Matesu 17 - O Mikanda Ikola

Jezú u kituluka ku Mulundu

¹ Kubhita izuua isamanu, Jezú u katula Phetele, ni Tiiaku, ni phangʼiê Nzuá, hé u a bheka ku thala ia mulundu ualebha, kʼubheka uâ.

² Kuenhoko muène anga u kituluka bhu pholo iâ. O pholo iê i di muika kala dikumbi, izuatu iê i zela kala muanha,

³ Talesa-phe, kua a tukulukila Mozé ni Elija, a kala mu kuzuela ni Jezú.

⁴ Phetele anga u kumbulula, u ambela Jezú, uixi: Ngana, kiauabha se tu kala bhabha. Eie Ngana, se ua mesena, ngi tunge-bhu fundu jitatu: íi o ié, íi ia Mozé, íi ia Elija.

⁵ Kioso Phetele kia kexile hanji mú zuela, talesa, dituta di luendela dia a vungina; o mu dituta anga mu tunda dízui, dixi: Muenhú Monʼami uózole, uene mu ngi sangulukisa. Ioso ia zuela, mu ivienunu muene!

⁶ Jixibulu kia kʼivu, a di bhala jipholo bhoxi, uôma uavulu ua a kuata.

⁷ Jezú anga uiza, hé u a tungutisa, uixi: Balumukenu, ki mu kale ni uôma!

⁸ Ene kia zubha kuzambula mesu, ka mono dingi muthu, Jezú ngó a xala-nê.

⁹ Kia kala mú kulumuka mu mulundu, Jezú u a tuma, uixi: Kisuma kiki ki mu ki tangele muthu, katé kia kà fukunuka Monʼa Muthu ku madifundu.

¹⁰ Jixibulu anga a mu ibhula, exi: O jimesene ene mu longa o Kitumu, ala mú zuela kiebhi kuma kikale Elija u dianga kuiza?

¹¹ Muène u a vutuila, uixi: Kidi kiene, Elija uiza, o ima ioso hé u i bheka mu uiukilu uê.

¹² Eme-phe ngi mi ambela kuma Elija uejile kiá; ene-phe ka mu ijiia, maji a mu bhange ioso ia mesena. Kiene ue, Monʼa Muthu ua kà tala hadi kua ene.

¹³ Jixibulu bhenhobho a kʼivu kuma Ngana ua tange Nzuá dia Batizu.

Jezu u saka mukua kikonha

¹⁴ Kia bhixila bhuala kifuẋi, kuiza muthu u mu fukamena, uixi:

¹⁵ Ngana, monʼami mu kuatele henda! Kuma muène uene ni kikonha, ua kate kiaiibha, kua bhingi ua di bhale kiá luavulu mu túbhia, ua di bhale ue kiá luavulu mu menha.

¹⁶ Nga mu bheka ku jixibulu jé, maji ene-phe ka tena ku mu saka.

¹⁷ Jezú anga u kumbulula, uixi: Muiji ua kambe o kuxikana, ua thathamana! Ngi kala ni enu katé bhebhi? Katé bhebhi ngi kala ni ku mi xididikila? Monʼé ngi bhekele-nê bhabha!

¹⁸ Jezú anga u bazela o dimónho, dimónho anga di tunda mu mukutu uê. Mona anga u disanza tunde mu kumbi dienhódio.

¹⁹ Jixibulu anga jiza kua Jezú ku ubheka, exi: Etu dimónho diodio, tua lembuela-hi ku di kaia?

²⁰ Muène ua ambela, uixi: Mukonda o kuxikana kuenu kua tolo. Kuma ngi mi ambela kidi, se mu kala ni kuxikana né kua sokoʼé ngó ni lumbundu lua mbutu ia mustarda, mua kʼàmbela mulundu iú, muixi: Sondoloka bhabha, uie bhaná! Uene ua kà sondoloka. Enu mu kala ni kutena, kana kima ki mu lémbua. [

²¹ Maji o mbutu iíi-phe ia dimónho, ku di kaia kuê, kikale mu kusamba ni kujila.]

Jezú u tanga o kûfua ni kufukunuka kuê

²² Kioso maxibulu kia kala mu bhanga izuua ku Ngalileia, Jezú, ua ambela, uixi: Monʼa Muthu hinu a kà mu bhakula bhu maku ma athu.

²³ Ene a kà mu jibha, maji ua kà fukunuka mu kizuua kia katatu. Ene anga a kala ni malamba mavulu.

Phetele u katula kitadi mu kanu dia mbiji

²⁴ Kia bhiẋila Jezú ni maxibulu mê mu Kafanau, akua kutambula kitadi kia lubhaku lua tembulu eza kua Phetele, exi: O Mesene ienu kitadi kia tembulu ka mu ki bhana?

²⁵ Muène uixi: Xi! Kia zubha kutula mʼonzo-phe, Jezú u dianga ku mu ambela muène, uixi: Ximá eie ua fika kiebhi? O jisobha mu ngongo ji tambula madijimu ni lubhaku kua nanhi? A tambula ku anʼa akuaʼ xi, inga ku athu engi?

²⁶ Phetele kia vutula, uixi: Ku athu engi, Jezú uixi: Hé kiene, ana ka tokala dingi kubhana.

²⁷ Phala-phe ka kale ni diba dia ku tu longolola-na-diu, ndeie ku kizanga, ua kà te nzolo mu menha, u kuate mbiji ioso i dianga kubanda. O ki u i jikula mu kanu diê, ua ká sanga-mu kitadi ki soka kufuta o mibhaku ietu. Tambula-kiu, ua kà a bhane phala eme ni eie.