Matesu 23 - O Mikanda Ikola

Jezú uidikiza o mangonha ma Jifalizeu

¹ Jezú anga u kuata kuambela ifuẋi ni jixibulu jê, uxi:

² O jimesene ja Kitumu ni jifalizeu a xikama bhu kibhuna kia kulombolola o Kitumu kia Mozé.

³ Mukonda dia kiki, ima ioso ia mi ambela kubhanga, bhangenu-iu, alukenu-iu. Maji o ikalakalu iâ-phe, kana ku i kaiela, kuma a zuela, maji kene ku ki bhanga.

⁴ Akuta imbamba ia neme, ia bhonzo ku i ambata, anga a i tuika athu bhu isuxi, ene-phe ni ku i setula ngó ni mulembu, nguâ.

⁵ Ikalakalu iâ ioso-phe, a i bhangela ngó phala athu ku a mona: Talenu o iẋimbu ia zanze ia Maka ma Nzambi, ia soneka phala ku ita bhu mabhômo ni ku maku! Kengelelenu kioso kia kulu o mixiku ia izuatu iâ!

⁶ A zola ididi ioso ia beta kuiuka mu jifesa, ni ibhuna ia ukota mu jinzu ja kusambela Nzambi.

⁷ A uabhela ue ku a menekena ni ujitu bhu itanda kuala athu, ni ku a ela Mesene.

⁸ Enu-phe kana ku mʼila Mesene. Kuma sai Mesene ienu imoxi, enu oso mu jiphange.

⁹ Ki mu ile muthu mu ngongo, Tata, kuma sai Tata ienu imoxi, uene mu diulu.

¹⁰ Kana ku mʼila ue Jingana, kuma sai Ngana ienu imoxi, muène Kristu.

¹¹ Uoso-phe dikota mudienu, a kale ngàmba ienu.

¹² Uoso u di zangeleka, a kà mu tululula; ni ió uoso u di tolesa, a kà mu zangeleka.

Jezú u bazela o Jifalizeu

¹³ Enu-phe lamba dienu, mu akua kulonga kitumu ni enu mu jifalizeu, mu akua mangonha! Mukonda ku Utuminu ua diulu mua jika-ku ku pholo ia athu, enʼ uenu kubokona nguenu; ni iá andekene kubokona, ki mu a ehela. [

¹⁴ Lamba dienu, mu jimesene ja kulonga Kitumu ni enu mu jifalizeu, mu akua mangonha! Kuma atudi mu a bhanga ufe, hé mu dia o mabhata mâ, uii uenu anga mu u suekela mu kubhana misambu ialebha! Kiene ki mua kaú tambuila kaxtiku ka beta ukota!]

¹⁵ Lamba dienu, mu jimesene ja Kitumu ni enu mu jifalizeu, mu akua mangona! Kuma mu nhungana kalunga ni oxi mu kusota kubhanga ngó xibulu imoxi; o muthu kia kala kiá xibulu ienu, mu mu bhangesa ku mi tunda luiadi mu kukala monʼa ifernu, enu ndenge.

¹⁶ Lamba dienu, mu asonguedi a ifôfo! Muala kulonga kuila: Uoso u lokela Tembulu, ki kima; uoso-phe u lokela ulu ua Tembulu, ió ua di kutu.

¹⁷ Mu ioua, mu ifôfo! Ki kala kota kiebhi, o ulu, inga o Tembulu i kôlesa o ulu?

¹⁸ Muixi dingi: Uoso u lokela kalatódio, ki kima; uoso-phe u lokela ujitu ku thandu a kalatódio, ió ua di kutu.

¹⁹ Mu ifôfo! Ki kala kota kiebhi, o ujitu, inga o kalatódio ka kôlesa ujitu?

²⁰ Kienhîki uoso u lokela kalatódio, ua lokela kalatódio ni ima ioso ia tula ku thandu diê.

²¹ Uoso u lokela Tembulu, ua lokela Tembulu iene ni Nzambi ua tunga momo.

