Matesu 21 - O Mikanda Ikola

Jezú u bokona mu Jeluzaleme ni ku mu tanesa kuala o mundu

¹ Kia zukama mu Jeluzaleme, a tula bhu sanzala ia Betefaje, ku mulundu ua Midiva; Jezú anga u tuma xibulu jê jiiadi, uixi:

² Ndenu ku sanzala ku sámbua koko, kindala mua kà sanga bûlu iókuike, ni monʼê uemana-nê; kà mu jitunienu. Mu ngi bhekele-nâ kunu.

³ Se bhu kala muthu u mi zuelesa, muà kela: Mesene ua a bhindamena. Kienhókio muène ua eha kindala, enu mu ngi bhekele-nâ.

⁴ Kiki-phe kia di bhange phala kubhitisa kia soneka o polofeta, uixi:

⁵ Monʼa Ziione, mu tangele, Sobha ié iu uiza, kindala u ku sanga; Ua belesela, uendela ku búlu, Monde iê seseme ia bûlu.

⁶ Jixibulu anga jiia, ji bhanga kala kia a tumu Jezú.

⁷ Bûlu anga eza na-iu ni monʼê; ene a ta milele iâ ku thandu diâ, Jezú anga u mondala.

⁸ Mundu uavulu ku kifuẋi anga a zala milele iâ mu njila; amukuá a batula isalala ia maie, hé a i zala ue mu njila.

⁹ O mundu iú ua tuamenena, ni iú ua mu kaiela, anga a dikola, exi: Hozana Monʼa Davidi! A tane-ku ueza mu dijina dia Ngana! Hozana ku Diulu!

¹⁰ Kia zubha kutula mu Jeluzaleme, mbonge ioso i salumuka, exi: Nanhi muenhú?

¹¹ Kuala mundu, exi: Muène polofeta, Jezú mukua Nazalé ku Ngalileia.

Jezú u kaiesa o jingenji mu Tembulu

¹² Jezú anga u bokona mu Tembulu ia Nzambi, u kaia-mu oso ala kutelamu mauenji, u lundula meza ma akua kutolokala kitadi, ni ibhuna ia akua kusumbisa mêmbe.

¹³ Anga ua ambela, uixi: Kiosoneke kuma: Inzu iami a kà ixana inzu ia kusamba. Enu-phe mua i bhange ngenda ia kusuamena miíi!

¹⁴ O ifuôfo ni inema anga i mu sanga mu Tembulu, muène anga ua a saka.

¹⁵ Jinganga ja makota-phe ni jimesene ja kulonga o Kitumu, kia mono o madiuanu mala mu bhanga Jezú, ni anandenge ala kudikola mu Tembulu, exi: Hozana Monʼa Davidi! Njinda ia a kuata.

¹⁶ Anga a mu ambela, exi: Ua kʼivu kiala mu zuela iá? Jezú uixi: Xi! Enu kiluua mu tanga mu Mikanda kuila: Diximanu diê dia fuama kiengi mu kanu dia anʼandenge ni tuana bhu maku?

¹⁷ Muène anga ua-xa bhobho, u tunda mu mbonge, uia ku Betaniia, anga u zekela koko.

Mufiku a u ta mázui kuala Jezú

¹⁸ Kúkia ni kimene, mu kuvutukisa ku mbonge, nzala i mu kuata.

¹⁹ Kia mono mufiku bhu mbanduʼa njila, u bhiẋila-bhu. U sanga-phe kana-ku kima, máfue ngó mala-ku. Muène anga u uambela, uixi: Ko kué ki kuà kale dingi kibundu! Muẋi anga u lela kindala.

²⁰ Jixibulu kia ki mono, a diuana, exi: Mufiku ua lela kiebhi kindalʼiki?

²¹ Jezú u a vutuila, uixi: Kidi kiene ngi mi ambela: Se mu kala ni kuxikana, sé phata, kia di bhange ku mufiku, ki kiene ngó ki mu bhanga, maji né mbe muà kela mulundu iú: Zangumuka bhobho, ua kà di kuzule mu ʼalunga, kiene ki di bhanga!

²² Ni ima ioso kiá i mu bhinga mu kusamba, ni kuxikana, mu i tambula.

O jiphata ja Jinganga ni Adiakime

²³ Kia zubha kubhixila mu Tembulu, jinganga ja makota ni adiakimi ku mundu eza, a mu sanga iu longa, exi: Eie ungana uahi u uala na-u phala kubhanga imbambʼiii? Ungana iú nanhi ua ku bhana-u?

²⁴ Jezú u a kumbulula, uixi: Eme uami ngi mʼibhula kima kimoxi, o ki mu ngi tangela-kiu, ngʼijiie kiua ku mi tangela ungana uoso u ngala na-u phala kubhanga imbambʼiíi.

