Matesu 20 - O Mikanda Ikola

Kifika kia akalakadi mu mulenga

¹ Kuma Utuminu ua diulu ua difangana ni muthu, mukua dibhata, u tunda mu kimene mu kukasa jingunza aia ku mulenga uê.

² Amukuá, kia di xikana-nâ mu kizuua denádia, kizuua denádia, kala kiene o kífua kiâ, u a tuma ku mulenga uê.

³ Ku ola ia katatu anga u tunda dingi, u sanga amukuá ala ku di nanga bhu kitanda;

⁴ Anga ua ambela, uixi: Ndenu uenu ku mulenga, kioso kia tokala kiene ki ngi mi futa. Ene anga aia.

⁵ Ku ola ia kasamanu anga u tunda dingi luamukuá, ni ku ola ia kávua, anga u bhanga dingi kienhiki.

⁶ Ku ola ia kakuinhi ni imoxi u tunda, anga u sanga amukuá emana. Anga u a mbela, uixi: Mua di nangenʼahi kumbi diosuʼidi, né ngó kubhanga kima?

⁷ Exi: Mukonda kana-ku muthu ua tu kase. Kuala muène: Ndenu uenu ku mulenga uami.

⁸ Kutula mu ngoloxi, mukua mulenga uambela kaxelu kê, uixi: Ixana o jingunza, u a bhane o futu iâ. U matekena kua ió a sukidila kubokona, o ió a diangele kubokona a kaiele kuema.

⁹ A bokuene ku ola ia kakuinhi ni kamoxi, anga a a bhana kala muthu denádia.

¹⁰ O ió a diangele kuiza a fika, exi: Etu ua-nda ku tu tela-ku dingi; maji ni ene uâ, muthu o denádia diê, muthu o denádia diê.

¹¹ Kia zubha ku di tambula, mukua ʼnzo a mu longolola, exi:

¹² Iá a sukidila, a kalakala ola imoxi, eie-phe ua a sokelesa ni etu, tua huha dikumbi dioso ni muanha uatu.

¹³ Muène anga u vutuila-bhu muthu mudiâ, uixi: Kamba, eie ki bhuala bhu nga ku fumbila. Eie kua ngi xikanene mu kizuua denádia?

¹⁴ Katula o kiê, uende ni kuié. Nga mesena kioso ki nga mi bhana enu, ni iá a sukidila ue kiene.

¹⁵ Kífua o kiami eme-muène, ki ngi bhangeʼami na-kiu kioso ki nga mesena? Eie o diesu diê di kala ni dixinga, mukonda diami eme nga bhange o mbote?

¹⁶ Jezú anga uila kiki, uixi: A sukidila, a kà ʼdianga; o a dianga, a kà sukidila.

Jezú u tanga dingi o kûfua kuê

¹⁷ Jezú, kia kala mu banda ku Jeluzaleme, u ixanena kuinhi dia xibulu ni kiiadi bhu mbandu, anga u a mbela mu njila, uixi:

¹⁸ Talesenu, tuala mu banda ku Jeluzaleme; Monʼa Muthu a kà mu bhakula ku jinganga ni ku jimesene ja kulonga Kitumu.

¹⁹ Ene a kà mu êlesa phala ku mu jibha; a kà mu bhana ku matumbu ku mu bhanga kasekelu, ni ku mu bunda ni kibetu, ni ku mu phaphela ku dikulusu. Maji mu kizuua kia katatu-phe ua kà fukunuka.

Ana a Zebedeu a bhinga ukota

²⁰ Kienhókio, mamʼa anʼa Zebedeu uiza ni anʼê, anga a mu fukamena, ni ku mu bhinga kima.

²¹ Muène uixi: Kima kiahi ki ua mesena? Uixi: Bhana ngonge kuma hádia ki u kala u sobha, ku ungana uê, anʼami aiadi iá a xikame, iú ku mbandu ié ia kadilu, iú ku mbandu ié ia kiasu.

²² Jezú-phe u vutuila, ana kiiadi a muhatu, uixi: Ki mua kʼijiia kioso ki mua bhingi. Enu mu tena kúnua dikáu di nganda kúnua Eme? Ni ku mi batizala batizu ia ngi batizala na-iu Eme? Exi: Tua soko-bhu.

²³ Kuala muène: Kia uabha! Dikáu diami mua kà di nua muene, a kà mi batizala ni batizu ia ngi batizala eme. Maji o ku Xikama-phe ku madilu mami, ni ku kiasu kiami, ki kiami eme ku ki bhana, kuma kiangene-phe kia ió oso a a iudikila ididi iíi kuala Tata iami.

²⁴ O dikuinhi, kia kʼiivu, a futulukila jiphange jiiadi.

²⁵ Jezú anga ua exana ene oso, uixi: Enu muejiia kuma o jingana ku matumbu ji bhikisa o ifuẋi iâ, o makota mʼathu mudiâ ene a kala mu tumina.

²⁶ Mudienu-phe ki ki kale kiki; uoso-phe mudienu ua mesena ukota, a kale ngàmba ienu.

²⁷ O iú ua mesena kukala ku pholo, a di bhange mubhikʼ enu.

²⁸ Mukonda uila ki eza Monʼa Muthu, kana kukala ni athu a mu bhikila muène, maji muène-ku kubhika, ni kubhana o muenhu uê mu kukula mundu.

O ifôfo ia Jedikó

²⁹ Kia katuka ku Jedikó mundu uavulu u mu nhenganana.

³⁰ Bhu kala-phe ifôfo iiadi ia xikama mu ikoka, kia kʼivu kuila Jezú uala mu bhita, a dikola, exi: Tu Kuatele henda, Ngana, u Monʼa Davidi!

³¹ O mundu anga a a bazela, phala a dixibhe. Ene-phe a suina dingi kinéne o mázui, exi: Tu kuatele henda, Ngana, u Monʼa Davidi!

³² Jezú anga uimana, ua exana, uixi: Mua mesena ngi mi bhanga kiebhi?

³³ Ene a mu ambela, exi: Ngana, o mesu metu, ku tu tonesa-nâ!

³⁴ Bhenhobho Jezú kuma henda ia mu kuata, u babata mesu mâ; kindala anga a kala mu mona, anga a mu kaiela.