mangonha. Kuene kuà kala o kudila ni ku di kokota ku mazu.