²² Uoso ue u lokela diulu, ua lokela kialu kia Nzambi kia ungana, ni muène ua xikama-ku.

²³ Lamba dienu mu jimesene ja kulonga o Kitumu ni enu mu jifalizeu, mu akua mangonha! Kuma mu bhana kua Nzambi o dijimu katé ni dia olatelá, ni tu máfue dingi tua kutoua ni tua kominhu; maji ima-phe ia kidi, ia kate, ku Kitumu, o kufundisa mu kidi, o kukuatela henda, o kukumbidila, mu kamba ku i bhanga; hinu o iíi mua i bhange, o ioio ue ki i kambe.

²⁴ Mu asonguedi a ifôfo! Mua bhingi kaluhamue katé mua ka kenze, o kamelu-phe mu ka minha!

²⁵ Lambadienu, mu jimesene ja Kitumu ni enu mu jifalizeu, mu akua mangonha! Kuma mu zelesa ku kanga dia kopho ni dilonga, moxi-phe muezala uíi, ni ufumbe, ni uhôlua.

²⁶ U falizeu ia kifofo! Dianga hanji kuzelesa moxʼa kopho ni dilonga, phala o ku kanga ue ku zediê kiua!

²⁷ Lamba dienu, mu alongi a Kitumu ni enu mu jifalizeu, mu akua mangonha! Kuma mua difangana jimbila jókunge hàla jí jazele. Ku kanga mu ji mona jauabha, moxi manhi muezala ifuba ia athu áfua, ni dixidilu dioso.

²⁸ Enu uenu kiene ki muala! Ku kanga athu a mi mona kuma mua iuka, moxi-phe muezala mangonha ni úsueia, ni ituxi ioso.

O kaxtiku ka akua mangonha

²⁹ Lamba dienu, enu muene mu longa o Kitumu ni enu mu jifalizeu, mu akua mangonha! Kuma mu tunga ni kuiuka kuoso o jimbila ja jipolofeta, mu kembesa ku iina ia athu aiuka,

³⁰ muixi: Se tua kexile-ku, mu izuua ia jitata jetu, hinu ki tuejile ku di bhaka-nâ kumoxi mu kuzunza o manhinga ma misèsedi.

³¹ Kienhiki muala mu jimbangi, kuma mu anʼa enhó a jibhile o jipolofeta.

³² Izalesenu o nzôngo ia jitata jenu!

³³ Mu jinhoka, mu anʼa madiuta! Mua-nda kulenga kiebhi o kaxtiku ka ifernu?

³⁴ Kienhiki, talesenu, ngi mi tumikisa jipolofeta ni jinjimu ni jimesene ja kulonga. Enu-phe amoxi-mu mua-nda ku a jibha, amukuá mua-nda ku a phaphela ku makulusu, amoxi mua-nda ku a beta mu malombe menu, ni ku a kaia ku mabhata-mabhata.

³⁵ Phala o manhinga moso ma athu aiuka ma dizunza mu ngongo ni ma kèza ku thandu dienu, tunde ku manhinga ma Abele, o muthu uaiuka, katé ku manhinga ma Zakadiia, monʼa Balakiia, mua mu jibhila bhu kaxi dia kididi kikôla ni kalatódio.

³⁶ Kidi kiene ngi mi ambela: Ima ioso iíi ià keza ku thandu dia muiji uenhú.

Jezú u didila Jeluzaleme

³⁷ Uaué! Jeluzaleme, Jeluzaleme tata! Ua bhingi jipolofeta u ji jibha, akunji a tuma Nzambi ko-kué, éʼ u a bûba ni matadi! Lukuxi luosʼulu lu ngandalele kubhongolola anʼé kumoxi, kala sanji ki i bhongolola tuana tuê moxi a mabhabha, enu-phe nguenu!

³⁸ Talesa, kilômbo kié kià xala ngundu.

³⁹ Kuma ngi mi ambela: Tunde kiki, ki mu ngi mono dingi, katé bhuoso bhu mua kèla: A tane-ku uoso uiza mu dijina dia Ngana.