Matesu 18 - O Mikanda Ikola

Uoso o dikota mu Utuminu ua Nzambi

¹ Kumbiʼodio jixibulu jiza kua Jezú, exi: Nanhi-phe uà kala kota mu Utuminu ua Diulu?

² Muène anga u ixana kamona, u ka xikamesa muʼ axaxi-kâ, uixi:

³ Ngi mi ambela kidi, muenhu uenu se u kamba kubiluka, ni mu kale uila mu anandenge, ku mua kà mona kididi mu Utuminu ua Diulu.

⁴ Uoso-phe u di tolesa kala o kamonʼ aka, muène kota mu Utuminu ua Diulu.

⁵ Uoso u tambulula, kamona mukuâ ni kaka, mu dijina diami, ua ngi tambulula eme.

O kiluezu kia kudibhalesa muthu mu ituxi

⁶ Uoso-phe ku tuana tutu, tua ngi xikana, u fudisa-ku kamona kamoxi ku ngi kaiela Eme, kia mu tokala o ku mu nhenga kiditadi mu xingu, ni ku mu bobesa muʼalunga mua zongo.

⁷ Lamba dia mundu mukonda dia ifudisu i bhekela athu ku ngi xisa Eme! Ima iíi kia bhingi i bhita muene, maji uoso-phe u i bheka, lamba diê!

⁸ Lúkuaku lué, mba kinama kié, se kia ku fudisa, batula-kiu; u ki texi! Mukonda ujitu uê kota o kubokona ku muenhu u kinema, mba ua kambe kidiandu, kana o kukala ni maku maiadi mba inama iiadi, nʼ a ku takula mu túbhia ki tuà jima dingi.

⁹ Ni diesu dié, se di ku fudisa, lokola-diu, u di texi! Mbata ujitu uê kota o kubokona ku muenhu u mukua diesu dimoxi, kana o kukala ni mesu maiadi, nʼ a ku takula mu ifernu ia túbhia.

O mbudi ia jimbidila

¹⁰ Alukenu, ki mu tènde kamona ku tuana tutu. Mbata ngi mi ambela kuma, o ji-anju jâ mu diulu jene mù mona o pholo ia Tata iami uene mu diulu. [

¹¹ Kuma Monʼ a Muthu ueza mu sota uoso ua jimbidila.]

¹² Enu mua fika kiebhi? Diiala se di kala ni hâma ia mbudi, anga bhu mu jimbila imoxi, muenhó u bhanga kiebhi? Manhi ka-nda kuxa o makuinhiʼ ivua nʼivua ala mù kúdia ku mulundu, nʼ aie mu sota iíi ia jimbidila?

¹³ O kia-nda ku i bonga, ngi mi ambela kidi, kuila u beta ku i sangulukila ioio, dikué o makuinhʼ ivua nʼ ivua ja kambele kujimbila.

¹⁴ Kiene kimoxi, ki kiala mu vondadi ia Tatʼenu uene mu diulu; kʼ andala kuila ku tuana tutu bhu texika kamoxi.

O kuloloka jinga. O kusamba

¹⁵ Mukuenu se ua ku te kituxi, ndeie u mu idikize kikuma kiê, maji ni eie ni muène ngó ku ubheka uenu. O kia kuívua, mukuenu ua mu nganhala.

¹⁶ Kia kamba-phe ku kuívua, katula dingi kiiadi mba kitatu, phale u bhange kala kia tange o Mikanda ia Ngana, kuila: Kutetulula maka moso, kikale ma tetulukila mu kanu dia mbangi jiiadi mba jitatu.

¹⁷ Kia di tuna kua evua ene, ka ki tangele ngeleja; o ngeleja ue se ua di tunu ku ívua, a ku kale mukuâ ni mukua matumbu, mba mukua kutambula lubhaku.

¹⁸ Ngi mi ambela kidi, kuma ima ioso i mu kutʼenu mu ngongo, ni mu diulu i kala iòkute; ima ioso i mu jituna mu ngongo, ni mu diulu i jituka.

¹⁹ Lua mukuá dingi ngi mi ambela: Se mudienu mu kala kiiadi, a di xikina mu ngongo kima kioso kia bhinga, mu kusamba, kienhókio a ki bhanga kuala Tata iami uene mu diulu.

²⁰ Mbata bhuoso bhu bhongoloka kiiadi mba kitatu mu dijina diami, eme bhene bhu ngi kala muʼ axaxi-kâ.

Kifika kia Selevende ia kambe o henda ia mukuá

²¹ Phetele anga uiza, u mu ambela, uixi: Mukuetu u ngi ta kituxi lukuxi, ni ngi mu loloka? Ngi mu loloka lusambuadi?

²² Kuala Jezú: Eme ki ngi ku ambela lusambuadi; maji katé lumakuinhi sambuadi a masambuadi.

²³ Kienhiki Utuminu ua Diulu ua difangana ni muthu, muenexi, ua mesena kubhanga jikonda ni jiselevende jê.

²⁴ Kia kuata ku jikonda, a mu bhekela muthu uadi dikongo dia kuinhi dia midi dia talendu.

²⁵ Kuma kia kufuta ka ki mono, ngana iê u tuma ku mu sumbisa, ni muhatuʼê, ni anʼê, ni ima ioso iala na-iu, phala dikongo ku di futisa.

²⁶ Selevendeʼ oio anga u di bhala, u mbolomoka, uixi: Ngana, ngi kuatele henda, hinu ioso ngi ku fute-iu!

²⁷ Ngana ia selevende ienhoio, kuma henda ia mu kuata, u mu jituna, u mu loloka o dikongo.

²⁸ Selevendeʼ oio-phe u tubhuka, u sanga selevende ni mukuâ ua mu di dikongo dia hâmʼ a denádia. Anga u mu kuata, u mu xina bhu xingu, uixi: Dikongo diami futa-diu!

²⁹ Selevende ni mukuá anga u di bhala, u mu dionda, uixi: Ngi kuatele henda, hinu ioso ngi ku fute-iu!

³⁰ Muène-phe nguê! Hé uianê u mu tesa mu ʼaleia, katé a mu futu dikongo diadi.

³¹ Akuá-phe kia zubha ku ki mona, kia bhangʼ iki, kia a iibhila kiavulu. Anga eza kua ngana iâ, a mu tangela kioso kia bhiti.

³² Ngana iê anga u mu ixana, uixi: Eie selevende ia kimi, u kísueia! Eme nga ku ehela dikongo diosuʼ odio, mukonda ua ngi dionda;

³³ manhi eie kífua ki kia ku tokalele ku kuatela mukuenu henda, uila eme ki nga ku kuatela eie o henda?

³⁴ Ngana iê njinda i mu kuata, anga u mu bhana akua kaleia, katé bhuoso bhua kà futila dikongo dioso diadi.

³⁵ Ni Tata iami mu diulu, kiene kia kà mi bhanga enu, se ku miẋima ienu mu kamba kuloloka mu kidi mukuenu uoso-uoso u mi bhanga kima kiaiibha.