²⁵ O kubatizala kua Nzuá ungana uê ua tundile kuebhi? Ku diulu kua Nzambi, inga ku athu? Ngi vutuidienu! Ene a xinganeka moxi diâ, exi: O ki tuila, tuexi: Ku diulu, kua Nzambi, muène uanda kuila: Enu-phe Nzuá mua kambelahi ku mu xikana?

²⁶ O ki tuila, tuexi: Ku athu, tuala ni uôma ua mundu, mukonda ene oso a tambulula Nzuá kuma polofeta.

²⁷ Anga a vutuila Jezú, exi: Ki tu kijiia. Kuala muène: Ni eme-phe nga ditunu ku mi tangela ungana uoso u ngala na-u phala kubhanga imbambʼiii.

Kifika kia ana kiiadi

²⁸ Jezú anga u tona ku a kumbulula, uixi: O kiki mua fika-phe kiebhi? Diiala dia kexile ni ana kiiadi. Anga uiza ku dikota, uixi: Mona, ndeie lelu ku kalakala ku mábhia metu.

²⁹ Mona uixi: Nguami! Kubhanga kithangana-phe u diela, anga uia.

³⁰ Uiza ku ndenge, u mu ambela kiene kimoxi. Ndenge uixi: Ngiia Ngana! O kuene kaii-ku.

³¹ Ku kiiadʼiki uebhi ua bhange o vondadi ia tatʼâ? Kuala ene: O dikota. Jezú uixi: Ni kidi kiene, ngi mi ambela, kuma akua kutambula lubhaku ni idianzunga ala ku mi tuamenena kubokona mu Utuminu ua Nzambi.

³² Mbata Nzuá ua mi sangele, uejiia kulondekeza athu mu njila ia kuiuka, enu-phe ki mua mu xikana. Akua kutambula lubhaku-phe, ni idianzunga, a mu xikana. O ki mua zubha ku ki mona, kusunga kiá kilunji kia kudiela, ni ku mu xikana, mua ki tokoka.

Kifika kia Idimakaji i kala ísueia

³³ Ivenu kifika kiamukuá: Kua kexile mukua dibhata, u dimisa mulenga, u u xita kikonzo, u kanda-mu ditangi dia kukamena vinhu, hé u tunga-mu inzu ia matala ia kulangidila, anga u u lukalesa ku idimakaji, anga uia ixi iengi.

³⁴ Kuila thembu ia idima ia zukama kiá, u tuma jiselevende jê ku idimakaji kutambula idima iê.

³⁵ Idimakaji anga i katula jiselevende jê, o iú a mu bhana kibetu, o iú a mu jibha, o iú a mu bûba ni matadi.

³⁶ Muène anga u tuma jiselevende ja mukuá, ja lundu ió a diangele kuia, anga a ji bhanga dingi kîomuene.

³⁷ Muène anga u katula kiua monʼê, uixi: Nga ki xikana muene kuila Monʼami a mu xila.

³⁸ Idimakaji-phe kia mono o mona, a di ambela mudiâ, exi: lú muène kabhinganu! Ndoko, tu mu jibhienu, o undundu uê nda tu mu buê-u!

³⁹ Anga a mu kuata, a mu tubhula mu mulenga, hé a mu jibha.

⁴⁰ Kiki-phe, mukua mulenga uê kià keza, o idimakaji ienhiʼii ua-nda ku i bhanga kiebhi?

⁴¹ Kuala ene: Ísueia ienhoio ua-nda ku i fuisa kalunga ka hadi, o mulenga nʼa u lukalesa idimakaji iengi, i mu bhakuila idima bhu jithembu jê.

⁴² Kuala Jezú: Enu mbebhu mu Madivulu ma kôla kiluua mu tanga-mu kuila: O ditadi dia ditunu jimesene, diene dia kuatesa bhu thungi, kienhiki kia tundu kua Nzambi, ku mesu metu kisúma?

⁴³ Uila kiki, ngi mi tangela na-kiu kuila, o Utuminu ua Nzambi a-nda ku mi tambula na-u, nʼa u bhane athu engi a bhana idima iê. [

⁴⁴ Ku ditadi didi, uoso u dibhala-ku u bukujuka; uoso-phe di mu lundumukina muène, u kituka fufuta.]

⁴⁵ Jinganga ja makota, ni jifalizeu, ki evu ifika iê, a mono kuma uala ku a tanga ene.

⁴⁶ Anga a sota ku mu kuata, maji a lengesa o ifuẋi, kuma mundu ua mu tambulula kuila Jezú polofeta.