Matesu 2 - O Mikanda Ikola

Jinganga jiza mu ku bheza kamona Jezú

¹ Kiki kuila Jezú a mu vuala kiá mu Beleme ia Judeia, mu izuua ia sobha Helode, jinganga ku Thunda jiza mu Jeluzaleme, exi:

² A mu vuala, Sobha ia Jijudé, iu kuebhi? Mukonda théthembua iê tua i mono ku Thunda, etu tueza ku mu sambela.

³ Helode-phe, ki evu kiki, u tangalala, kia mu bhonzo ni Jeluzaleme ioso kiá.

⁴ O kia zubha kubhongolola jinganga joso ja makota ni jimesene ja kitumu, ua ebhudisa o Kristu mba u tokala ku mu vuala kuebhi.

⁵ Ene a mu ambela, exi: Mu Beleme ia Judeia. Mbata kiene kia soneka o polofeta, uixi:

⁶ Eie Beleme, mʼoxi ia Juda, kualʼé ngó u ndenge mu makota a Juda; mbata mó mué muene mua kà tunda o Dikota ua kà kala mubidi ua athu ami a Izalaiele.

⁷ Helode anga uixanena bhu mbandu o jinganga ja akua Thunda, anga ua a ebhudisa kiambote o thembu ioso ia moneka o théthembuʼiíi.

⁸ Anga u a tuma ku Beleme, uixi: Ndenu, kamona mua kà sote kiambote; ki mua kà sanga, muiza ku ngi tudila, eme uami ni ngiie ku mu sambela.

⁹ Ene, kia zubha kuívua sobha, a katuka. Talesa-phe o théthembua, iene ia muene ku Thunda, ia a tuamenena njila, anga iza, izenzamena bhuoso bhuala kamona.

¹⁰ Ki a mono o théthembua, ene a sanguluka ni ngalasa iavulu.

¹¹ Anga a bokona mʼonzo, hé a sanga kamona ni Madiia mamʼâ; anga adibhala, hé a mu sambela. O kuila a jikula mu imbamba iâ, a mu bhanga ujitu, ni ulu, ni uasu ua dizumba ua libana, ni uamukuá ua sumuna; a mu bhana.

¹² Mukonda Nzambi ua a dimuna ku nzoji, kuila kua Helode kaii-ku dingi, ela njila iengi, anga a vutuka kʼoxi iâ.

Zuze ulengela ku Ejitu ni Jezú, ni Mam ʼâ

¹³ O Jinganga kia zubhile kuia, talesa, mukunji ua Ngana utukulukila kua Zuze, ku nzoji, uixi: Balumuka, u katule kamona ni mamʼâ, u lengele ku Ejitu; ua kale koko katé bhuoso bhu ngi ku ixanena. Mukonda Helode ua-ndu sota o Kamona, phala ku ka jibha.

¹⁴ Muène anga u balumuka, Ukatula o Kamona ni mamʼâ mu usuku, anga uia mu Ejitu.

¹⁵ Kuene kiá kua kexile katé bhu ufuilu ua Helode. Kiki kia bhiti, phala ni ki tenene, kia tangele Ngana kua polofeta, uixi: Mu Ejitu muene mu ngexana monʼami.

Helode ujibhisa o tuana

¹⁶ Kiki Helode, kia mono kuila jinganga ja mu tobhesa, njinda i mu vula kinéne, anga u katula, u tuma kujibhisa mu Beleme ni mabhata mê moso, o tuana tuoso tua mala tua kuata kiá mivu iiadi, ni ndenge jâ. Kífua ua fikisa mu thembu ia diangele kuibhudisa kiambote o jinganga.

¹⁷ Kienhókio anga ki tenena kia tangele Jelemiia o polofeta, uixi:

¹⁸ Mu Lama evu-mu dízui, dia kibulukutu kia jingololo ni kudila kinéne, Lakele iu dila o tuana tuê; ku mu dixibhisa, nguê, mukonda tua jimi.

Zuze u vutuka ku Ejitu. U tunga mu Nazalé

¹⁹ Kuila Helode uafu-phe kiá, mukunji ua Ngana u tukulukila kua Zuze ku nzoji mu Ejitu, uixi:

²⁰ Balumuka, u katule Kamona ni mamʼâ, uie mʼoxi ia Izalaiele; mbata ió a bhindamenene kujibha o Kamona, afu kiá.

²¹ Muène anga u balumuka, u katula Kamona ni mamʼâ, anga uiza mʼoxi ia Izalaiele.

²² Kia kʼivu-phe kuila Alakelau ua hingi ungana ua Judeia bhu kididi kia tatʼâ Helode, uôma u mu kuata ua kuiaku. Kuma a mu dimuna ku nzoji, uela njila iengi katé mʼoxi ia Ngalileia.

²³ Hé uiza, u tunga mu sanzala a ʼixana Nazalé phala ki bhite kia tangele polofeta, kuila a ka mu ixana kuma mukua Nazalé.